ସିଦ୍ଧାର୍ଥ ନନ୍ଦୟାଲା, ବୟସ ମାତ୍ର ୬ ବର୍ଷ । ହେଲେ ଏଇ ବୟସରେ ସେ ଡେଭଲପ୍ କରିଛନ୍ତି ‘ସର୍କେଡିୟାଭି’ ନାମକ ଏକ ଏଆଇ ସଞ୍ଚାଳିତ ଆପ୍, ଯାହା କେବଳ ୭ ସେକେଣ୍ଡରେ ହୃଦ୍ରୋଗଗୁଡ଼ିକୁ ଚିହ୍ନଟ କରିଦେବ। ସିଦ୍ଧାର୍ଥଙ୍କର ଏହି ଆପ ଏକ ମେଡିକାଲ ସଫଳତା କହିଲେ ଭୁଲ୍ ହେବ ନାହିଁ। ଏହା ସ୍ମାର୍ଟ ଫୋନ ଆଧାରିତ ହୃଦଧ୍ୱନିର ରେକର୍ଡିଂକୁ ଉପଯୋଗ କରି ହୃଦ୍ ସମ୍ବନ୍ଧୀୟ ରୋଗଗୁଡ଼ିକର ପ୍ରାରମ୍ଭିକ ସମୟରୁ ଚିହ୍ନଟ କରିବାରେ କ୍ରାନ୍ତି ଆଣିବ। ଏହି ଟେକ୍ନିକ୍ର ପରୀକ୍ଷଣ ଆମେରିକାରେ ୧୫୦୦୦ରୁ ଅଧିକ ରୋଗୀଙ୍କଠାରେ ଓ ଭାରତରେ ୭୦୦ ରୋଗୀଙ୍କ ଉପରେ କରାଯାଇଛି। ତାଙ୍କର ଏହି ପ୍ରତିଭାରେ ପ୍ରଭାବିତ ହୋଇ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡ଼ୁ ତାଙ୍କୁ କାର୍ଯ୍ୟାଳୟକୁ ଡାକିଥିଲେ। ସେ କୁହନ୍ତି,‘ ସିଦ୍ଧାର୍ଥଙ୍କ ଅସାଧାରଣ ପ୍ରତିଭା ଓ ମାନବଜାତିର ମଙ୍ଗଳ ପାଇଁ ଟେକ୍ନଲୋଜିର ଉପଯୋଗ କରିବା ପ୍ରତି ସମର୍ପଣ ଭାବ ପ୍ରତି ମୁଁ ବହୁତ ପ୍ରଭାବିତ। ଏତେ କମ୍ ବୟସରେ ସେ ସମସ୍ତଙ୍କ ପାଇଁ ପ୍ରେରଣା ପାଲଟିଛନ୍ତି। ସେଥିପାଇଁ ସେ ଆଗକୁ ବଢ଼ନ୍ତୁ ବୋଲି ଆମେ ପ୍ରୋତ୍ସାହିତ କରୁଛୁ। ’ ସୂଚନାଯୋଗ୍ୟ ଯେ, ସିଦ୍ଧାର୍ଥ ହେଉଛନ୍ତି ପୃଥିବୀର ସର୍ବକନିଷ୍ଠ ଏଆଇ ସାର୍ଟିଫାଇଡ୍ ପ୍ରଫେଶନାଲ। ସେ ଜଣେ କନିଷ୍ଠ ଏଣ୍ଟରପ୍ରେନ୍ୟୁର ଭାବେ ବି ପରିଚିତ। ସେ STEM ITର ସଂସ୍ଥାପକ ଓ ସିଇଓ, ଯାହାକି ବିଶ୍ୱସ୍ତରରେ STEM ଶିକ୍ଷାକୁ ବଢ଼ାଇବା ଉଦ୍ଦେଶ୍ୟରେ ସ୍ଥାପନ କରାଯାଇଛି। ଏହା ମାଧ୍ୟମରେ ସେ ଛାତ୍ରଙ୍କୁ କୋଡିଂ, ରୋବୋଟିକ୍ସ ଓ ଏଆଇ ସମ୍ପର୍କରେ ଜଣାଇଥାନ୍ତି। ସିଦ୍ଧାର୍ଥଙ୍କ ବାପା ମହେଶ ମୂଳ ରୂପରେ ଆନ୍ଧ୍ରପ୍ରଦେଶର ଅନନ୍ତପୁରର। ୨୦୧୦ରେ ସେ ଆମେରିକା ଚାଲି ଯାଇଥିଲେ। ପରେ ସେଠି ରହିଯାଇଛନ୍ତି।
