ବେଜିଂ,୧୯ା୬: ଓ୍ବାଶିଂଟନ୍ ଓ ବେଜିଂ ମଧ୍ୟରେ ବଢ଼ୁଥିବା ତିକ୍ତତା ଦୂର କରିବା ମିଶନରେ ଆମେରିକା ପରରାଷ୍ଟ୍ର ସଚିବ ଆଣ୍ଟୋନି ବ୍ଲିଙ୍କେନ୍ ରବିବାର ଚାଇନା ଗସ୍ତ କରିଛନ୍ତି। ସେ ଚାଇନା ବହିର୍ବ୍ୟାପାର ମନ୍ତ୍ରୀ କ୍ୱିନ୍ ଗାଙ୍ଗ୍ଙ୍କ ସହ ତାଇଓ୍ବାନ୍ ପ୍ରସଙ୍ଗ ଓ ୟୁକ୍ରେନ୍ ଯୁଦ୍ଧ ସମେତ ବିଭିନ୍ନ ବିଷୟରେ ଆଲୋଚନା କରିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୁନ୍ ୨୨ରେ ଓ୍ବାଶିଂଟନ୍ ଯାଇ ରାଷ୍ଟ୍ରପତି ଜୋ ବାଇଡେନ୍ଙ୍କ ସହ ଆଲୋଚନା କରିବାକୁ ଥିବାବେଳେ ଆମେରିକାର ଶୀର୍ଷ କୂଟନୀତିଜ୍ଞ ବ୍ଲିଙ୍କେନ୍ ଦୁଇଦିନିଆ ବେଜିଂ ଗସ୍ତ କରିଛନ୍ତି। ପ୍ରତିରକ୍ଷା ସହଯୋଗ ବୃଦ୍ଧି, ଆମେରିକା, ଭାରତ, ଅଷ୍ଟ୍ରେଲିଆ ଓ ଜାପାନର କ୍ୱାଡ୍ ମେଣ୍ଟକୁ ସୁଦୃଢ଼ କରିବା ଉପରେ ମୋଦି-ବାଇଡେନ୍ଙ୍କ ମଧ୍ୟରେ ଆଲୋଚନା ହୋଇପାରେ। ଚାଇନାକୁ ଘେରିବା ଏହି ମେଣ୍ଟର ଉଦ୍ଦେଶ୍ୟ ବୋଲି ଚାଇନା ପକ୍ଷରୁ ଅଭିଯୋଗ ହୋଇଆସୁଛି। ତେଣୁ ବ୍ଲିଙ୍କେନ୍ଙ୍କ ଗସ୍ତକୁ କୂଟନୈତିକ ଦୃଷ୍ଟିରୁ ଗୁରୁତ୍ୱ ଦିଆଯାଉଛି।
ଚାଇନା ଓ ଆମେରିକା ଦ୍ୱିପାକ୍ଷିକ ସମ୍ପର୍କ ସୁଧାରିବା ପାଇଁ ଆଗ୍ରହୀ ଥିବା ବ୍ଲିଙ୍କେନ୍ଙ୍କ ଗସ୍ତରୁ ମନେକରାଯାଉଛି। ସେ ସୋମବାର ଚାଇନାର ଶୀର୍ଷ କୂଟନୀତିଜ୍ଞ ଓ୍ବାଙ୍ଗ୍ ୟି ଏବଂ ରାଷ୍ଟ୍ରପତି ଶି ଜିନ୍ପିଙ୍ଗ୍ଙ୍କ ସହ ଆଲୋଚନା କରିପାରନ୍ତି। ବାଇଡେନ୍ ରାଷ୍ଟ୍ରପତି ହେବା ପରେ ଏହା ହେଉଛି ଜଣେ ଉଚ୍ଚସ୍ତରୀୟ ଆମେରିକୀୟ ଅଧିକାରୀଙ୍କ ପ୍ରଥମ ଚାଇନା ଗସ୍ତ। ସେହିପରି ଗତ ୫ ବର୍ଷ ମଧ୍ୟରେ ଏହା ହେଉଛି ଜଣେ ପରରାଷ୍ଟ୍ର ସଚିବଙ୍କ ପ୍ରଥମ ଚାଇନା ଗସ୍ତ। ବ୍ଲିଙ୍କେନ୍ ଗତ ଫେବୃୟାରୀରେ ବେଜିଂ ଗସ୍ତ କରିବାର ଥିଲା। କିନ୍ତୁ ଆମେରିକା ଆକାଶରେ ଚାଇନାର ଗୁପ୍ତଚର ବେଲୁନ୍ ଉଡ଼ିବା ପରେ ସେ ଗସ୍ତକୁ ବାତିଲ କରିଥିଲେ। ତେଣୁ ଏହି ଗସ୍ତ ଉପରେ ଅନ୍ତର୍ଜାତୀୟ ସମୁଦାୟର ନଜର ରହିଛି।
