ନବରଙ୍ଗପୁର,୧୧।୪(ବି.ପ୍ର.)ନବରଙ୍ଗପୁର ଜିଲାରେ ୨୦୧୯ରୁ ୨୦୨୩ ମଧ୍ୟରେ ବଜ୍ରପାତରେ ୫୬ ଜଣଙ୍କ ମୃତ୍ୟୁ ହୋଇଥିବାବେଳେ ୧୭ ଜଣ ଆହତ ହୋଇଛନ୍ତି ବୋଲି ଜିଲାପାଳ କମଳ ଲୋଚନ ମିଶ୍ର ଅଶୋକ ମେହେଟ୍ଟା ସମ୍ମିଳନୀ କକ୍ଷରେ ଆୟୋଜିତ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ବଜ୍ରପାତରୁ ରକ୍ଷା ପାଇବାକୁ ହେଲେ ସଚେତନତା ଆବଶ୍ୟକ ବୋଲି ସେ କହିଛନ୍ତି।
ନବରଙ୍ଗପୁର ଜିଲାରେ ୨୦୧୯ରେ ୬ ହଜାର ୪୪୮, ୨୦୨୦ରେ ୧୬ ହଜାର ୯୫୭, ୨୦୨୧ରେ ୧୨ ହଜାର ୭୫୨ ଓ ୨୦୨୨ରେ ୧୦ ହଜାର ୨୧୫ଥର ବିଜୁଳି ଓ ଘଡ଼ଘଡ଼ି ହୋଇଥିବା ବୈଜ୍ଞାନିକ ସର୍ବେକ୍ଷଣରୁ ଜଣାପଡ଼ିଛି। ଓଡ଼ିଶାରେ ପ୍ରାୟ ୭ ଲକ୍ଷ ଥର ବିଜୁଳି ଘଡ଼ଘଡ଼ି ହୋଇଥିବା ଆକଳନ କରାଯାଇଛି। ତେବେ ଜନସାଧାରଣଙ୍କ ଅବଗତି ଓ ସଚେତନତା ପାଇଁ ବିଭିନ୍ନ ଛକ ଓ ଜନଗହଳିପୂର୍ଣ୍ଣ ସ୍ଥାନରେ ବୋର୍ଡ ଲଗାଯିବ ବୋଲି ଜିଲାପାଳ କହିଛନ୍ତି। ବିଜୁଳି ଓ ଘଡ଼ଘଡ଼ି ସମୟରେ ଘର ଭିତରେ ଥିବା ବ୍ୟକ୍ତି ବିଶେଷ ଓଦା ସ୍ଥାନରେ ଠିଆ ହେବେନାହିଁ କି କାନ୍ଥକୁ ଲାଗି ବସିବେ ନାହିଁ। ଇଲେକ୍ଟ୍ରି ବୋର୍ଡ ନିକଟରୁ ଦୂରେଇ ରହିବେ ଓ ମୋବାଇଲ ଆଦି ବ୍ୟବହାର ନ କରିବା ଅତି ଭଲ ବୋଲି କହିଥିଲେ। ସେହିଭଳି ବାହାରେ ଥିବା ଲୋକମାନେ ଗଛତଳେ କିମ୍ବା ବିଦ୍ୟୁତ୍ ଖୁଣ୍ଟ ତଳେ ରହିବେ ନାହିଁ। ଖୋଲାସ୍ଥାନରେ ରହିଲେ ସୁରକ୍ଷା ପାଇଁ ଗୋଇଠି ଯୋଡ଼ି ମୁଣ୍ଡ ତଳକୁ କରି ଦୁଇହାତ କାନ ଉପରେ ଚାପି ମୁଣ୍ଡ ନୁଆଇଁ ବସିଲେ ବିପଦକୁ ଏଡ଼ାଯାଇପାରିବ ବୋଲି ସେ କହିଥିଲେ। ବଜ୍ରପାତରୁ ରକ୍ଷା ଓ ପ୍ରାକୃତିକ ବିପର୍ଯ୍ୟୟ ସମ୍ପର୍କିତ ସଚେତନତା ପାଇଁ ସମସ୍ତ ବିଦ୍ୟାଳୟରେ ସପ୍ତାହର ଗୋଟିଏ କ୍ଲାସ୍ ଦିଆଯିବାକୁ ନିବେଦନ କରାଯାଇଛି। ବିଜୁଳି ଓ ଘଡ଼ଘଡ଼ିରୁ କିଭଳି ରକ୍ଷାପାଇବା ସେନେଇ ଜନସାଧାରଣଙ୍କୁ ସଚେତନ କରାଯିବା ବ୍ୟବସ୍ଥା ଗ୍ରହଣ କରାଯାଇଛି ବୋଲି ଜିଲାପାଳ କହିଛନ୍ତି। ସତର୍କ ଆପ୍ ମାଧ୍ୟମରେ ବିଜୁଳି ଓ ଘଡ଼ଘଡ଼ି ସମ୍ପର୍କରେ ଜାଣିହେବ ବୋଲି ଜିଲାପାଳ କହିଛନ୍ତି।
