ନୂଆଦିଲ୍ଲୀ: କେନ୍ଦ୍ର ସରକାର ଭାରତୀୟ ଜୀବନ ବୀମା ନିଗମ(ଏଲ୍ଆଇସି)ର ୨୫% ଅଂଶଧନ ବିକିପାରନ୍ତି। ଏହି ପ୍ରକ୍ରିୟାକୁ ପର୍ଯ୍ୟାୟ ଭିତ୍ତିରେ କରିବା ଲାଗି ସରକାର ବିଚାର କରୁଥିବା ଜଣାପଡ଼ିଛି। ଉକ୍ତ ପ୍ରସ୍ତାବକୁ କାର୍ଯ୍ୟକାରୀ କରାଇବା ଲାଗି ବର୍ତ୍ତମାନ କ୍ୟାବିନେଟ ମଞ୍ଜୁରୀ ଆଣିବା ଲାଗି ଯୋଜନା କରାଯାଉଛି। ବିତ୍ତୀୟ ନିଅଣ୍ଟକୁ କମ୍ କରିବା ଲାଗି କେନ୍ଦ୍ର ସରକାର ଏଭଳି କାର୍ଯ୍ୟକ୍ରମ ଦିଗରେ ଅଗ୍ରସର ହେଉଥିବା ପ୍ରକ୍ରିୟା ସହ ଜଡ଼ିତ ଜଣେ ଅଧିକାରୀ ନାମ ଗୋପନ ରଖି ସୂଚନା ଦେଇଛନ୍ତି। ଏ ନେଇ ରହିଥିବା ଆଇନକୁ ମଧ୍ୟ ସଂଶୋଧନ କରାଯିବା କାର୍ଯ୍ୟକ୍ରମ ରହିଥିବା ଶୁଣାଯାଉଛି। ଏ ପ୍ରସଙ୍ଗ ଉପରେ ଅର୍ଥ ମନ୍ତ୍ରଣାଳୟର ପ୍ରତିକ୍ରିୟା ଲୋଡ଼ାଯାଇଥିଲେ ମଧ୍ୟ ଏହା ମିଳିପାରିନାହିଁ। କରୋନା ଭାଇରସ ଲାଗି ସରକାରଙ୍କ ଖର୍ଚ୍ଚ ବଢିବ। ରାଜକୋଷରେ ଟିକସ ସଂଗ୍ରହ ଉନ୍ନତ ହେଉ ନ ଥିବାରୁ ବିତ୍ତୀୟ ନିଅଣ୍ଟ ଧାର୍ଯ୍ୟଲକ୍ଷ୍ୟ ଟପିଯିବା ନେଇ ଆକଳନ କରାଯାଇଛି।
ବିଭିନ୍ନ କମ୍ପାନୀର ଅଂଶଧନ ବିକ୍ରି ଦ୍ୱାରା ସରକାର ପୁଞ୍ଜି ଉଠାଇବା ଲାଗି ଯୋଜନା ରଖିଛନ୍ତି। ପୁଞ୍ଜି ପ୍ରତ୍ୟାହାରରୁ ୨.୧ ଲକ୍ଷ କୋଟି ଟଙ୍କା ଆଦାୟ କରିବା ଲାଗି ସରକାର ଲକ୍ଷ୍ୟ ରଖିଥିଲେ ମଧ୍ୟ ମାତ୍ର ୫,୭୦୦ କୋଟି ଟଙ୍କା ଉଠାଣ ହୋଇ ପାରିଛି। ଏଲ୍ଆଇସିର ଇନିସିଆଲ ଶେୟାର ସେଲ୍ ପ୍ଲାନ୍କୁ ଅଗ୍ରସର କରାଇବା ଲାଗି ସରକାର ଡେଲଏଟ ଟି.ଟି. ଇଣ୍ଡିଆ ଲିମିଟେଡ୍ ଏବଂ ଏସ୍ବିଆଇ କ୍ୟାପିଟାଲର ପରାମର୍ଶ ନେଉଥିବା ବ୍ଲୁମବର୍ଗର ଏକ ରିପୋର୍ଟରେ ପ୍ରକାଶ ପାଇଛି। ପ୍ରକ୍ରିୟାକୁ ଅଗ୍ରସର କରାଇବା ଲାଗି ଏଲ୍ଆଇସିର ପୁଞ୍ଜି ଢାଞ୍ଚା ଏବଂ ଆର୍ଥତ୍କ ଦସ୍ତାବିଜ ସଂକ୍ରାନ୍ତ ବିଭିନ୍ନ କାର୍ଯ୍ୟ ଏହି ଏଜେନ୍ସିଗୁଡିକ ସମ୍ପନ୍ନ କରିବା ନେଇ ଶୁଣାଯାଉଛି। ଆସେଟ ସେଲ୍ ଲାଗି ଏକ ମନ୍ତ୍ରୀ ସ୍ତରୀୟ ଗୋଷ୍ଠୀ ମଧ୍ୟ ଗଠନ ହୋଇଛି। ସୂଚନାଯୋଗ୍ୟ, ଶେୟାରର ପବ୍ଲିକ ଅଫରିଂ ଦ୍ୱାରା ଏଲ୍ଆଇସି କାର୍ଯ୍ୟଧାରାରେ ଶୃଙ୍ଖଳା ଏବଂ ନୂଆ ଭାଲ୍ୟୁ ସଂଯୋଗ ହୋଇପାରିବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ ଚଳିତ ବର୍ଷ ଫେବୃୟାରୀ ବଜେଟ ଅଭିଭାଷଣରେ କହିଥିଲେ।
