ନୂଆଦିଲ୍ଲୀ,୨୭।୧୧: ବର୍ଡର-ଗାଭାସ୍କର ଟ୍ରଫିର ଦ୍ୱିତୀୟ ମ୍ୟାଚ୍ ଆଡିଲେଡ୍ରେ ଖେଳାଯିବ। ଏହା ଏକ ଦିବାରାତ୍ର ମ୍ୟାଚ୍ ରହିବ। ଡିସେମ୍ବର ୬ରୁ ଏହି ମୁକାବିଲା ଆରମ୍ଭ ହେବ। ଏମିତିରେ ଦଳର ଏକାଦଶରେ ସେତେଟା ପରିବର୍ତ୍ତନ ଦେଖାଯାଇ ନ ପାରେ ବୋଲି କୁହାଯାଉଛି। ହେଲେ ଅତି କମ୍ରେ ୫ ଖେଳାଳି ଏହି ମ୍ୟାଚ୍ରେ ସ୍ବତନ୍ତ୍ର ଡେବ୍ୟୁ କରିବେ।
ଏହି ମ୍ୟାଚ୍ରେ ଅଧିନାୟକ ରୋହିତ ଶର୍ମା ଖେଳିବା ନିଶ୍ଚିତ ବୋଲି କୁହାଯାଉଛି। ବ୍ୟକ୍ତିଗତ କାରଣରୁ ସେ ପ୍ରଥମ ମ୍ୟାଚ୍ ଖେଳିପାରି ନ ଥିଲେ। ଶୁଭମନ ଗିଲ ଆହତ କାରଣରୁ ପର୍ଥ ଟେଷ୍ଟ ଖେଳିପାରି ନ ଥିଲେ। ହେଲେ ସେ ଆଡିଲେଡ୍ ମ୍ୟାଚ୍ ଖେଳିପାରନ୍ତି। ଏମିତିରେ ରୋହିତ-ଗିଲଙ୍କ ଯୋଗୁ ବ୍ୟାଟିଂ ଅର୍ଡରରେ ପରିବର୍ତ୍ତନ ଦେଖିବାକୁ ମିଳିପାରେ। ଫଳରେ ଅନ୍ୟ ଦୁଇ ଖେଳାଳି ବାଦ୍ ପଡ଼ିପାରନ୍ତି।
ଯଦି ଟିମ୍ ଇଣ୍ଡିଆର ଏକାଦଶରେ ୨ରୁ ଅଧିକ ପରିବର୍ତ୍ତନ ନ ହୁଏ ତେବେ ଅତି କମ୍ରେ ୫ ଖେଳାଳି ପିଙ୍କ ବଲ୍ ଟେଷ୍ଟରେ ଡେବ୍ୟୁ ହେବ। ଅର୍ଥାତ ଏହି ଖେଳାଳି ଭାରତ ପାଇଁ ପ୍ରଥମ ଥର ଡେ-ନାଇଟ୍ ମ୍ୟାଚ୍ ଖେଳିବେ। ଏହି ଖେଳାଳି ହେଲେ ଯଶସ୍ବୀ ଜୈସଓ୍ବାଲ, କେ ଏଲ୍ ରାହୁଲ, ନୀତୀଶ କୁମାର ରେଡ୍ଡି, ମହମ୍ମଦ ସିରାଜ ଏବଂ ହର୍ଷିତ ରାଣା। ଏସବୁ ଖେଳାଳି ପର୍ଥ ଟେଷ୍ଟରେ ଭଲ ପ୍ରଦର୍ଶନ କରିଥିଲେ, ଏଥିଲାଗି ଆଡିଲେଡ୍ ଟେଷ୍ଟରେ ଖେଳିବାକୁ ବଡ଼ ଦାବିଦାର।
ଟିମ୍ ଇଣ୍ଡିଆ କ୍ରିକେଟ ଇତିହାସରେ ଏଯାବତ ୪ ପିଙ୍କ ବଲ୍ ଟେଷ୍ଟ ମ୍ୟାଚ୍ ଖେଳିଛି। ଏଥିରେ ଭାରତୀୟ ଟିମ୍ ୩ ମ୍ୟାଚ୍ରେ ବାଜିମାତ କରିଥିବା ବେଳେ ୧ ମ୍ୟାଚ୍ରେ ପରାଜିତ ହେବାକୁ ପଡ଼ିଛି। ଏହି ପରାଜୟ ଅଷ୍ଟ୍ରେଲିଆ ବିପକ୍ଷରେ ଥିଲା। ଅପରପକ୍ଷେ ଅଷ୍ଟ୍ରେଲିଆ ଏଯାବତ ୧୨ ପିଙ୍କ ବଲ୍ ଟେଷ୍ଟ ମ୍ୟାଚ୍ ଖେଳିଛି। ଏଥିରୁ ୧୧ଟିରେ ଅଷ୍ଟ୍ରେଲିଆ ଜିତିଛି।
