ନୂଆଦିଲ୍ଲୀ, ୯।୯ : ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାରେ କେନ୍ଦ୍ର ସରକାର ୪୨ କୋଟି ଲୋକଙ୍କୁ ସହାୟତା ପ୍ରଦାନ କରିଛନ୍ତି। ଏହି ବାବଦକୁ ୬୮,୮୨୦ କୋଟି ଟଙ୍କା ଦିଆଯାଇଥିବା ଅର୍ଥମନ୍ତ୍ରଣାଳୟ ପକ୍ଷରୁ ମଙ୍ଗଳବାର ସୂଚନା ଦିଆଯାଇଛି। କୋଭିଡ୍-୧୯ ଯୋଗୁ ଲୋକମାନେ ବିଭିନ୍ନ ସମସ୍ୟା ସାମ୍ନା କରୁଥିଲେ। ଗରିବ ଲୋକଙ୍କୁ ସହାୟତା ଯୋଗାଇ ଦେବା ଲାଗି କେନ୍ଦ୍ର ସରକାର ଏଭଳି ଏକ ଯୋଜନା ହାତକୁ ନେଇଥିଲେ। ପ୍ରଧାନମନ୍ତ୍ରୀ ଗରିବ କଲ୍ୟାଣ ପ୍ୟାକେଜର ୧.୭୦ ଲକ୍ଷ କୋଟି ଟଙ୍କା ଅଧିନରେ ଏହି ଅର୍ଥ ରାଶି ପ୍ରଦାନ କରାଯାଇଛି। ମାର୍ଚ୍ଚ ୨୬ରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ଏହି ଯୋଜନା ସମ୍ପର୍କରେ ଘୋଷଣା କରିଥିଲେ। ଏହା ଅଧିନରେ ମାଗଣା ଖାଦ୍ୟଶସ୍ୟ, ମହିଳାଙ୍କୁ କ୍ୟାଶ ପ୍ରଦାନ, ଗରିବ ଲୋକ ଏବଂ କୃଷକଙ୍କୁ ଅର୍ଥ ସହାୟତା ସାମିଲ ରହିଥିଲା। ଏହି ଯୋଜନା ଠିକ୍ ଭାବେ କାର୍ଯ୍ୟକାରୀ ହେଉଛି କି ନାହିଁ ତାହା ନିରନ୍ତର ଭିତ୍ତିରେ ଉଭୟ କେନ୍ଦ୍ର ଏବଂ ରାଜ୍ୟ ସରକାର ମିଳିତ ଭାବେ ସମୀକ୍ଷା କରୁଥିବା ଅର୍ଥ ମନ୍ତ୍ରଣାଳୟ ସ୍ପଷ୍ଟ କରିଛି। ପିଏମ୍ କିଶାନର ପ୍ରଥମ କିସ୍ତି ବାବଦକୁ ୧୭,୮୯୧ କୋଟି ଟଙ୍କା ୮.୯୪ କୋଟି କୃଷକଙ୍କୁ ପ୍ରଦାନ କରାଯାଇଛି। ୨୦.୬ କୋଟି ମହିଳାଙ୍କ ଜନଧନ ଖାତାରେ ୩୦,୯୨୫ କୋଟି ଟଙ୍କା ଜମା କରାଯାଇଛି। ଜନଧନ ଖାତାରେ କିସ୍ତିରେ ୫୦୦ ଲେଖାଏ ମୋଟ ୩ଟି କିସ୍ତି ପ୍ରଦାନ କରାଯାଇଛି। ସେହିଭଳି ଜାତୀୟ ସାମାଜିକ ସୁରକ୍ଷା ଯୋଜନାରେ ୨୮୧୪ କୋଟି, ଗରିବ କଲ୍ୟାଣ ଅନ୍ନ ଯୋଜନାରେ ୧୧୧ କୋଟି ଭଳି ବିଭିନ୍ନ ଖର୍ଚ୍ଚ ସରକାର କରିଥିବା ଜଣାପଡିଛି।
