ନୂଆଦିଲ୍ଲୀ,୨୮ା୪: ଜନସାଧାରଣଙ୍କ ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରତ୍ୟକ୍ଷ ଆଲୋଚନା କାର୍ଯ୍ୟକ୍ରମ ମନ୍ କୀ ବାତ୍ର ୧୦୦ତମ ଅଧ୍ୟାୟ ପୂର୍ତ୍ତି ଅବସରରେ କୋଣାର୍କ ସୂର୍ଯ୍ୟମନ୍ଦିରଠାରେ କେନ୍ଦ୍ର ସଂସ୍କୃତି ମନ୍ତ୍ରଣାଳୟ ପକ୍ଷରୁ ଅତ୍ୟାଧୁନିକ ପ୍ରୋଜେକ୍ସନ ମ୍ୟାପିଂ ଶୋ’ ଆୟୋଜିତ ହେବ। ଆସନ୍ତା ୨୯ ତାରିଖରେ ଆଇଏସ୍ଆଇ କୀର୍ତ୍ତିରାଜି ସମେତ ୧୩ଟି ପ୍ରତିଷ୍ଠିତ ସ୍ଥାନରେ ଏଭଳି ଶୋ’ର ଆୟୋଜନ କରାଯିବ ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଛି। ମନ୍ କୀ ବାତ୍ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀଙ୍କ ବିବିଧତା ଶୀର୍ଷକ ଉପରେ ଐତିହାସିକ, ପ୍ରତ୍ନତାତ୍ତ୍ୱିକ ଗୁରୁତ୍ୱ ତଥା ଭାରତର ବିବିଧତା ମଧ୍ୟରେ ଆଞ୍ଚଳିକ ବୈଶିଷ୍ଟ୍ୟ ଉକ୍ତ ଶୋ’ରେ ପ୍ରଦର୍ଶିତ ହେବ ବୋଲି କେନ୍ଦ୍ର ସଂସ୍କୃତି ସଚିବ ଗୋବିନ୍ଦ ମୋହନ କହିଛନ୍ତି।
ଆଞ୍ଚଳିକ ଭାଷାରେ ପ୍ରୋଜେକ୍ସନ ମ୍ୟାପିଂ ଶୋ’ହେବାକୁ ଥିବାବେଳେ ସେଥିରେ ଦେଶର ଇତିହାସ ଓ ଐତିହ୍ୟକୁ ବିସ୍ତୃତ ଭାବେ ଉପସ୍ଥାପନ କରାଯିବ। ଦର୍ଶକମାନେ ରାତି ୭ଟାରୁ ଏହାକୁ ଉପଭୋଗ କରିବାର ସୁଯୋଗ ପାଇବେ। ସେହିପରି ୩୦ ତାରିଖରେ ନୂଆଦିଲ୍ଲୀର ଏନ୍ଜିଏମ୍ଏରେ ଜନଶକ୍ତି ଉପରେ ଏକ ଚିତ୍ରକଳା ପ୍ରଦର୍ଶନୀର ଉଦ୍ଘାଟନ କରାଯିବ। ସେଥିରେ ୧୨ ଜଣ ଖ୍ୟାତନାମା ଚିତ୍ରକରଙ୍କ ପେଣ୍ଟିଂ ପ୍ରଦର୍ଶିତ ହେବ। ମୋଦିଙ୍କ ମନ୍ କୀ ବାତ୍ରେ ଉଲ୍ଲେଖ ଥିବା ସାଧାରଣ ବ୍ୟକ୍ତିବିଶେଷଙ୍କ ବୀରତ୍ୱ ଗାଥାକୁ ଅମୃତଚିତ୍ର କମିକ୍ସରେ ପ୍ରକାଶିତ ହେବ।
