ଦାରିଙ୍ଗବାଡ଼ି,୪ା୨(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ବୁଧବାର ୩ ଜଣିଆ କାୟାକଳ୍ପ ଦଳ ପହଞ୍ଚିଥିଲେ। ସେମାନଙ୍କ ମଧ୍ୟରେ ଡାକ୍ତର ଶୁଭ୍ରାଂଶୁ ପ୍ରଧାନ, ମାନସ କୁମାର ଖର ଏବଂ ଦେବବ୍ରତ ପତି ଥିଲେ। ପୂର୍ବରୁ କାୟାକଳ୍ପ ଦଳ ପରିଦର୍ଶନରେ ଆସିବା ରହିଥିବାରୁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିସର ଏବଂ ବାହାରକୁ ସଫେଇ କରାଯାଇଥିଲେ ମଧ୍ୟ ଆହୁରି କୁଢ଼କୁଢ଼ ଅଳିଆ ଗଦାକୁ ଦେଖି କାୟାକଳ୍ପ ଦଳ ଉଦ୍ବେଗ ପ୍ରକାଶ କରିଥିଲେ। ସ୍ବାସ୍ଥ୍ୟକେନ୍ଦ୍ରରେ ଅନେକ ସମସ୍ୟା ରହିଥିବା ଦେଖିବା ସହ ତା’ର ସମାଧାନ ପାଇଁ ପ୍ରୟାସ କରାଯିବ ବୋଲି କୁହାଯାଇଥିଲା। ସେହିପରି ଉକ୍ତ ବ୍ଲକ ଅଞ୍ଚଳରେ ଏହି ଗୋଟିଏ ହିଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ରହିଥିବା ବେଳେ ସ୍ବାଧୀନତାପର ଠାରୁ ଆଜି ପର୍ଯ୍ୟନ୍ତ ସ୍ବାସ୍ଥ୍ୟକେନ୍ଦ୍ରର ବିକାଶ ହୋଇପାରୁ ନ ଥିବା ଓ ବିଶେଷଜ୍ଞ ଡାକ୍ତର ପଦବୀ, ରୋଗୀ ଶଯ୍ୟା ବୃଦ୍ଧି, ଆବଶ୍ୟକ ଡାକ୍ତର ପଦବୀ ପୂରଣ, ଗର୍ଭବତୀ ମହିଳାଙ୍କ ପାଇଁ ଅଲଟ୍ରାସାଉଣ୍ଡ ବ୍ୟବସ୍ଥା, ଡାକ୍ତରମାନେ ନିୟମିତ ସ୍ବାସ୍ଥ୍ୟକେନ୍ଦ୍ରରେ କିଭଳି ନିଜ ଡ୍ୟୁଟି କରିବେ ସେନେଇ ପଦକ୍ଷେପ ନେବାକୁ ସ୍ଥାନୀୟ ଅଞ୍ଚଳବାସୀ କାୟାକଳ୍ପ ଦଳଙ୍କୁ ଏକ ଦାବିପତ୍ର ପ୍ରଦାନ କରିଥିବା ଜଣାପଡ଼ିଛି।
ଏହି ଦାବିପତ୍ରକୁ ସ୍ଥାନୀୟ ନାରୀନେତ୍ରୀ ବିଳାସିନୀ ନାୟକ, ପ୍ରଶାନ୍ତ ପ୍ରଧାନ, ନିରଜ ପ୍ରଧାନ, ଚକ୍ରଧର ମଲ୍ଲିକ, ଅନନ୍ତ ବିଷୋୟୀ, ଅକ୍ଷୟ କୁମାର ପରିଚ୍ଛା, ଭବାନୀ ଶଙ୍କର ପଡ୍ରା, କୁଳମଣି ପ୍ରଧାନ, ନିଧିରତ୍ନ ପ୍ରଧାନ, ଜିତୁ ନାୟକ, ପୁରେନ୍ଦ୍ର ପ୍ରଧାନ, ବର୍ଣ୍ଣବ ପ୍ରଧାନ ପ୍ରମୁଖ ଏହି ଦାବିପତ୍ର ପ୍ରଦାନ କରିଛନ୍ତି। କାୟାକଳ୍ପ ଦଳ ସ୍ବାସ୍ଥ୍ୟକେନ୍ଦ୍ରସ୍ର ପ୍ରତ୍ୟେକ କର୍ମଚାରୀଙ୍କୁ ଭେଟି ପଚରାଉଚରା କରିବା ଓ ସ୍ବାସ୍ଥ୍ୟକେନ୍ଦ୍ର ପରିଦର୍ଶନ କରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଇନ୍ଚାର୍ଜ ଡାକ୍ତର ଜାକେଶ ସାମନ୍ତରାୟ, ବିପିଏମ୍ ଶାନ୍ତନୁ ସାହୁଙ୍କ ସମେତ ସମସ୍ତ ଡାକ୍ତର ଓ କର୍ମଚାରୀଙ୍କ ସହ ସ୍ବାସ୍ଥ୍ୟକେନ୍ଦ୍ରର ସମସ୍ୟା ସୁବିଧା ଅସୁବିଧା ସମ୍ପର୍କରେ ଆଲୋଚନା କରିଥିଲେ।