ଚେନ୍ନାଇ,୧୬।୧ : ମକର ସଂକ୍ରାନ୍ତି ପର୍ବ ସହିତ ଜଲ୍ଲିକଟ୍ଟୁ ମଧ୍ୟ ତାମିଲନାଡୁରେ ଆରମ୍ଭ ହୋଇଛିନ। ଏ ସମ୍ପର୍କରେ ପ୍ରଶାସନକୁ ମଧ୍ୟ ସତର୍କ କରାଯାଇଛି। ଏହି ଖେଳରେ ରବିବାର ମଦୁରାଇର ଆଭାନିୟାପୁରମ ଅଞ୍ଚଳରେ ପ୍ରାୟ ୬୦ ଜଣ ଆହତ ହୋଇଛନ୍ତି । ଏହି ଖେଳ ପୋଙ୍ଗଲରୁ ଆରମ୍ଭ ହୋଇ ଆସନ୍ତା ୪ ଦିନ ପର୍ଯ୍ୟନ୍ତ ଚାଲିବ। ୨୦ ଜଣ ଗୁରୁତର ଆହତଙ୍କୁ ଚିକିତ୍ସା ଲାଗି ରାଜାଜୀ ଡାକ୍ତରଖାନାରେ ଭର୍ତ୍ତି କରାଯାଇଛି।
ମଦୁରାଇ ଜିଲାପାଳ ଅନିଶ ଶେଖର କହିଛନ୍ତି ଯେ ସମସ୍ତ ଆହତଙ୍କୁ ପ୍ରାଥମିକ ଚିକିତ୍ସା ପରେ ଘରକୁ ପଠାଯାଇଛି। ଏହି ଘଟଣାରେ ଏପର୍ଯ୍ୟନ୍ତ କୌଣସି ମୃତ୍ୟୁ ଖବର ମିଳି ନାହିଁ।
ପାଲାମେଡୁ ଅଞ୍ଚଳରେ ଜଲ୍ଲିକଟ୍ଟୁ ଖେଳର ସ୍ଥିତି ସମ୍ପର୍କରେ ଜିଲାପାଳ ସୂଚନା ଦେଇଛନ୍ତି ଯେ ସମସ୍ତ ଆବଶ୍ୟକୀୟ ବ୍ୟବସ୍ଥା କରାଯାଇଛି। ବିଭିନ୍ନ ସ୍ଥାନରେ ବ୍ୟାରିକେଡ ଲଗାଇ, ଜଲ୍ଲିକଟ୍ଟୁରେ ଷଣ୍ଢ ଏବଂ କ୍ରୀଡ଼ାରେ ଅଂଶଗ୍ରହଣ କରୁଥିବା ସମସ୍ତ ଲୋକ ସୁରକ୍ଷିତ ଅଛନ୍ତି ବୋଲି ନିଶ୍ଚିତ କରାଯାଇଛି। ଏହା ସହିତ ଦର୍ଶକଙ୍କ ସୁରକ୍ଷା ଉପରେ ମଧ୍ୟ ଧ୍ୟାନ ଦିଆଯାଇଛି। ବିଭିନ୍ନ ସ୍ଥାନରେ ପ୍ରାୟ ୨୦୦୦ ପୋଲିସ କର୍ମଚାରୀ ନିୟୋଜିତ ହୋଇଛନ୍ତି।
ଜିଲାପାଳ କହିଛନ୍ତି ଯେ ଆମେ ଆଶା କରୁଛୁ ଯେ କେହି ଆହତ ହେବେ ନାହିଁ କିନ୍ତୁ ଯଦି କେହି ଆହତ ହୁଅନ୍ତି ତେବେ ତାଙ୍କ ଚିକିତ୍ସା ପାଇଁ ସମ୍ପୂର୍ଣ୍ଣ ବ୍ୟବସ୍ଥା କରାଯାଇଛି। ଅନିଶ ଶେଖର କହିଛନ୍ତି ଯେ ଆମେ ଆଶା କରୁଛୁ ଯେ ସବୁକିଛି ଠିକ ଭାବରେ ହେବ।
ତାମିଲନାଡୁର ଗ୍ରାମାଞ୍ଚଳରେ ଜଲ୍ଲିକଟ୍ଟୁ ଏକ ପାରମ୍ପାରିକ ଖେଳ, ଯେଉଁଥିରେ ଷଣ୍ଢ ମଣିଷ ଲଢ଼େଇ ହୋଇଥାଏ। ଜଲ୍ଲିକଟ୍ଟୁକୁ ତାମିଲନାଡୁର ଗର୍ବ ଏବଂ ସଂସ୍କୃତିର ପ୍ରତୀକ ଭାବରେ ବିବେଚନା କରାଯାଏ। ତେବେ ଏହି ଖେଳରେ ଅନେକ ଥର ଲୋକମାନେ ଗୁରୁତର ଆହତ ହୋଇଥାନ୍ତି। ଏଭଳି ପରିସ୍ଥିତିରେ ଜଲ୍ଲିକଟ୍ଟୁ ଆୟୋଜନ ପାଇଁ ସୁପ୍ରିମକୋର୍ଟ ନିର୍ଦ୍ଦେଶନାମା ଜାରି କରିଥିଲେ। ତେବେ ସମସ୍ତ ବ୍ୟବସ୍ଥା ସତ୍ତ୍ୱେ ଜଲ୍ଲିକଟ୍ଟୁ ସମୟରେ ବହୁ ଲୋକ ଆହତ ହେଉଛନ୍ତି।
