ନୂଆଦିଲ୍ଲୀ,୩୦।୧୧: ଦିଲ୍ଲୀ ଏବଂ ଏହାର ଆଖପାଖ ରାଜ୍ୟରେ କୃଷକଙ୍କ ଆନ୍ଦୋଳନ ଯୋଗୁ ଏକ ବର୍ଷ ମଧ୍ୟରେ ପ୍ରାୟ ୬୦ ହଜାର କୋଟି ମୂଲ୍ୟର କାରବାର କ୍ଷତି ହୋଇଛି। ଏହି ବ୍ୟବସାୟିକ କ୍ଷତି ମୁଖ୍ୟତଃ ୨୦୨୦ ନଭେମ୍ବର, ଡିସେମ୍ବର ଏବଂ ୨୦୨୧ ଜାନୁୟାରୀରେ କୃଷକଙ୍କ ଦ୍ୱାରା ରାଜପଥ ଅବରୋଧ ଯୋଗୁ ସାମଗ୍ରୀର ପରିବହନରେ ଅସୁବିଧା ପାଇଁ ଘଟିଛି। କନଫେଡେରେସନ ଅଫ ଅଲ ଇଣ୍ଡିଆ ଟ୍ରେଡର୍ସ ଏବଂ ଅଲ ଇଣ୍ଡିଆ ଟ୍ରାନ୍ସପୋର୍ଟ ୱେଲଫେୟାର ଆସୋସିଏଶନର ମିଳିତ ପ୍ରୟାସ ଦ୍ୱାରା ଫେବୃଆରୀ ୨୦ରୁ ଜୁଲାଇ ୨୦୨୧ ମଧ୍ୟରେ ସାମଗ୍ରୀର ପରିବହନ ଆରମ୍ଭ ହୋଇଥିଲା।
ପ୍ରତି ଦିନ ଦେଶର ବିଭିନ୍ନ ଅଞ୍ଚଳରୁ ୫୦ ହଜାର ଟ୍ରକ୍ ଦିଲ୍ଲୀ ଆସିଥାଏ। ସେହିପରି ୩୦ ହଜାର ଟ୍ରକ୍ ଦିଲ୍ଲୀରୁ ବିଭିନ୍ନ ସାମଗ୍ରୀ ନେଇ ବିଭିନ୍ନ ରାଜ୍ୟକୁ ଯାଇଥାଏ। ତେବେ କୃଷକ ଆନ୍ଦୋଳନ ଯୋଗୁ ଏସବୁ ସମ୍ଭବ ହୋଇ ପାରି ନ ଥିଲା। ବିଭିନ୍ନ ରାଜ୍ୟର କନଫେଡେରେସନ ଅଫ ଅଲ ଇଣ୍ଡିଆ ଟ୍ରେଡର୍ସ ଶାଖା ଦ୍ୱାରା ପ୍ରାପ୍ତ ତଥ୍ୟ ଆଧାରରେ ଏହି କ୍ଷୟକ୍ଷତିର ଆକଳନ କରାଯାଇଛି ।
କନଫେଡେରେସନ ଅଫ ଅଲ ଇଣ୍ଡିଆ ଟ୍ରେଡର୍ସର ଜାତୀୟ ସଭାପତି ବିସି ଭରତିଆ ଏବଂ ମହାସଚିବ ପ୍ରବୀଣ ଖଣ୍ଡେଲୱାଲ କହିଛନ୍ତି ଯେ କେନ୍ଦ୍ର ସରକାରଙ୍କ ଦ୍ୱାରା ତିନି କୃଷି ବିଲ ପ୍ରତ୍ୟାହାର ପରେ ଚାଷୀଙ୍କ ଆନ୍ଦୋଳନ ଜାରି ରଖିବାର କୌଣସି ଯଥାର୍ଥତା ନାହିଁ।
