ଘସିପୁରା,୧୮ା୧୧(ନିରଞ୍ଜନ ସାହୁ): କେନ୍ଦୁଝର ଜିଲାର ଆନନ୍ଦପୁର ଦେଇ ପ୍ରବାହିତ ବୈତରଣୀ ନଦୀ ତଟ ଘସିପୁରା ଥାନା ଅଧୀନ ପଞ୍ଚୁପଲ୍ଲୀ ଗାଁରେ ବାଘ ଆତଙ୍କକୁ ନେଇ ଭୟର ବାତାବରଣ ଦେଖାଯାଇଛି। ଶୁକ୍ରବାର ବାଘ ପରି ଏକ ପ୍ରାଣୀ ଚାଷଜମିରେ ଚାଲି ଚାଲି ଯାଉଥିବାର ଭିଡିଓ ଭାଇରାଲ ହେବା ପରେ ଗାଁରେ ଆତଙ୍କ ଖେଳିଯାଇଥିଲା। ଘଟଣାର ସତ୍ୟତା ଜାଣିବା ପାଇଁ ଆନନ୍ଦପୁର ବନ ବିଭାଗ ପକ୍ଷରୁ କର୍ମଚାରୀଙ୍କୁ ନିୟୋଜିତ ମଧ୍ୟ କରାଯାଇଥିଲା। ଶନିବାର ଘଟଣାର ଅନୁସନ୍ଧାନ କରିବା ପରେ ଚାଷଜମିରେ ପଡ଼ିଥିବା ପାଦଚିହ୍ନରୁ ଏହା ଏକ କଲରାପତିରିଆ ବାଘ ବୋଲି ଅନୁମାନ କରାଯାଉଥିବା ଡିଏଫ୍ଓ ଅଭୟ କୁମାର ଦଳେଇ ପ୍ରକାଶ କରିଛନ୍ତି। ତେବେ ବାଘଟି ହଦଗଡ଼ ବନ୍ୟପ୍ରାଣୀ ବନଖଣ୍ଡ ଅଞ୍ଚଳରୁ ଆସି ପୁନର୍ବାର ଫେରିଯାଇଥିବା ବନ ବିଭାଗ ଅନୁମାନ କରିଛି। ଏନେଇ ବନ ବିଭାଗ ପକ୍ଷରୁ ଗ୍ରାମବାସୀଙ୍କୁ ସଚେତନ କରାଯାଇଛି। ଏକାକୀ ଘର ବାହାରେ ବୁଲାବୁଲି ନ କରିବା, ଘର ସମ୍ମୁଖରେ ଆବଶ୍ୟକ ଲାଇଟ୍ ଜଳାଇବାର ବ୍ୟବସ୍ଥା ଗ୍ରହଣ କରିବା, ରାତି ସମୟରେ ସାଙ୍ଗରେ ଲାଇଟ୍ ଧରି ଯିବା ଭଳି ସଚେତନତା ବାର୍ତ୍ତା ବନ ବିଭାଗ ପକ୍ଷରୁ ପ୍ରଦାନ କରାଯାଉଛି।
