ଉଦୟପୁର, ୧୭।୬: ରାଜସ୍ଥାନର ମାଲୱା ଅନ୍ତର୍ଗତ ଚୋରାଗ୍ରାମ ନିକଟରେ ସୋମବାର ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘିଟିଛି । ପିଣ୍ଡୱାଡ଼ା ରୋଡ଼ର ଡିଭାଇଡର ଉପରେ ଚାଲି ଚାଲି ଯାଉଥିବା ୬ ଜଣ ଲୋକଙ୍କ ଉପରେ ଏକ ଡମ୍ଫର ଚଢ଼ି ଯାଇଛି । ଫଳରେ ଦୁର୍ଘଟଣା ସ୍ଥଳରେ ୫ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି । ଆହତ ଯୁବକଙ୍କୁ ଉଦୟପୁରର ମହାରାଣା ଭୁପାଲ ଡାକ୍ତରଖାନାରେ ଭର୍ତ୍ତି କରାଯାଇଛି ।
ଉଦୟପୁର ଏସ୍ପି ଯୋଗେସ ଗୋୟଲଙ୍କୁ ସୂଚନା ମିଳିବା ପରେ ସେ ଘଟଣାସ୍ଥଳରେ ପହଞ୍ଚିଥିଲେ । ସ୍ଥାନୀୟ ପୋଲିସ ଅନୁସାରେ ଦିନ ୧୧ଟା ସମୟରେ ଦ୍ରୁତଗତିରେ ଯାଉଥିବା ଏକ ଡମ୍ଫର ନିୟନ୍ତ୍ରଣ ହରାଇ ଡିଭାଇଡର ଉପରେ ଚଢ଼ି ଯାଇଥିଲା । ମୃତକ ଏବଂ ଆହତ ସ୍ଥାନୀୟ ଅଞ୍ଚଳର ହୋଇଥିବା ଜଣାପଡ଼ିଛି ।
ସୂଚନା ଥାଉକି, ରବିବାର ଏହି ରାସ୍ତାରେ ମଧ୍ୟ ଏକ ଦୁର୍ଘଟଣା ହୋଇଥିଲା । ଏକ କାର ଓଲଟିବା ହେତୁ ଏଥିରେ ଥିବା ଗୁଜୁରାଟର ୫ ଜଣ ମହିଳା ଗୁରୁତର ଆହତ ହୋଇଥିଲେ ।
