ରାଜକନିକା,୩୦ା୫(ଡି.ଏନ୍.ଏ.): ମୁଣ୍ଡ ଗୁଞ୍ଜିବାକୁ ଛାତ ନାହିଁ। ହେଲେ ଛାତିରେ ଛାତିଏ ବଳ। ମୁଁ ଭିନ୍ନକ୍ଷମ ସତ, ହେଲେ ଯେଉଁମାନେ ମୋ ପରି ଭିନ୍ନକ୍ଷମଙ୍କୁ ଖରାପ ନଜରରେ ଦେଖୁଛନ୍ତି ମୁଁ ସେମାନଙ୍କ ପାଇଁ ଉଦାହରଣ ସାଜିବାକୁ ଚାହୁଁଛି। ସରକାରୀ ସ୍ତରରେ ମୁଁ ଅଣଦେଖା। କିନ୍ତୁ ଯଦି ମୋତେ ଆଉଥରେ ସୁଯୋଗ ମିଳେ ତେବେ ମୁଁ ରାଜ୍ୟ ପାଇଁ ବା ଦେଶ ଲାଗି ନିଶ୍ଚିତ ଗୌରବ ଆଣିବି ବୋଲି ଆଖି ଛଳଛଳ କରି ଧୀର କଣ୍ଠରେ କହିଛନ୍ତି ରାଜ୍ୟ ତଥା ଜାତୀୟସ୍ତରରେ ବେଶ୍ ସୁନାମ ଅଜର୍ର୍ନ କରି ୨୦ରୁ ଊର୍ଦ୍ଧ୍ୱ ମେଡାଲ ସହ ପ୍ରମାଣପତ୍ର ପ୍ରାପ୍ତ କରିଥିବା ଭିନ୍ନକ୍ଷମ ଆଥ୍ଲେଟ ସ୍ବର୍ଣ୍ଣଲତା ବେହେରା। ଘର କେନ୍ଦ୍ରାପଡ଼ା ଜିଲା ରାଜକନିକା ବ୍ଲକ ଜାଗୁଳାଇପଡ଼ା ପଞ୍ଚାୟତର ଗଞ୍ଜା ଗ୍ରାମରେ। ସ୍ବର୍ଣ୍ଣଲତା ୮ ବର୍ଷ ବୟସରୁ ବାପାଙ୍କୁ ହରାଇ ମା’ଙ୍କ ବୋଝ ହୋଇଥିବା ବେଳେ ଶାରୀରିକ ଯନ୍ତ୍ରଣା ତାଙ୍କ ପାଇଁ ବୋଝ ଉପରେ ନଳିତା ବିଡ଼ା ସଦୃଶ। ଆଣ୍ଠେଇ ଆଣ୍ଠେଇ ଚାଲୁଥିବା ସ୍ବର୍ଣ୍ଣଲତା ଯନ୍ତ୍ରଣା ସହ୍ୟ କରି ନ ପାରି ମା’ ଲକ୍ଷ୍ମୀପ୍ରିୟାଙ୍କ ସହ ଓଲଟପୁର ନିର୍ତାର ହସ୍ପିଟାଲ ଯାଇ ଅସ୍ତ୍ରୋପଚାର କରାଇବା ପରେ ସେଠାରେ ଦେଖିବାକୁ ପାଆନ୍ତି ତାଙ୍କ ପରି ଅନେକ ଭିନ୍ନକ୍ଷମଙ୍କୁ। ବିଭିନ୍ନ ପ୍ରକାର ଖେଳ ସେମାନେ ଖେଳିପାରୁଛନ୍ତି। ସେଠାରୁ ହୁଇଲ ଚେୟାରରେ ବସି ଅନ୍ତର୍ନିହିତ ଶକ୍ତିକୁ ଜାଗରଣ କରି ଖେଳିବାକୁ ବାହାରି ପଡ଼ନ୍ତି। ଆଉ କେବେ ପଛକୁ ଚାହିଁନାହାନ୍ତି। ରାଜ୍ୟ ତଥା ଦେଶ ପାଇଁ ବିଭିନ୍ନ ସ୍ଥାନରେ ସେ ଶଟ୍ପୁଟ, ଜାଭେଲିନ୍, ଡିସ୍କସ୍, ମାରାଥନ ଆଦି ଖେଳି ୨୦ରୁ ଊର୍ଦ୍ଧ୍ୱ ମେଡାଲ ଓ ପ୍ରମାଣପତ୍ର ପାଇଛନ୍ତି। କିନ୍ତୁ ଆଜି ସେ ଅଲୋଡ଼ା ଓ ଅଖୋଜା।
ଯେତେବେଳେ ସେ ରାଜ୍ୟ ଓ ଦେଶ ପାଇଁ ମେଡାଲ ଆଣୁଥିଲେ, ସେତେବେଳେ ତାଙ୍କ ପାଇଁ ଗର୍ବ ଅନୁଭବ କରୁଥିବା ଲୋକମାନେ ଆଜି ତାଙ୍କ ସାଙ୍ଗରେ ନାହାନ୍ତି। ମା’ଙ୍କ ସହ ନୁଅଁାଣିଅଁା ନଡ଼ା ଛପର ଚାଳଘରେ ରହୁଥିବା ସ୍ବର୍ଣ୍ଣଲତାଙ୍କ ପାଇଁ ଭରସା କେବଳ ନିଜର ଭିନ୍ନକ୍ଷମ ଭତ୍ତା ସହ ମାସକୁ ମିଳୁଥିବା ୫ କିଗ୍ରା ଚାଉଳ। ସରକାରୀ ସହାୟତା ପାଇଁ ଯେତେବେଳେ ସେ ପ୍ରଶାସନିକ ଅଧିକାରୀଙ୍କୁ ଭେଟି ଗୁହାରି କରନ୍ତି, ସେତେବେଳେ ତାଙ୍କୁ ଉତ୍ତର ମିଳେ ନିଜ ନାମକୁ ଯଦି ତୁମ ରାଶନ କାର୍ଡରୁ ଅଲଗା କରିବ ତେବେ ସରକାରୀ ସାହାଯ୍ୟ ମିଳିବ ବୋଲି ସ୍ବର୍ଣ୍ଣଲତା କହିଛନ୍ତି। ବୃଦ୍ଧା ମା’ଙ୍କୁ ଛାଡି ସେ ଅଲଗା ହୋଇପାରୁନାହାନ୍ତି କି ସରକାରୀ ସାହାଯ୍ୟ ପାଇପାରୁନାହାନ୍ତି। ସ୍ବର୍ଣ୍ଣଲତାଙ୍କୁ ଆଜି ବି ସୁଯୋଗ ମିଳିଲେ ରାଜ୍ୟ ତଥା ଦେଶ ପାଇଁ ଗୌରବ ଆଣିବେ ବୋଲି ସେ କହିଛନ୍ତି। ସରକାରଙ୍କ କ୍ରୀଡ଼ା ବିଭାଗ ଦୃଷ୍ଟି ଆଢୁଆଳରେ ରହିଯାଇଥିବା ସ୍ବର୍ଣ୍ଣଲତାଙ୍କୁ ରାଜ୍ୟ ତଥା କେନ୍ଦ୍ର ସରକାର ଜଣେ ସଫଳ ଆଥଲେଟ୍ ହିସାବରେ ବିବେଚିତ କରି ସମସ୍ତ ସରକାରୀ ସୁବିଧା ସୁଯୋଗ ସହ ସହାୟତା ଯୋଗାଇ ଦେବାକୁ ନିବେଦନ କରିଛନ୍ତି।
