ବେମେତାରା,୩୦।୧୧: ଛତିଶଗଡ଼ର ବେମେତାରା ଜିଲାରେ ଜଣେ ନାବାଳକ ପଡ଼ିଶା ଘରର ଜଣେ ୧୦ ବର୍ଷର ବାଳିକାଙ୍କୁ ବଳାତ୍କାର ପରେ ହତ୍ୟା କରିଥିବା ଅଭିଯୋଗ ହୋଇଛି। ୧୭ ବର୍ଷୀୟ ଅଭିଯୁକ୍ତଙ୍କୁ ପୋଲିସ ସୋମବାର ଅଟକ ରଖିଛି। ରାୟପୁରଠାରୁ ୯୦ କିଲୋମିଟର ଦୂର ବେମେତରାର ସିଟି କୋଟଓ୍ବାଲି ଥାନା ଅନ୍ତର୍ଗତ ଏକ ଗାଁରେ ଶନିବାର ଏହି ଅପରାଧ ଘଟିଛି। ପୀଡ଼ିତା ରହସ୍ୟଜନକ ଭାବେ ଘର ବାହାରେ ଝୁଲୁଥିବା ଖବର ପାଇ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା। ଝିଅଟିକୁ ବଳାତ୍କାର କରାଯିବା ପରେ ତଣ୍ଟିଚିପି ହତ୍ୟା କରାଯାଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି। ପଚରାଉଚରା ପରେ ପୋଲିସ ଅଭିଯୁକ୍ତଙ୍କୁ ଠାବ କରିଥିଲା। ନାବାଳକ ଜଣକ ମୋବାଇଲ୍ ଫୋନ୍ରେ ଅଶ୍ଳୀଳ ଫିଲ୍ମ ଦେଖିବା ପରେ ପୀଡ଼ିତାଙ୍କ ଘରେ ପଶି ତାଙ୍କୁ ବଳାତ୍କାର କରିଥିଲା ବୋଲି ପୋଲିସ ନିକଟରେ ସ୍ବୀକାର କରିଛି। ଝିଅଟି ଅପରାଧ ସମ୍ପର୍କରେ ପରିବାରକୁ ଜଣାଇଦେବ ଭାବି ସେ ଏକ ଉତ୍ତରୀୟରେ ତାଙ୍କ ଗଳା ଚିପି ହତ୍ୟା କରି ମୃତଦେହକୁ ଝୁଲାଇ ଦେଇଥିଲେ ଏବଂ ଛାତ ଉପର ବାଟେ ଖସି ପଳାଇଥିଲେ। ଅଭିଯୁକ୍ତଙ୍କ ନାମରେ ଆଇପିସିର ଧାରା ୩୭୬, ୩୭୬ଏବି, ୩୦୨, ୨୦୧ ଏବଂ ୪୫୦ ସମେତ ପୋକ୍ସୋ ଆଇନରେ ମାମଲା ରୁଜୁ ହୋଇଛି। ସ୍ଥାନୀୟ କୋର୍ଟ ତାଙ୍କୁ ଦୁର୍ଗ ଜିଲାର ଜୁଭେନାଇଲ୍ ହୋମ୍କୁ ପଠାଇଦେଇଛନ୍ତି।
