ନୂଆଦିଲ୍ଲୀ: ରେଲଓ୍ବେ ଏହାର ୧୧.୫୮ ଲକ୍ଷ ଅଣ ଗେଜେଟେଡ କର୍ମଚାରୀଙ୍କୁ ବୋନସ ପ୍ରଦାନ କରିବ। ରେଲଓ୍ବେ କର୍ମଚାରୀମାନେ ୭୮ ଦିନର ବୋନସ ପାଇବେ ବୋଲି ଜଣାପଡିଛି। କର୍ମଚାରୀଙ୍କୁ ଉତ୍ପାଦକତା ସଂଯୋଗୀ ବୋନସ(ପିଏଲ୍ବି) ଭାବେ ରେଲଓ୍ବେ ୨୦୮୧.୬୮ କୋଟି ଟଙ୍କା ଖର୍ଚ୍ଚ କରିବ। ବୁଧବାର କେନ୍ଦ୍ର କ୍ୟାବିନେଟ ପକ୍ଷରୁ ଅଣଗେଜେଟେଡ କର୍ମଚାରୀଙ୍କୁ ବୋନସ ପ୍ରଦାନ ପ୍ରସ୍ତାବକୁ ମଞ୍ଜୁରୀ ପ୍ରଦାନ କରାଯାଇଥିଲା। ଏହି କର୍ମଚାରୀଙ୍କ ମଧ୍ୟରେ ଆର୍ପିଏଫ୍ ଏବଂ ଆର୍ପିଏସ୍ଏଫ୍ କର୍ମଚାରୀଙ୍କୁ ସାମିଲ କରାଯାଇନାହିଁ। ପାର୍ବଣ ଅବସରରେ ପ୍ରତିବର୍ଷ କର୍ମଚାରୀଙ୍କୁ ରେଲଓ୍ବେ ଏଭଳି ବୋନସ ଦେଇଥାଏ। ପାର୍ବଣ ଛୁଟି ପୂର୍ବରୁ ଏହି ନିଷ୍ପତ୍ତିକୁ ଲାଗୁ କରାଯିବାର ଯୋଜନା ରହିଛି। କର୍ମଚାରୀଙ୍କୁ ବିଭିନ୍ନ ପ୍ରୋତ୍ସାହନ ପ୍ରଦାନ ଦ୍ୱାରା ଖର୍ଚ୍ଚ ବଢାଇ ବଜାରରେ ଚାହିଦା ଫେରାଇ ଆଣିବା ଉପରେ ସରକାର ବିଭିନ୍ନ ପଦକ୍ଷେପ ନେଉଥିବା ଜଣାପଡିଛି। ଏହାକୁ ନେଇ ନିକଟରେ କେନ୍ଦ୍ର ଅର୍ଥ ମନ୍ତ୍ରୀ ନିର୍ମଳା ସୀତାରାମନ ବିଭିନ୍ନ ଯୋଜନା ସମ୍ପର୍କରେ ଘୋଷଣା କରିଥିଲେ।
