ଲଣ୍ଡନ ୧୨ା୧୦: ଗର୍ଭାଶୟ କର୍କଟକୁ ପ୍ରାରମ୍ଭିକ ପର୍ଯ୍ୟାୟରେ ଚିହ୍ନଟ କରାଯାଇପାରିବ। ଏଥିପାଇଁ ଏକ ରକ୍ତ ପରୀକ୍ଷା କରିବାକୁ ପଡ଼ିବ। ସେହି ରକ୍ତ ପରୀକ୍ଷା ଗର୍ଭାଶୟ କର୍କଟକୁ ଚିହ୍ନଟ କରିବାରେ ୯୧ପ୍ରତିଶତ ଠିକ୍ ହେବ ବୋଲି ଏକ ଗବେଷଣାରୁ ଜଣାପଡ଼ିଛି। ଅନୁସନ୍ଧାନକାରୀମାନେ ୩୭୦ଟି ରକ୍ତ ନମୁନା ନେଇ ଏହି ଗବେଷଣା କରିଥିଲେ। ଏ ସମ୍ପର୍କରେ କ୍ଲିନିକାଲ କ୍ୟାନ୍ସର ରିସର୍ଚ୍ଚ ଜର୍ନାଲରେ ପ୍ରକାଶ ପାଇଛି। ଅନୁସନ୍ଧାନକାରୀମାନେ ଏକ ନୂତନ ରକ୍ତ ପରୀକ୍ଷା ଗବେଷଣା କରିଛନ୍ତି, ଯାହା ପ୍ରାରମ୍ଭିକ ପର୍ଯ୍ୟାୟରେ ଗର୍ଭାଶୟ କର୍କଟକୁ ଚିହ୍ନଟ କରିବାକୁ ସକ୍ଷମ ହେଇପାରୁଛି।
ଏହା ପେଲ୍ଭିକ୍ ମାସ୍ ଠିକ୍ ଅଛି ନା ତାହା ଗର୍ଭାଶୟ କର୍କଟରେ ଆକ୍ରାନ୍ତ ହୋଇଛି ତାହା ଜଣାପଡ଼ିଯିବ। ଓଭାପ୍ରିଣ୍ଟ ନାମରେ ଜଣାଶୁଣା ଏହି ପରୀକ୍ଷଣ ବିଭିନ୍ନ ପ୍ରକାର ପ୍ରାରମ୍ଭିକ ପର୍ଯ୍ୟାୟ କର୍କଟ ଚିହ୍ନଟ କରିବାର ଏକ ନୂତନ ଉପାୟ। ଓଭା ପ୍ରିଣ୍ଟ ହାଇ-ଗ୍ରେଡ୍ ସିରୋସ୍ ଓଭାରିଆନ କାର୍ସିନୋମା(ଏଚ୍ଜିଏସ୍ଓସି)କୁ ଚିହ୍ନଟ କରିଥାଏ। କର୍କଟ ଆରମ୍ଭ ହୋଇଥିବା ବେଳେ ଏହା ଚିହ୍ନଟ ହୋଇଥାଏ ଏବଂ ଏହାକୁ ଚିକିତ୍ସା କରିବା ସହଜ ହୋଇପାରିଥାଏ। ଏଚ୍ଜିଏସ୍ଓସି ହେଉଛି ଗର୍ଭାଶୟ କର୍କଟର ସବୁଠାରୁ ସାଧାରଣ ପ୍ରକାର। ଏହା ମଧ୍ୟ ସବୁଠାରୁ ଘାତକ ରୂପ। କାରଣ କ୍ଲିନିକାଲ୍ ବିଶେଷଜ୍ଞମାନେ ଠିକ୍ ସମୟରେ ଏହାର ସ୍କ୍ରିନିଂ କରିପାରନ୍ତି ନାହିଁ।
ପେଲ୍ଭିକ୍ ମାସ୍ ଥିବା ରୋଗୀ କ୍ଷେତ୍ରରେ ସେହି ମାଂସଟି ସାଧାରଣ ଭାବେ ବୃଦ୍ଧି ପାଇଛି ନା ତାହା କର୍କଟ ହୋଇଛି ତାହା ଜାଣିବା କଷ୍ଟକର ହୋଇଥାଏ। ଏଭଳି କ୍ଷେତ୍ରରେ ଅନ୍ୟ କର୍କଟ ରୋଗ ଜାଣିବା ପାଇଁ ପରୀକ୍ଷା କରାଯାଉଥିବା ବାୟୋପ୍ସି ମଧ୍ୟ ଏକ ବିକଳ୍ପ ପରୀକ୍ଷଣ ହୋଇପାରେନାହିଁ। ଫଳରେ ଡାକ୍ତରଙ୍କ ପାଇଁ ସର୍ବୋତ୍ତମ ଚିକିତ୍ସା ପଦ୍ଧତି ବାଛିବା କଷ୍ଟକର ହୋଇଥାଏ।
ପ୍ରାରମ୍ଭିକ ପର୍ଯ୍ୟାୟରେ ଗର୍ଭାଶୟ କର୍କଟ ଚିହ୍ନଟ ହେଲେ, ରୋଗୀମାନଙ୍କର ୫ବର୍ଷ କିମ୍ବା ତା’ଠାରୁ ଅଧିକ ବଞ୍ଚତ୍ବାର ୯୦ପ୍ରତିଶତରୁ ଅଧିକ ସୁଯୋଗ ଥାଏ। କିନ୍ତୁ ଶେଷ ପର୍ଯ୍ୟାୟରେ କର୍କଟ ଚିହ୍ନଟ ହେଲେ ସେମାନଙ୍କର ଜୀବିତ ରହିବା ସମ୍ଭାବନା ୪୦ ପ୍ରତିଶତରୁ କମ୍ ହୋଇଯାଏ। ଏ ସମ୍ପର୍କରେ ଆମେରିକା ସାଉଥ କାଲିଫର୍ନିଆ ବିଶ୍ୱବିଦ୍ୟାଳୟର ଜେନୋମିକ ଏବଂ ଏପିଜେନୋମିକ ରେଗୁଲେଶନ ରିସର୍ଚ୍ଚ ପ୍ରୋଗ୍ରାମର ଗବେଷକ ବୋଡୋର ସାଲହିୟା କହିଛନ୍ତି, କର୍କଟ ଶୀଘ୍ର ଚିହ୍ନଟ ହେଲେ ଜୀବନ ରକ୍ଷା ହୋଇପାରିଥାଏ।
ଯଦି ଆମେ ପ୍ରାଥମିକ ସ୍ତରର ଗର୍ଭାଶୟ କର୍କଟକୁ ଠିକ୍ ଭାବରେ ଚିହ୍ନଟ କରିପାରିବା, ତେବେ ଆମେ ରୋଗର ଫଳାଫଳକୁ ପରିବର୍ତ୍ତନ କରିପାରିବା ଏବଂ ବଞ୍ଚତ୍ବାର ହାରକୁ ବୃଦ୍ଧି କରିପାରିବା।
