ନୂଆଦିଲ୍ଲୀ,୨୬।୮: ଅଷ୍ଟମ ବେତନ କମିଶନ ଲାଗୁ କରିବା ପାଇଁ ରାଜ୍ୟ ସରକାର, ପ୍ରତିରକ୍ଷା ମନ୍ତ୍ରାଳୟ, ଗୃହ ମନ୍ତ୍ରାଳୟ ସହ ଆଲୋଚନା ଆରମ୍ଭ କରିଛନ୍ତି କେନ୍ଦ୍ର ସରକାର । କିନ୍ତୁ ୮ମ ବେତନ କମିଶନ ଲାଗୁ ହେବା ନେଇ ବଡ଼ ଅପଡେଟ ସାମ୍ନାକୁ ଆସିଛି । ୨୦୨୮ ମସିହା ଯାଏ ୮ମ ବେତନ କମିଶନ କାର୍ଯ୍ୟକାରୀ ନହୋଇପାରେ ବୋଲି କିଛି ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି ।
ତେବେ ୨୦୨୮ ପୂର୍ବର ଅଷ୍ଟମ ବେତନ ଆୟୋଗ ଲାକୁ ହେବା ନେଇ ଆଶଙ୍କା ଦେଖାଦେଇଛି । କେନ୍ଦ୍ର ସରକାର ଏହାକୁ ନେଇ ଆଲୋଚନା ଜାରି ରଖିଛନ୍ତି କିନ୍ତୁ କୌଣସି ଠୋସ୍ ପଦକ୍ଷେପ ନିଆଯାଇନଥିବା କୁହାଯାଉଛି । କେନ୍ଦ୍ରୀୟ କର୍ମଚାରୀ ଏବଂ ପେନସନଭୋଗୀ ଆଶା ରଖିଥିଲେ କି, ୨୦୨୬ ଜାନୁଆରୀ ୧ ତାରିଖରୁ ଦରମା ବୃଦ୍ଧି ପାଇବ । କିନ୍ତୁ ଏହା ହେବାର ସମ୍ଭାବନା ନାହିଁ । ବିଭିନ୍ନ କାରଣରୁ ଏବେ ଅଷ୍ଟମ ବେତନ କମିଶନ କାର୍ଯ୍ୟକାରୀ ହେବ ନାହିଁ ବୋଲି କୁହାଯାଉଛି । ଚଳିତ ବର୍ଷ ଜାନୁଆରୀ ମାସରେ ୮ମ ବେତନ ଲାଗୁ ହେବା ନେଇ ଘୋଷଣା କରାଯାଇଥିଲା । କିନ୍ତୁ ଏ ନେଇ ପ୍ରକ୍ରିୟା ଶେଷ ହୋଇନାହିଁ । ଦରମା ଓ ପେନସନରେ ସଂଶୋଧନ ହେବାକୁ ଥିବାରୁ ଏବଂ ଅନ୍ୟାନ୍ୟ କାରଣ ପାଇଁ ଏହା ବିଳମ୍ବ ହେବାରେ ଲାଗିଛି ।
ପୂର୍ବରୁ ୭ମ ବେତନ କମିଶନ ଘୋଷଣା ସମୟରେ ମଧ୍ୟ କାର୍ଯ୍ୟକାରୀ ହେବା ପାଇଁ ସମୟ ଲାଗିଥିଲା । ଘୋଷଣା ହେବାର ୩ ବର୍ଷ ପରେ କାର୍ଯ୍ୟକାରୀ ହୋଇଥିଲା ୭ମ ବେତନ କମିଶନ । ତେଣୁ ସେହି ହିସାବରେ ଦେଖିବାକୁ ଗଲେ ଜାନୁଆରୀ ମାସରେ ଘୋଷଣା ହୋଇଥିଲା ଅଷ୍ଟମ ବେତନ କମିଶନ କାର୍ଯ୍ୟକାରୀ ହେବା ପାଇଁ ସମୟ ଲାଗିବ । ୨୦୨୭ କିମ୍ବା ୨୦୨୮ ଆରମ୍ଭରୁ ୮ମ ବେତନ କମିଶନ କାର୍ଯ୍ୟକାରୀ ହୋଇପାରେ ।
