ମୁମ୍ବାଇ: କରୋନା ମହାମାରୀ ଲାଗି ସାରା ବିଶ୍ୱର ବିମାନ ଚଳାଚଳ କ୍ଷେତ୍ରରେ ପ୍ରାୟ ୫୦ ଲକ୍ଷ ନିଯୁକ୍ତି ବିପଦରେ ରହିଛି। ଏହି କ୍ଷେତ୍ରର ସମସ୍ୟାକୁ ସମାଧାନ କରିବା ଲାଗି ସରକାରୀ ସ୍ତରରେ ନୀତିଗତ ପଦକ୍ଷେପ ନେବାର ଆବଶ୍ୟକତା ରହିଥିବା ଇଣ୍ଟରନ୍ୟାଶନାଲ ଏୟାର ଟ୍ରାନ୍ସପୋର୍ଟ ଆସୋସିଏଶନ(ଆଇଏଟିଏ) ଏବଂ ଇଣ୍ଟରନ୍ୟାଶନାଲ ଟ୍ରାନ୍ସପୋର୍ଟ ଓ୍ବାର୍କର୍ସ ଫେଡେରେଶନ(ଆଇଟିଏଫ୍) ପକ୍ଷରୁ ସୂଚନା ଦିଆଯାଇଛି। ଚଳିତ ବର୍ଷ ବିମାନ ଚଳାଚଳ ଚାହିଦା ଖସିଛି। ୨୦୧୯ ଅଗଷ୍ଟ ତୁଳନାରେ ଚଳିତ ବର୍ଷ ସମାନ ସମୟରେ ଏହା ପ୍ରାୟ ୭୫% ହ୍ରାସ ପାଇଛି। ବେସାମରିକ ବିମାନ ଚଳାଚଳ କ୍ଷେତ୍ରକୁ ଆର୍ଥତ୍କ ସହାୟତା, ବିଭିନ୍ନ ଦେଶର ସୀମାକୁ ସୁରକ୍ଷିତ ଭାବେ ବିମାନ ସେବା ଲାଗି ଖୋଲିବା ଏବଂ ସାରା ବିଶ୍ୱରେ ଏଥିଲାଗି ଏକ ଷ୍ଟାଣ୍ଡାର୍ଡ ପ୍ରାକ୍ଟିସ ଗ୍ରହଣ କରିବା ଉପରେ ରିପୋର୍ଟରେ ଉଲ୍ଲେଖ କରାଯାଇଛି। କମ୍ପାନୀଗୁଡିକରେ ନଗଦ ସମସ୍ୟା ଉପୁଜିଥିବାରୁ ଖର୍ଚ୍ଚ କମାଯାଇଛି। ଅପରପକ୍ଷରେ କିଛି କିଛି କମ୍ପାନୀ କର୍ମଚାରୀ ଛଟେଇ କରିଥିବା ଜଣାପଡ଼ିଛି। ଏହି କ୍ଷେତ୍ରର ସମସ୍ୟାକୁ ନଜରରେ ରଖି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ସଂଘଗୁଡିକ ନିବେଦନ କରିଛନ୍ତି।
