କାଳିଆପାଣି,୩୧ା୩(ଡି.ଏନ.ଏ.): ଯାଜପୁର ଜିଲା ସୁକିନ୍ଦା ବ୍ଲକ ଅନ୍ତର୍ଗତ କାଳିଆପାଣି ପଞ୍ଚାୟତର ଗୁରୁଜଙ୍ଗ ଓସ୍ତପାଳ ଗ୍ରାମରେ ବହୁଳ ଭାବେ ଗଜା (ଛୋଟ) ଗଛ କଟାଯାଇ ରାସ୍ତାକଡ଼ରେ (ଗୋଦାମ)ପରି ଗଦା ହୋଇଥିବା ଦେଖିବାକୁ ମିଳିଛି। ହେଲେ ଏଥିପ୍ରତି ବନ ବିଭାଗର ନଜର ପଡୁନାହିଁ। ଫଳରେ ଏହାକୁ ନେଇ ବିଭାଗୀୟ ଅଧିକାରୀଙ୍କ କାର୍ଯ୍ୟ ସନ୍ଦେହ ଘେରକୁ ଆସିଛି। ବୃକ୍ଷ ହିଁ ଜୀନ, କାଗଜ କଲମ ଓ ସ୍ଲୋଗାନରେ ସୀମିତ ହୋଇ ରହିଯାଇଛି। ଜଙ୍ଗଲ ନିକଟବର୍ତ୍ତୀ ଗ୍ରାମର କେତେ ଜଣ ଅଧିବାସୀ ଘରର ଜାଳେଣି, ଛାଉଣୀ ଓ ବାଡ଼ିବଗିଚା ଆବଦ୍ଧ କରିବା ପାଇଁ ଛୋଟ ଗଛ କାଟି ରାସ୍ତା କଡ଼ରେ ଗଦା କରୁଛନ୍ତି। ସେ ସବୁ ଶୁଖିଗଲା ପରେ ତାହାକୁ ବ୍ୟବହାର କରୁଛନ୍ତି। ଖଣି ସଂଲଗ୍ନ ଓସ୍ତପାଳ ଗ୍ରାମ ଫେକର ଖଣିକୁ ଯିବା ରାସ୍ତାର ଏକ ବସ୍ତିରେ ବିପୁଳ ଗଜା ଗଛ ଗଦା ହୋଇଥିବା ଦେଖିବାକୁ ମିଳିଛି। ଗ୍ରାମର ପ୍ରାୟ ସମସ୍ତଙ୍କ ଘର ଆଗରେ ଗଜା ଗଛର ଡିପୋ ରହିଛି। ଚିରାଚରିତ ଭାବେ ବର୍ଷ ବର୍ଷ ଧରି ଏଠାରେ ଗଛ କଟା ଚାଲିଛି ବୋଲି ଅଭିଯୋଗ ହୋଇଛି।
ଅନ୍ୟପକ୍ଷଷର ଖଣି ପାଇଁ ବ୍ୟାପକ ବୃକ୍ଷ ନଷ୍ଟ ହେଉଥିବାରୁ ପ୍ରତି ବର୍ଷ ବିପୁଳ ଟଙ୍କା ଖର୍ଚ୍ଚ କରି ବନ ବିଭାଗ ଚାରାରୋପଣ କରୁଛି। ଖଣି କମ୍ପାନୀଗୁଡ଼ିକ ମଧ୍ୟ ବ୍ୟାପକ ଭାବେ ବନୀକରଣ କରୁଥିବା ପ୍ରଚାର ପ୍ରସାର ହେଉଛି। ପ୍ରତ୍ୟେକ ଖଣି ମାଲିକଙ୍କୁ ବନୀକରଣ ନିମନ୍ତେ ସରକାରଙ୍କ କଡ଼ା ନିର୍ଦ୍ଦେଶ ରହିଥିବାବେଳେ କମ୍ପାନୀମାନେ କେବଳ କାଗଜ କଲମରେ ଚାରାରୋପଣ କରି ନିଜ ଖଣିକୁ ସୁରକ୍ଷା ଦେଇ ଚାଲିଛନ୍ତି ବୋଲି ଅଭିଯୋଗ ହେଉଛି। ପ୍ରତି ବର୍ଷ ବର୍ଷାଋତୁ ଆସିଲେ କମ୍ପାନୀଗୁଡ଼ିକ ରାଜନେତା, ଜନପ୍ରତିନିଧି ଓ ବନ ବିଭାଗ ଅଧିକାରୀଙ୍କ ସହିତ ମିଶି ଚାରା ବିତରଣ କରିଥାନ୍ତି। ଏଥିସହିତ କେତେକ ସ୍ଥାନରେ ଗଛ ଲଗାଇଥାନ୍ତି। ହେଲେ ତା’ର ସୁରକ୍ଷା ପ୍ରତି ଗୁରୁତ୍ୱ ଦେଉ ନ ଥିବାରୁ ତାହା ଭୂଇଁରୁ ଉଠିବା ପୂର୍ବରୁ ନଷ୍ଟ ହୋଇଯାଉଛି। ତେବେ ବ୍ୟାପକ ସଚେତନତା ସହିତ ବନ ବିଭାଗ ପକ୍ଷରୁ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଗଲେ ଜଙ୍ଗଲ ସୁରକ୍ଷା ହୋଇପାରନ୍ତା ବୋଲି ସାଧାରଣରେ ମତପ୍ରକାଶ ପାଇଛି। ଏ ସମ୍ପର୍କରେ ପ୍ରତିକ୍ରିୟା ପାଇଁ ଫରେଷ୍ଟର ନରେଶ କୁମାର ଟୁଡୁଙ୍କୁ ଫୋନ ଦ୍ୱାରା ଯୋଗାଯୋଗ କରାଯାଇଥିଲେ ମଧ୍ୟ ସେ କୌଣସି ଉତ୍ତର ଦେଇ ନ ଥିଲେ।
