ଭୁବନେଶ୍ୱର, ୨୧।୭(ବ୍ୟୁରୋ): ରାଜ୍ୟରେ କରୋନା ଆକ୍ରାନ୍ତ ଓ ମୃତକଙ୍କ ସଂଖ୍ୟା ଦୃତ ଗତିରେ ବୃଦ୍ଧି ପାଇବାରେ ଲାଗିଛି। ମଙ୍ଗଳବାର ରାଜ୍ୟରେ ୬୪୭ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୬ଜଣଙ୍କ ମୃତ୍ୟୁ ଘଟିଛି। ଏହାକୁ ମିଶାଇ ରାଜ୍ୟରେ କରୋନା ଜନିତ ମୃତ୍ୟୁ ସଂଖ୍ୟା ୧୦୩କୁ ବୃଦ୍ଧି ପାଇଛି। ଏ ନେଇ ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଟୁଇଟ୍କରି ସୂଚନା ଦିଆଯାଇଛି।
କରୋନା ଯୋଗୁ ପ୍ରାଣ ହରାଇଥିବା ନୂଆ ୬ଜଣଙ୍କ ମଧ୍ୟରେ ୫ ବୃଦ୍ଧ ଥିବା ବେଳେ ଜଣେ ଯୁବତର ରହିଛନ୍ତି। ମୃତକମାନେ କେନ୍ଦ୍ରାପଡ଼ା, ଗଜପତି, ଖୋର୍ଦ୍ଧା, ରାୟଗଡ଼ା, ଜଗତ୍ସିଂହପୁର ଜିଲାର ହୋଇଥିବା ବେଳେ କଟକର ଜଣେ ଯୁବତୀ ଅଛନ୍ତି।
କନ୍ଦ୍ରୋପଡ଼ାର ମୃତକ ଜଣଙ୍କ ୬୩ ବର୍ଷୀୟ ବୃଦ୍ଧ ହୋଇଥିବା ବେଳେ ସେ ପୂର୍ବରୁ ଡାଇବେଟିସ ସମେତ ଅନ୍ୟାନ୍ୟ ରୋଗରେ ପୀଡିତ ଥିଲେ। ଗଜପତିର ମୃତକଜଣଙ୍କ ୬୮ ବର୍ଷୀୟ ବୃଦ୍ଧ। ସେ ଡାଇବେଟିସ ସମେତ ଅନ୍ୟ ରୋଗରେ ମଧ୍ୟ ଆକ୍ରାନ୍ତ ଥିଲେ। ସେହିପରି ଜଗତ୍ସିଂହପୁରର ମୃତକ ୫୮ ବର୍ଷୀୟ ବୃଦ୍ଧ। ସେ ପୂର୍ବରୁ କ୍ୟାନ୍ସରେ ଆକ୍ରାନ୍ତ ଥିଲେ। ଖୋର୍ଦ୍ଧାର ମୃତକ ଜଣଙ୍କ ୭୫ ବର୍ଷୀୟ ବୃଦ୍ଧ ହୋଇଥିବା ବେଳେ ସେ ମଧ୍ୟ ଅନ୍ୟାନ୍ୟ ରୋଗରେ ପୀଡିତ ଥିଲେ। ରାୟଗଡ଼ାର ମୃତକ ୭୪ ବର୍ଷୀୟ ହୋଇଥିବା ବେଳେ ସେ ଅନ୍ୟ ରୋଗରେ ଆକ୍ରାନ୍ତ ଥିଲେ। ସେହିପରି କଟକର ମୃତକ ଜଣଙ୍କ ୨୬ ବର୍ଷୀୟା ମହିଳା ହୋଇଥିବା ବେଳେ ସେ ପୂର୍ବରୁ ଡାଇବେଟିସ ସମେତ ଅନ୍ୟ ରୋଗରେ ପୀଡିତ ଥିଲେ।