ଇସଲାମାବାଦ,୧୧।୨ : ପାକିସ୍ତାନ ସବୁଠାରୁ ବଡ ସଙ୍କଟ ଦେଇ ଗତି କରୁଛି। ପାକିସ୍ତାନର ଆର୍ଥିକ ଅବସ୍ଥା ଅତ୍ୟନ୍ତ ଖରାପ ଏବଂ ବର୍ତ୍ତମାନ ପରିସ୍ଥିତି ଏପରି ହୋଇଛି ଯେ ପାକିସ୍ତାନର ସାଧାରଣ ଲୋକମାନେ ସରକାରଙ୍କୁ ବିରୋଧ କରୁଛନ୍ତି। ଦେବାଳିଆ ଅବସ୍ଥାରେ ପାକିସ୍ତାନ ପହଞ୍ଚିଛି। ବେଲ ଆଉଟ ପ୍ୟାକେଜ ସମ୍ପର୍କରେ ଆଇଏମଏଫ ସହ ହୋଇଥିବା ଆଲୋଚନା ମଧ୍ୟ ବିଫଳ ହୋଇଛି। ଫଳରେ ସ୍ଥିତି ଗୁରୁତର ହେବାରେ ଲାଗିଛି। ବର୍ତ୍ତମାନ ପରିସ୍ଥିତି ଏପରି ହୋଇଛି ଯେ ଲୋକମାନେ ଦିନକୁ ଦୁଇବେଳା ରୁଟି ମିଳିବା ମଧ୍ୟ କଷ୍ଟକର ହୋଇ ପଡ଼ିଛି। ପାକିସ୍ତାନରେ ମହଙ୍ଗା ମାଡ଼ ୪୮ ବର୍ଷର ରେକର୍ଡ ଭାଙ୍ଗିଛି।
ଗଣମାଧ୍ୟମର ରିପୋର୍ଟ ଅନୁଯାୟୀ, ପାକିସ୍ତାନରେ ଦରଦାମ ବୃଦ୍ଧି ଯୋଗୁଁ ବିଭିନ୍ନ ବ୍ୟବସାୟ ପ୍ରତିଷ୍ଟାନରେ ବିକ୍ରି ହ୍ରାସ ପାଇଛି। ବିଶେଷକରି ମଧ୍ୟବିତ୍ତ ଲୋକମାନେ ବଜାରରୁ ନିଜକୁ ଦୂରେଇ ରଖିଛନ୍ତି ଏବଂ କେବଳ ଧନୀ ଶ୍ରେଣୀ ନିଜର ଆବଶ୍ୟକ ଜିନିଷପତ୍ର କିଣିବାକୁ ସକ୍ଷମ ହେଉଛନ୍ତି।
ସେହିଭଳି ପେଟ୍ରୋଲ ପମ୍ପରେ ତେଲ ବିକ୍ରିରେ ମଧ୍ୟ ହ୍ରାସ ଘଟିଛି। ପୂର୍ବରୁ ପେଟ୍ରୋଲ ପମ୍ପରେ ଗ୍ରାହକଙ୍କ ଲମ୍ବା ଲାଇନ ଥିଲା, ଏବେ ପେଟ୍ରୋଲ ପମ୍ପଗୁଡ଼ିକ ପ୍ରାୟ ଖାଲି ପଡ଼ିଛି। ଏହାର କାରଣ ହେଉଛି ପାକିସ୍ତାନରେ ଗୋଟିଏ ଲିଟର ପେଟ୍ରୋଲର ମୂଲ୍ୟ ୨୬୨ ଟଙ୍କା ଛୁଇଁଛି। ସ୍ବଳ୍ପ ଆୟ ବର୍ଗର ଲୋକଙ୍କୁ ପାକିସ୍ତାନରେ ଘର ଖର୍ଚ୍ଚ ଚଳାଇବା ପାଇଁ ଧାର କରଜ କରିବାକୁ ପଡୁଛି।
ପାକିସ୍ତାନର ଚାଷୀଙ୍କ ଅବସ୍ଥା ମଧ୍ୟ ଖରାପ। ମୁଦ୍ରାସ୍ଫୀତି ବୃଦ୍ଧି ଦ୍ୱାରା କୃଷକଙ୍କ ଲଗାଣ ମୂଲ୍ୟ ବହୁଗୁଣିତ ହୋଇଛି। ବିଦ୍ୟୁତ ମୂଲ୍ୟ ଏବଂ ମଜୁରୀ ବୃଦ୍ଧି ହେତୁ ଚାଷ ଆଉ ଲାଭଜନକ କାରବାର ହୋଇ ରହିନାହିଁ।
