ନୂଆଦିଲ୍ଲୀ,୨୮।୧୧: ତୁମ ମତରେ ସ୍ତ୍ରୀଙ୍କୁ ସ୍ବାମୀ ମାଡ଼ ମାରିବା ଉଚିତ କି? ଏହି ପ୍ରଶ୍ନର ଉତ୍ତର ପାଇଁ ୧୮ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ନେଇ ଜାତୀୟ ପରିବାର ସ୍ବାସ୍ଥ୍ୟ ସର୍ଭେ (ଏନ୍ଏଚ୍ଏଫ୍ଏସ୍) ପକ୍ଷରୁ ଏକ ସର୍ଭେ କରାଯାଇଥିଲା। ଏଥିରେ ୧୪ ରାଜ୍ୟର ୩୦ ପ୍ରତିଶତ ମହିଳା କିଛି ପରିସ୍ଥିତିରେ ସ୍ତ୍ରୀଙ୍କୁ ସ୍ବାମୀ ମାଡ଼ ମାରିବାକୁ ଉଚିତ ଦର୍ଶାଇଛନ୍ତି।
ଏହି ସର୍ଭେ ଅନୁଯାୟୀ, ୩ ରାଜ୍ୟର ପ୍ରାୟ ୮୦ ପ୍ରତିଶତ ମହିଳା ସ୍ବାମୀଙ୍କ ମାଡ଼କୁ ଉଚିତ ବୋଲି କହିଛନ୍ତି। ଏହି ୩ ରାଜ୍ୟ ହେଲା ତେଲେଙ୍ଗାନା (୮୪%), ଆନ୍ଧ୍ର ପ୍ରଦେଶ (୮୪%) ଓ କର୍ନାଟକ (୭୭%)। ଏହି ତାଲିକାରେ ମଣିପୁର (୬୬ %), କେରଳ (୫୨ %), ଜମ୍ମୁ-କଶ୍ମୀର (୪୯%), ମହାରାଷ୍ଟ୍ର (୪୪%) ଓ ପଶ୍ଚିମବଙ୍ଗ (୪୨%)ର ବଡ଼ ସଂଖ୍ୟାରେ ମହିଳାମାନେ ପୁରୁଷମାନେ ତାଙ୍କ ସ୍ତ୍ରୀଙ୍କୁ ମାଡ଼ ମାରିବାକ ଯଥାର୍ଥ ବୋଲି କହିଛନ୍ତି।
ଏନ୍ଏଫ୍ଏଚ୍ଏସ୍ ପକ୍ଷରୁ ପଚରାଯାଇଥିଲା, ତୁମ ମତରେ ସ୍ତ୍ରୀଙ୍କୁ ସ୍ବାମୀ ମାଡ଼ ମାରିବା ଉଚିତ କି? ୧୪ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳର ୩୦ ପ୍ରତିଶତ ମହିଳା ପ୍ରଶ୍ନର ଉତ୍ତରରେ ‘ହଁ’ କହିଛନ୍ତି।
ଉତ୍ତରଦାତାମାନେ ଦେଇଥିବା ସବୁଠୁ ସାଧାରଣ କାରଣ ହେଉଛି, ଘର କିମ୍ବା ପିଲାଙ୍କ ପ୍ରତି ମହିଳାଙ୍କ ଅବହେଳା ଏବଂ ଶାଶୁ ଘର ଲୋକଙ୍କୁ ଅସମ୍ମାନ ପ୍ରଦର୍ଶନ କରିବା। ୧୮ଟି ରାଜ୍ୟର ୧୩ ରାଜ୍ୟ (ହିମାଚଳ ପ୍ରଦେଶ, କେରଳ, ମଣିପୁର, ଗୁଜରାଟ, ନାଗାଲାଣ୍ଡ, ଗୋଆ, ବିହାର, କର୍ନାଟକ, ଆସାମ, ମହାରାଷ୍ଟ୍ର, ତେଲେଙ୍ଗାନା, ନାଗାଲାଣ୍ଡ ଓ ପଶ୍ଚିମବଙ୍ଗ)ର ମହିଳା ଶାଶୁ ଘର ଲୋକଙ୍କୁ ଅସମ୍ମାନିତ କରିବା ଏହା ପଛର ମୁଖ୍ୟ କାରଣ ବୋଲି ଦର୍ଶାଇଛନ୍ତି।
