ନୂଆଦିଲ୍ଲୀ,୨୭ା୧୨:ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ସମ୍ମାନରେ ଦେଶରେ ୭ ଦିନିଆ ରାଷ୍ଟ୍ରୀୟ ଶୋକ ପାଳନ କରାଯିବ ବୋଲି କେନ୍ଦ୍ର ସରକାରଙ୍କ ପକ୍ଷରୁ ସୂଚନା ଦିଆଯାଇଛି। ମନମୋହନଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ଶୁକ୍ରବାର ପୂର୍ବାହ୍ନ ୧୧ଟାରେ କେନ୍ଦ୍ର କ୍ୟାବିନେଟ ବୈଠକ ବସିବ। ସମ୍ପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କ ଶେଷକୃତ୍ୟ ସମ୍ପନ୍ନ ହେବ। ଶୁକ୍ରବାର ଦିନ ସାରା ସରକାରୀ କାର୍ଯ୍ୟ ବନ୍ଦ ରହିବ ବୋଲି ସରକାରଙ୍କ ଜଣେ ଅଧିକାରୀ ପ୍ରକାଶ କରିଛନ୍ତି।
ନୂଆଦିଲ୍ଲୀସ୍ଥିତ ଏମ୍ସରେ ଗୁରୁବାର ରାତିରେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ପରଲୋକ ହୋଇଛି। ବୟସାଧିକ କାରଣରୁ ଅସୁସ୍ଥ ଥିବା ୯୨ ବର୍ଷୀୟ ମନମୋହନ ସନ୍ଧ୍ୟାରେ ହଠାତ୍ ସଜ୍ଞାହୀନ ହୋଇଯାଇଥିଲେ। ତାଙ୍କୁ ଗୁରୁତର ଅବସ୍ଥାରେ ଏମ୍ସର ଏମର୍ଜେନ୍ସି ବିଭାଗରେ ଭର୍ତ୍ତି କରାଯାଇଥିଲା। ଡାକ୍ତରୀ ଦଳର ତମାମ ଉଦ୍ୟମ ସତ୍ତ୍ୱେ ତାଙ୍କ ଜୀବନ ରକ୍ଷା କରାଯାଇପାରିଲା ନାହିଁ। ସେ ରାତି ୯ଟା ୧୫ ମିନିଟରେ ଶେଷନିଃଶ୍ୱାସ ତ୍ୟାଗ କରିଛନ୍ତି ବୋଲି ଏମ୍ସ ପକ୍ଷରୁ ଜାରି ଏକ ବିବୃତିରେ କୁହାଯାଇଛି। ମନମୋହନଙ୍କ ପରଲୋକରେ ଶୋକର ଛାୟା ଖେଳିଯାଇଛି। ରାଷ୍ଟ୍ରପତି ଦ୍ରୌପଦୀ ମୁର୍ମୁ, ଉପରାଷ୍ଟ୍ରପତି ଜଗଦୀପ ଧନକର, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ, ଲୋକ ସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଶୋକବ୍ୟକ୍ତ କରିଛନ୍ତି।
୧୯୩୨ ସେପ୍ଟେମ୍ବର ୨୬ରେ ତତ୍କାଳୀନ ପଞ୍ଜାବ ପ୍ରଦେଶ ଚକଓ୍ବାଲ ଜିଲା ଗାହ ଗ୍ରାମ(ଅଧୁନା ପାକିସ୍ତାନ)ର ଏକ ପଞ୍ଜାବୀ ପରିବାରରେ ମନମୋହନ ଜନ୍ମ ଗ୍ରହଣ କରିଥିଲେ। ତାଙ୍କ ବାପାଙ୍କ ନାମ ଗୁର୍ମୁଖ ସିଂ ଓ ମା’ ଅମୃତ କୌର। ପିଲାଟି ଦିନରୁ ମା’ଙ୍କୁ ହରାଇବା ପରେ ମନମୋହନଙ୍କୁ ତାଙ୍କ ଜେଜେମା’ ଲାଳନପାଳନ କରିଥିଲେ। ଦେଶ ବିଭାଜନ ପରେ ତାଙ୍କ ପରିବାର ଲୋକେ ଭାରତର ପଞ୍ଜାବସ୍ଥିତ ହଲ୍ଡଓ୍ବାନିକୁ ଚାଲିଆସିଥିଲେ। ୧୯୪୮ରେ ସେମାନେ ଅମୃତସରରେ ବସବାସ କରିଥିଲେ। ମନମୋହନ ଅମୃତସରର ହିନ୍ଦୁ କଲେଜ ଓ ହୋସିଆରପୁରସ୍ଥିତ ପଞ୍ଜାବ ବିଶ୍ୱବିଦ୍ୟାଳୟରେ ଉଚ୍ଚଶିକ୍ଷା ଲାଭ କରିଥିଲେ। ୧୯୫୨ରେ ଅର୍ଥନୀତିରେ ସ୍ନାତକ ଓ ୧୯୫୪ରେ ସ୍ନାତକୋତ୍ତର ଡିଗ୍ରୀ ହାସଲ କରିଥିଲେ। ଏହାପରେ ୧୯୫୭ରେ କ୍ୟାମ୍ବ୍ରିଜ୍ ବିଶ୍ୱବିଦ୍ୟାଳୟରେ ଅର୍ଥନୀତିରେ ଟ୍ରିପୋସ୍ ଡିଗ୍ରୀ ହାସଲ କରିଥିଲେ। ସେ ସେଣ୍ଟ ଜନ୍ସ କଲେଜର ଜଣେ ସଦସ୍ୟ ଥିଲେ। କ୍ୟାମ୍ବ୍ରିଜରେ ଶିକ୍ଷାଲାଭ ପରେ ସେ ଭାରତକୁ ଫେରି ପଞ୍ଜାବ ୟୁନିଭର୍ସିଟିରେ ଅଧ୍ୟାପନା କରିଥିଲେ। ୧୯୬୦ରେ ସେ ଅକ୍ସଫୋର୍ଡ ୟୁନିଭର୍ସିଟିରେ ଡି.ଫିଲ୍ କରିଥିଲ। ୧୯୬୨ରେ ମନମୋହନ ପିଏଚ୍ଡି. କରିଥିଲେ। ମନମୋହନ ୧୯୬୯ରୁ
୧୯୭୧ ପର୍ଯ୍ୟନ୍ତ ଦିଲ୍ଲୀ ବିଶ୍ୱବିଦ୍ୟାଳୟ ଅଧୀନ ଦିଲ୍ଲୀ ସ୍କୁଲ ଅଫ୍ ବିଜ୍ନେସ୍ରେ ଅର୍ଥନୀତି ବିଭାଗ ପ୍ରଫେସର ଦାୟିତ୍ୱ ତୁଲାଇଥିଲେ। ୧୯୭୨ରେ ଅର୍ଥ ମନ୍ତ୍ରଣାଳୟରେ ତାଙ୍କୁ ମୁଖ୍ୟ ଅର୍ଥନୈତିକ ପରାମର୍ଶଦାତା ନିଯୁକ୍ତ କରାଯାଇଥିଲା। ସେ ୧୯୭୬ରେ ଅର୍ଥ ମନ୍ତ୍ରଣାଳୟର ସଚିବ ଦାୟିତ୍ୱ ଗ୍ରହଣ କରିଥିଲେ। ୧୯୮୦ରୁ ୧୯୮୨ ପର୍ଯ୍ୟନ୍ତ ସେ ଯୋଜନା କମିଶନରେ କାର୍ଯ୍ୟ କରିବା ପରେ ତାଙ୍କୁ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ଗଭର୍ନର ନିଯୁକ୍ତ କରାଯାଇଥିଲା। ୧୯୮୫ରୁ ୧୯୮୭ ପର୍ଯ୍ୟନ୍ତ ସେ ସୁଇଜରଲାଣ୍ଡର ଜେନେଭାରେ ମୁଖ୍ୟାଳୟ ଥିବା ସାଉଥ୍ କମିଶନ ଜେନେରାଲ ସେକ୍ରେଟାରି ଭାବେ କାର୍ଯ୍ୟ କରିଥିଲେ। ୧୯୯୦ରେ ଭାରତକୁ ଫେରିବା ପରେ ତତ୍କାଳୀନ ପ୍ରଧାନମନ୍ତ୍ରୀ ଚନ୍ଦ୍ର ଶେଖରଙ୍କ ଅର୍ଥ ବ୍ୟାପାର ମୁଖ୍ୟ ପରାମର୍ଶଦାତା ଭାବେ ନିଯୁକ୍ତ କରାଯାଇଥିଲା। ୧୯୯୧ରେ ମନମୋହନ ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ୟୁଜିସି) ଅଧ୍ୟକ୍ଷ ହୋଇଥିଲେ।
