ନୂଆପଡ଼ା/ବୋଡେନ,୩ା୧୨ (ମକାରୁ ବେମାଲ/ଟିକେଶ୍ୱର ନାଗ): ନୂଆପଡ଼ା ଜିଲା ବୋଡେନ ବ୍ଲକ କର୍ଲାକୋଟ ପଞ୍ଚାୟତ କିରେଝୋଲା ଗାଁ ସର୍ଗିମୁଣ୍ଡାରେ ସୋମବାର ରାତିରେ ଏକ କଲରାପତରିଆ ବାଘ ଜଣେ ବ୍ୟକ୍ତିଙ୍କ ଗୁହାଳରେ ପଶି ୧୫ରୁ ଊର୍ଦ୍ଧ୍ୱ ଛେଳିମେଣ୍ଢାଙ୍କୁ ମାରିଦେଇଛି।ଏହାକୁ ନେଇ ଅଞ୍ଚଳରେ ଭୟର ବାତାବରଣ ଦେଖାଦେଇଛି। ସୂଚନା ଅନୁଯାୟୀ, ସର୍ଗିମୁଣ୍ଡାର ଛେଳି ଚାଷୀ ବେଦବର ମାଝି ନିଜର ୪୦ରୁ ଅଧିକ ଛେଳିମେଣ୍ଢାଙ୍କୁ ଜଙ୍ଗଲରୁ ଚରାଇ ଆଣି ସନ୍ଧ୍ୟାରେ ଗୁହାଳରେ ବାନ୍ଧି ରଖିଥିଲେ। ଏପରିସ୍ଥଳେ ସୋମବାର ମଧ୍ୟରାତ୍ରରେ ନିକଟ ଜଙ୍ଗଲରୁ ଏକ କଲରାପତରିଆ ବାଘ ଆସି ଗୁହାଳ ଭିତରେ ପଶି ୧୫ ଛେଳିମେଣ୍ଢାଙ୍କୁ ମାରିଥିଲା। ବାଘଟି ୨ଟି ମେଣ୍ଢାର ପେଟକୁ ଫାଡି ଖାଇଥିବାବେଳେ ୧୩ଟିକୁ ମାରି ଦେଇଛି। ଗୁହାଳ ପାଖରେ କେତେକ ମୃତ ମେଣ୍ଢା ପଡିରହିଥିବା ବେଳେ ଆଉ କେତେକଙ୍କୁ ଗୁହାଳରୁ ଜଙ୍ଗଲ ଭିତରକୁ ଟାଣି ନେଇଛି। ମଙ୍ଗଳବାର ଖଇରା ପ୍ରାଣୀ ସମ୍ପଦ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚତ୍ ମୃତ ଛେଳିମେଣ୍ଢାଙ୍କ ବ୍ୟବଚ୍ଛେଦ କରିଛନ୍ତି। ଖଡିଆଳ ବନ ବିଭାଗ କର୍ମଚାରୀ ପହଞ୍ଚତ୍ ସ୍ଥିତି ଅନୁଧ୍ୟାନ କରିଛନ୍ତି। ଗାଁ ଓ ଜଙ୍ଗଲ ଭିତରେ ଟ୍ରାପ କ୍ୟାମେରା ଲଗାଇ ବାଘର ଗତିବିଧି ଉପରେ ନଜର ରଖିଛନ୍ତି। ଘଟଣା ପରେ ଲୋକେ ଭୟରେ ବାହାରକୁ ଯାଉ ନାହାନ୍ତି। ବନ ବିଭାଗ ପକ୍ଷରୁ ଡାକବାଜି ଯନ୍ତ୍ର ସାହାଯ୍ୟରେ ଲୋକଙ୍କୁ ସଚେତନ କରାଯାଉଛି। ଗାଁ ପାଖରେ ଥିବା ଗୁରୁ ଡଙ୍ଗର ଜଙ୍ଗଲରୁ ବାଘ ଆସିଥିବା ଗ୍ରାମବାସୀ ଅନୁମାନ କରୁଛନ୍ତି। ଖଡିଆଳ ବନ ବିଭାଗ ରେଞ୍ଜର ଜୟଦେବ ମାଝି ମୃତ ଛେଳିମେଣ୍ଢାଙ୍କ ମୂଲ୍ୟ ଆକଳନ କରି କ୍ଷତିପୂରଣ ବାବଦକୁ ସହାୟତା ଯୋଗାଇ ଦିଆଯିବ। କଲରାପତରିଆ ବାଘ ଏଭଳି ଘଟଣା ଘଟାଇଥିବା ଅନୁମାନ କରାଯାଉଛି ବୋଲି ରେଞ୍ଜର କହିଛନ୍ତି। ଗୁହାଳ ଓ ମୃତ ଛେଳିମେଣ୍ଢା ପଡିଥିବା ସ୍ଥାନରେ ବାଘର ପାଦଚିହ୍ନ ରହିଥିବା ଗ୍ରାମବାସୀ ଓ ବନ ବିଭାଗ କର୍ମଚାରୀ ଚିହ୍ନଟ କରିଛନ୍ତି।
