ରଘୁନାଥପୁର,୧୭।୪(ଡି.ଏନ୍.ଏ.): ଜଗତ୍ସିଂହପୁର ଜିଲା ରଘୁନାଥପୁର ବ୍ଲକ କେରେକେରାସ୍ଥିତ ପ୍ରସିଦ୍ଧ ବିଭୂତିକ୍ଷେତ୍ର ପ୍ରଭୁ ଗୋରେଖନାଥଙ୍କ ମହିମା ଅବର୍ଣ୍ଣନୀୟ। ପୀଠ ପକ୍ଷରୁ ନିଲାମ ଦିଆଯାଇଥିବା ଭୋଗ ଦୋକାନରେ ନିମ୍ନମାନର ଭୋଗ ବିକ୍ରୟ ହେଉଥିବା ଏବଂ ଏହାକୁ କିଣୁଥିବା ବ୍ୟକ୍ତିମାନଙ୍କ ମଧ୍ୟରୁ ଅନେକେ ନିକଟସ୍ଥ ପୋଖରୀରେ ଫୋପାଡ଼ି ଦେଉଥିବା ନେଇ ଅପପ୍ରଚାର ହେଉଛି। ଏ ସମ୍ପର୍କରେ ହାତଗଣତି ଖବରକାଗଜରେ ପ୍ରକାଶ ପାଇବା ସହ ଏହାର କପି ବିଭିନ୍ନ ସାମାଜିକ ଗଣମାଧ୍ୟମରେ ଘୂରି ବୁଲୁଛି। ଏହା ସମ୍ପୂର୍ଣ୍ଣ ମିଥ୍ୟା। ପୀଠର ମର୍ଯ୍ୟାଦା ହାନି କରିବା ପାଇଁ ଏଭଳି ଷଡ଼ଯନ୍ତ୍ର କରାଯାଇଛି ବୋଲି ଉପଦେଷ୍ଟା ସୁଶାନ୍ତ କୁମାର ଦାଶ ଓ ଗ୍ରାମ କମିଟି ସଦସ୍ୟ ପ୍ରଦୀପ୍ତ କୁମାର ମହାନ୍ତିଙ୍କ ସହ ଅଞ୍ଚଳବାସୀଙ୍କ ପକ୍ଷରୁ ଅଭିଯୋଗ କରାଯାଇଛି। ଖାଦ୍ୟ ଅନୁପଯୋଗୀ ଭୋଗକୁ ନେଇ ପ୍ରକାଶ ପାଇଥିବା ଖବରରେ ପୀଠ ସହ ଜଡ଼ିତ ଥିବା ଉପଦେଷ୍ଟା ପ୍ରଶାନ୍ତ କୁମାର ଭୂୟାଁ ଓ ସ୍ଥାନୀୟ ଗ୍ରାମ କମିଟି ସଦସ୍ୟ ଆଇନଜୀବୀ ଜୀବନବଲ୍ଲଭ ମହାନ୍ତିଙ୍କ ନାମ ଉଲ୍ଲେଖ ରହିଛି। ଉକ୍ତ ୨ ଜଣ ଭୋଗ ସମ୍ପର୍କରେ କୌଣସି ମତାମତ ରଖି ନ ଥିବା ସ୍ପଷ୍ଟ କରିଛନ୍ତି। ଏଭଳି ଅପପ୍ରଚାର ଦ୍ୱାରା ନିଲାମଧାରୀ ଭୋଗ ଦୋକାନୀଙ୍କ ସମେତ ପ୍ରଭୁଙ୍କ ଆୟରେ କ୍ଷତି ଘଟୁଛି ବୋଲି ଆଇନଜୀବୀ ମହାନ୍ତି କହିଛନ୍ତି। ଏ ସମ୍ପର୍କରେ ଆଲୋଚନା କରି ପରବର୍ତ୍ତୀ ପଦକ୍ଷେପ ନିଆଯିବ ବୋଲି ସେ ପ୍ରକାଶ କରିଛନ୍ତି। ନିମ୍ନମାନର ଭୋଗ ବିକ୍ରୟ ସମ୍ପର୍କରେ କୌଣସି ଅଭିଯୋଗ ଟ୍ରଷ୍ଟବୋର୍ଡ ଅଫିସକୁ ଆସିନି ବୋଲି ଉପଦେଷ୍ଟା ଭୂୟାଁ ପ୍ରକାଶ କରିଛନ୍ତି। ଆସନ୍ତା ଅକ୍ଷୟ ତୃତୀୟାରୁ ପୀଠରେ ୮ ଦିନ ବ୍ୟାପୀ ବିଶ୍ୱଶାନ୍ତି ମହାଯଜ୍ଞ ଅନୁଷ୍ଠିତ ହେବ। ଏହି ସମୟରେ ଲକ୍ଷାଧିକ ଭକ୍ତଙ୍କ ସମାଗମ ହେବାର ସମ୍ଭାବନା ରହିଛି। ମାତ୍ର ଏହାପୂର୍ବରୁ ଏଭଳି ଅପପ୍ରଚାର କରାଯିବା ଦ୍ୱାରା ବ୍ୟବସାୟରେ କ୍ଷତି ହୋଇପାରେ ବୋଲି ଭୋଗ ଦୋକାନ ନିଲାମଧାରୀ ରମେଶ ସାହୁ ଆଶଙ୍କା ବ୍ୟକ୍ତ କରି ଏଭଳି ଅପପ୍ରଚାରକୁ ନିନ୍ଦା କରିଛନ୍ତି।
