କେସିଙ୍ଗା,୨୯।୫(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକର ୨୬ଟି ଗ୍ରାମ ପଞ୍ଚାୟତର ହିତାଧିକାରୀଙ୍କୁ ୨ ମାସ(ଏପ୍ରିଲ, ମେ) ହେଲା ବ୍ୟାଙ୍କ ଆକାଉଣ୍ଟରେ ଭତ୍ତା (ଡିବିଟି) ମିଳିନାହିଁ । ଯାହା ଫଳରେ ଡିବିଟି ଭତ୍ତା ଟଙ୍କା ପାଉଥିବା ଗରିବ ଶ୍ରେଣୀର ହିତାଧିକାରୀଙ୍କ ମନରେ ତୀବ୍ର ଅସନ୍ତୋଷ ଦେଖାଦେଇଛି। ଗତ ଏପ୍ରିଲ ମାସରେ ମିଳି ନ ଥିଲା। ରାଜ୍ୟ ସରକାରଙ୍କ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ (ଚିଠି ନ.୪୫୪୪/୨୮.୪.୨୦୨୬) ଅନୁସାରେ ଏନ.ଏସ.ଏ.ପି. ପେନସନ ଯୋଜନା ଅଧୀନରେ ଥିବା ହିତାଧିକାରୀଙ୍କ ଅଗତି ନିମନ୍ତେ ଜଣାଇଥିଲେ।
କେନ୍ଦ୍ର ସରକାର ଚଳିତ ଆର୍ଥିକ ବର୍ଷ ଏପ୍ରିଲ ମାସରୁ ଡିବିଟି ପ୍ରକ୍ରିୟା ସଂଶୋଧନ କରିଛନ୍ତି। ଏଣୁ ଜାତୀୟ ସାମାଜିକ ସହାୟତା ଏପ୍ରିଲ ମାସରେ ପ୍ରଦାନ କରିବାକୁ ମନା କରିଛନ୍ତି। ଏପ୍ରିଲ ଓ ମେ ମାସର ଭତ୍ତାକୁ ଏକକାଳୀନ ପ୍ରଦାନ କରାଯିବ ବୋଲି ରାଜ୍ୟ ସରକାରଙ୍କ ଡାଇରେକ୍ଟର ଏକ ବିଜ୍ଞପ୍ତି ମାଧ୍ୟମରେ ହିତାଧିକାରୀଙ୍କୁ ଜଣାଇ ଥିବା ଜଣାପଡ଼ିଛି। କିନ୍ତୁ ବିଜେଡି ସରକାରଙ୍କ ଶାସନ କାଳରେ ପ୍ରତ୍ୟେକ ମାସର ୬ ତାରିଖରେ ବୃଦ୍ଧାବୃଦ୍ଧଙ୍କ ଡିବିଟି ଟଙ୍କା ବ୍ୟାଙ୍କରେ ପଡୁଥିଲା। କିନ୍ତୁ ଭାଜପା ସରକାର ଆସିଲା ଦିନ ଠାରୁ ପ୍ରତ୍ୟେକ ମାସରେ ଠିକ ଭାବେ ଭତ୍ତା ଦିଆ ଯାଉ ନ ଥିବାରୁ ହିତାଧିକାରୀଙ୍କ ମନରେ ଅସନ୍ତୋଷ ଦେଖାଦେଉଛି । ଗରିବ ହିତାଧିକାରୀ ଏହି ଭତ୍ତା ଉପରେ ନିର୍ଭର କରି ମାସ ଯାଏ ଚଳିଥାଆନ୍ତି। କିନ୍ତୁ କେସିଙ୍ଗା ବ୍ଲକର ପ୍ରାୟ ୬ ହଜାର ହିତାଧିକାରୀ ଏହି ଭତ୍ତା,ଦୁଇ ମାସ ହେଲା ବ୍ଲକର ୨୬ଟି ଗ୍ରାମପଞ୍ଚାୟତରେ ଥିବା ୬ହାଜର ହିତାଧିକାରୀଙ୍କୁ ଭତ୍ତା ଦିଆଯାଇ ନ ଥିବାରୁ ବହୁତ କଷ୍ଟରେ ଜୀବନଯାପନ କରୁଛନ୍ତି।
ପ୍ରାୟ ୪୫ ଡିଗ୍ରୀ ସେଲସିୟସ ତାପମାତ୍ରାରେ ବୃଦ୍ଧାବୃଦ୍ଧମାନେ ବ୍ଲକ କାର୍ଯ୍ୟାଳୟ, ଗ୍ରାମ ପଞ୍ଚାୟତକୁ ଦୌଡ଼ି ଦୌଡି ନିରାଶରେ ଘରକୁ ଫେରୁଛନ୍ତି। ଡିବିଟିରେ ଭତ୍ତା ମିଳୁ ନ ଥିବା ପ୍ରାୟ ୬ ହଜାର ହିତାଧିକାରୀ ଦୁଇ ମାସ ହେଲା ବହୁ କଷ୍ଟରେ ଜୀବନଯାପନ କରୁଛନ୍ତି। ଏ ସଂକ୍ରାନ୍ତରେ ଭର୍ତ୍ତା ବିଭାଗ ଅଫିସର ରାକେଶ ବାବୁଙ୍କ ପଚାରିବାରୁ ଆଜି ନ ହେଲେ କାଲି ଦିଆଯିବ ବୋଲି ପ୍ରକାଶ କରିଥିଲେ।
Dharitri – Odisha’s No.1 Odia Daily
