ଲସ୍ ଏଞ୍ଜେଲ୍ସ: ଆମେରିକାର କାଲିଫର୍ନିଆ ନିବାସୀ କାଇଲି ଗୋର୍ଡି(୩୨)ଙ୍କର ୮୭ ଜଣ ସନ୍ତାନସନ୍ତତି ରହିଛନ୍ତି। ବିଶ୍ୱର ବିଭିନ୍ନ କୋଣାନୁକୋଣରେ ତାଙ୍କର ପିଲାମାନେ ରହୁଛନ୍ତି। ଅଳ୍ପ କିଛିଦିନ ମଧ୍ୟରେ ସେ ୧୦୦ ସନ୍ତାନର ପିତା ହେବାକୁ ଯାଉଛନ୍ତି ବୋଲି କାଇଲି କହିଛନ୍ତି। ବର୍ତ୍ତମାନ ସୁଦ୍ଧା କେବଳ ୩ ଜଣକ ନଁାରେ ଉକ୍ତ ରେକର୍ଡ ରହିଛି।
ହେଉଛନ୍ତି ଜଣେ ଶୁକ୍ରାଣୁ ଦାତା। ସେ ନିଜ ଶୁକ୍ରାଣୁ ଦାନ କରି ସନ୍ତାନହୀନ ଦମ୍ପତିଙ୍କୁ ମାତାପିତା ହେବାକୁ ସାହାଯ୍ୟ କରିଥାନ୍ତି। ଏତେ ସଂଖ୍ୟକ ସନ୍ତାନ ପରେ, ଆହୁରି ସନ୍ତାନ ଜନ୍ମ କରିବେ କି ନାହିଁ ପଚରା ଯିବାରୁ କାଇଲି କହିଛନ୍ତି, ଏହା ତାଙ୍କ ପାଇଁ ଆରମ୍ଭ ମାତ୍ର। ସେ କେତେ ପିଲାଙ୍କ ବାପା ହେବାକୁ ଚାହୁଁଛନ୍ତି ସେ ନେଇ କୌଣସି ଲକ୍ଷ୍ୟ ସ୍ଥିର କରିନାହାନ୍ତି। ସେ ଶୁକ୍ରାଣୁ ଦାନ କରି ସନ୍ତାନହୀନ ଦମ୍ପତିଙ୍କୁ ସାହାଯ୍ୟ କରୁଛନ୍ତି। ତେଣୁ ଭବିଷ୍ୟତରେ ମଧ୍ୟ ସେ ଏହି କାର୍ଯ୍ୟ ଜାରି ରଖିବେ। ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି କାଇଲି ସନ୍ତାନହୀନ ଦମ୍ପତିମାନଙ୍କୁ ମାଗଣାରେ ନିଜ ଶୁକ୍ରାଣୁ ଦାନ କରନ୍ତି। ‘ୱି ପ୍ରେଗନେଣ୍ଟ ନାଓ’ ନାମରେ ତାଙ୍କର ଏକ ୱେବ୍ସାଇଟ୍ ରହିଛି, ଯେଉଁଠାରେ ଲୋକମାନେ ତାଙ୍କ ସହ ଶୁକ୍ରାଣୁ ପାଇଁ ଯୋଗାଯୋଗ କରନ୍ତି। କାଇଲି କହିଛନ୍ତି, ୨୦୨୫ରେ ତାଙ୍କର ୧୪ ସନ୍ତାନ ସ୍ବିଡେନ, ନରୱେ, ଇଂଲଣ୍ଡ ଏବଂ ସ୍କଟ୍ଲାଣ୍ଡରେ ଜନ୍ମ ହେବାକୁ ଯାଉଛନ୍ତି। ତାଙ୍କର ସବୁଠାରୁ ବଡ଼ ସନ୍ତାନର ବୟସ ଏବେ ୧୦ ବର୍ଷ ହୋଇଥିବା କାଇଲି କହିଛନ୍ତି।
ତେବେ ୮୭ ପିଲାଙ୍କ ବାପା କାଇଲି ସମ୍ପ୍ରତି ନିଜ ପାଇଁ ଜୀବନସାଥୀ ଖୋଜୁଛନ୍ତି। ଗତବର୍ଷ ସେ ଜଣେ ଯୁବତୀଙ୍କୁ ଭଲ ପାଉଥିଲେ। ତେବେ କିଛି ମାସର ସମ୍ପର୍କ ପରେ ଏହି ସମ୍ପର୍କରେ ପୂର୍ଣ୍ଣଚ୍ଛେଦ ପଡ଼ିଥିଲା। ଉକ୍ତ ସମ୍ପର୍କରେ ଥିବା ସମୟରେ କାଇଲି କିଛି ମାସ ପାଇଁ ଶୁକ୍ରାଣୁ ଦାନ କରିବା ବନ୍ଦ କରିଥିଲେ। ତେବେ ପରେ ସେ ପୁଣି ଏହି କାର୍ଯ୍ୟକୁ ଆରମ୍ଭ କରିଥିଲେ। ଏତେ ପିଲାଙ୍କ ବାପା ହୋଇ ସେ ସର୍ବଦା ଖୁସି ଅନୁଭବ କରିଥାନ୍ତି ବୋଲି କାଇଲି କହିଛନ୍ତି।
