ନୂଆଦିଲ୍ଲୀ,୧୯।୧ : କରୋନା ମହାମାରୀ ପରେ, ବିଦ୍ୟାଳୟରେ ନାମ ଲେଖାଉଥିବା ଛାତ୍ରୀଛାତ୍ରମାନଙ୍କ ସଂଖ୍ୟାରେ କ୍ରମାଗତ ଭାବେ ବୃଦ୍ଧି ପାଉଛି। ୬ ରୁ ୧୪ ବର୍ଷ ବୟସର ଅଧିକ ଛାତ୍ରୀଛାତ୍ର ବିଦ୍ୟାଳୟରେ ଯୋଗ ଦେଇଛନ୍ତି। ନାମଲେଖା ହାର ୨୦୧୮ ରେ ୯୭.୨ ପ୍ରତିଶତରୁ ୨୦୨୨ ରେ ୯୮.୪ ପ୍ରତିଶତକୁ ବୃଦ୍ଧି ପାଇଛି। ସରକାରଙ୍କ ବେଟି ବଚାଓ-ବେଟି ପଢ଼ାଓ ଅଭିଯାନ ଯୋଗୁ ୧୧ ରୁ ୧୪ ବର୍ଷ ବୟସର ୯୮ ପ୍ରତିଶତ ବାଳିକାଙ୍କ ହାତରେ କଲମ ଏବଂ ବହି ଧରାଇ ଦିଆଯାଇଛି। ଏନଜିଓ ପ୍ରଥମ ଦ୍ୱାରା ପ୍ରକାଶିତ ବାର୍ଷିକ ସ୍ଥିତି ଶିକ୍ଷା ରିପୋର୍ଟ ଏଏସଇଆର-୨୦୨୦୨ରେ ଏହା ପ୍ରକାଶ ପାଇଛି ।
ଚାରି ବର୍ଷର ବ୍ୟବଧାନ ପରେ, ବିଶେଷଜ୍ଞ ଦଳ ୬୧୬ ଟି ଗ୍ରାମାଞ୍ଚଳର ୧୯,୦୬୦ ଟି ଗାଁର ୩,୭୪,୫୪୪ ପରିବାର ପରିଦର୍ଶନ କରି ୬,୯୯,୫୯୭ ପିଲାଙ୍କ ଉପରେ ସର୍ଭେ କରିଥିଲେ। ରିପୋର୍ଟ ଅନୁଯାୟୀ, ଗତ ୧୫ ବର୍ଷ ମଧ୍ୟରେ ୬ ରୁ ୧୪ ବର୍ଷ ବୟସର ପିଲାମାନଙ୍କ ନାମଲେଖା ହାର ୯୫ ପ୍ରତିଶତରୁ ଅଧିକ ରହିଛି।
ପ୍ରତ୍ୟେକ ରାଜ୍ୟ ବାଳିକାମାନଙ୍କୁ ଶିକ୍ଷା ସହ ଯୋଡିଛନ୍ତି। ସରକାରଙ୍କ ଉଦ୍ୟମ ଯୋଗୁଁ ବେଟି ବଚାଓ-ବେଟି ପଢ଼ାଓ ଅଭିଯାନ ସଫଳ ହୋଇଥିବା ଜଣାପଡିଛି। ୨୦୦୬ ରେ, ୧୧ରୁ ୧୪ ବର୍ଷ ବୟସର ୧୦.୩ ପ୍ରତିଶତ ବାଳିକା ସାରା ଦେଶରେ ବିଦ୍ୟାଳୟ ବାହାରେ ଥିଲେ। ତେବେ ୨୦୨୨ ମସିହାରେ, କେବଳ ଦୁଇ ପ୍ରତିଶତ ବାଳିକା ଶିକ୍ଷାଠାରୁ ଦୂରରେ ଅଛନ୍ତି।
୨୦୦୮ରେ, ୧୫ରୁ ୧୬ ବର୍ଷ ବୟସର ୨୦ ପ୍ରତିଶତ ବାଳିକା ବିଦ୍ୟାଳୟ ଛାଡିଥିଲେ। ସରକାରଙ୍କ ଉଦ୍ୟମ ଏବଂ ବିଭିନ୍ନ ଯୋଜନା ଯୋଗୁଁ ୨୦୨୨୨ ମସିହାରେ କେବଳ ୭.୯ ପ୍ରତିଶତ ବାଳିକା ବିଦ୍ୟାଳୟ ଛାଡିଛନ୍ତି।
ଗତ ସାତ ବର୍ଷ ମଧ୍ୟରେ ସରକାରୀ ବିଦ୍ୟାଳୟରେ ଗୁଣାତ୍ମକ ଶିକ୍ଷା ତଥା ସୁବିଧାଗୁଡ଼ିକର ଉନ୍ନତି ଯୋଗୁ ଘରୋଇ ବିଦ୍ୟାଳୟ ତୁଳାନାରେ ସରକାରୀ ବିଦ୍ୟାଳୟରେ ପିଲାଙ୍କ ସଂଖ୍ୟା ବୃଦ୍ଧି ପାଇଛି। ସମଗ୍ର ଦେଶରେ, ୬ ରୁ ୧୪ ବର୍ଷ ବୟସର ୭୨.୯ ପ୍ରତିଶତ ପିଲା ସରକାରୀ ବିଦ୍ୟାଳୟରେ ପଢୁଛନ୍ତି। ଏହାପୂର୍ବର ୨୦୦୬ ରୁ ୨୦୧୪ ପର୍ଯ୍ୟନ୍ତ ସରକାରୀ ବିଦ୍ୟାଳୟରେ ନାମ ଲେଖାଇଥିବା ପିଲାମାନଙ୍କ ଅନୁପାତରେ ଏକ ସ୍ଥିର ହ୍ରାସ ପରିଲକ୍ଷିତ ହୋଇଥିଲା।
ରିପୋର୍ଟ ଅନୁଯାୟୀ, ୩ରୁ୫ ବର୍ଷ ବୟସ ବର୍ଗରେ ଛୋଟ ପିଲାମାନଙ୍କର ନାମଲେଖାରେ କ୍ରମାଗତ ବୃଦ୍ଧି ଘଟିଛି। ଗ୍ରାମାଞ୍ଚଳରେ ତିନି ବର୍ଷର ୬୬.୮ ପ୍ରତିଶତ ଏବଂ ଚାରି ବର୍ଷର ୬୧.୨ ପ୍ରତିଶତ ପିଲା ଅଙ୍ଗନୱାଡି କେନ୍ଦ୍ରରେ ନାମ ଲେଖାଇଛନ୍ତି।
