ଆନନ୍ଦପୁର,୧୫।୫(ସ୍ବ.ପ୍ର.): ବିବାହର ୮ ମାସ ପରେ ବାଲେଶ୍ୱର ଜିଲା ଅଞ୍ଚଳର ଜଣେ ନାବାଳିକାଙ୍କୁ ସୋମବାର ଆନନ୍ଦପୁର ଥାନା କୋଡ଼ପଡ଼ାର ଗଉଡ଼ଡିହା ଅଞ୍ଚଳରୁ ଚାଇଲ୍ଡଲାଇନ ପକ୍ଷରୁ ଉଦ୍ଧାର କରାଯାଇଛି। ସୂଚନାଯୋଗ୍ୟ, ବାଲେଶ୍ୱର ଜିଲା ଖଇରା ଥାନା ଅଞ୍ଚଳର ଜଣେ ନାବାଳିକାଙ୍କୁ ଆନନ୍ଦପୁର ଥାନା କୋଡ଼ପଡ଼ାର ଗଉଡ଼ଡିହା ଅଞ୍ଚଳର ଅଜୟ ପାତ୍ର ଭଲ ପାଉଥିଲେ। ଏପରିକି ସେ ୮ ମାସ ତଳେ ନାବାଳିକାଙ୍କୁ କୌଶଳକ୍ରମେ ବିବାହ କରି ନେଇ ପଳାଇ ଆସିଥିଲା। ନାବାଳିକାଙ୍କ ପରିବାର ଲୋକଙ୍କ ଅଭିଯୋଗକ୍ରମେ ବାଲେଶ୍ୱର ଜିଲା ଖଇରା ଚାଇଲ୍ଡଲାଇନର ସହାୟତାରେ ନାବାଳିକାଙ୍କୁ ଉଦ୍ଧାର କରାଯାଇଛି। ଖଇରା ୟୁନିଟ୍ ଚାଇଲ୍ଡଲାଇନ୍ ଟିମ୍ ଲିଡର୍ ତପସ୍ବିନୀ ରାଉତଙ୍କ ନେତୃତ୍ୱରେ ଏକ ଟିମ୍ ଆନନ୍ଦପୁରରେ ପହଞ୍ଚି ଆନନ୍ଦପୁର ପୋଲିସ, ଆନନ୍ଦପୁର ଚାଇଲ୍ଡଲାଇନ ସହାୟତାରେ ତାଙ୍କୁ ଉଦ୍ଧାର କରିଥିଲା।
ଉଦ୍ଧାର ନାବାଳିକାଙ୍କୁ ଖଇରା ଚାଇଲ୍ଡଲାଇନକୁ ହସ୍ତାନ୍ତର କରାଯାଇଛି। ଖଇରା ଟିମ୍ ଲିଡର ନାବାଳିକାଙ୍କୁ ବାଲେଶ୍ୱର ଜିଲା ଶିଶୁ ମଙ୍ଗଳ ସମିତି ନିକଟରେ ହାଜର କରିବେ ବୋଲି ସୂଚନା ଦେଇଛନ୍ତି। ବିବାହର ୮ ମାସ ପରେ ଚାଇଲ୍ଡଲାଇନ୍ ନାବାଳିକାଙ୍କୁ ଉଦ୍ଧାର କରିଥିବା ବେଳେ ପୋଲିସର କାର୍ଯ୍ୟଦକ୍ଷତାକୁ ନେଇ ଅଞ୍ଚଳରେ ଆଲୋଚନା ହେଉଛି।
