ଜୋହାନ୍ସବର୍ଗ,୧୫ା୧୧:ଦକ୍ଷିଣ ଆଫ୍ରିକାର ଉତ୍ତରପଶ୍ଚିମ ପ୍ରଦେଶରେ ଥିବା ଏକ ଖଣିରେ ୪,୦୦୦ ବେଆଇନ ଖନନକାରୀ ଫସିରହିଛନ୍ତି। ବେଆଇନ ଖଣି ଖନନ ରୋକିବା ପଦକ୍ଷେପ ସ୍ବରୂପ ସେମାନଙ୍କ ପାଖକୁ ମୌଳିକ ଆବଶ୍ୟକତା ପଠାଇବା ବନ୍ଦ କରିଦିଆଯାଇଛି। ଦକ୍ଷିଣ ଆଫ୍ରିକା ସରକାର ସେମାନଙ୍କୁ ସହାୟତା କରିବେ ନାହିଁ ବୋଲି କହିଛନ୍ତି। ଷ୍ଟିଲ୍ଫୋଣ୍ଟାଇନ୍ଠାରେ ଥିବା ଉକ୍ତ ଖଣିର ପ୍ରବେଶପଥକୁ ପୋଲିସ ବନ୍ଦ କରିଦେଇଛି। ସେଠାକୁ ବାହାରୁ କୌଣସି ସାମଗ୍ରୀ ଯାଇପାରୁ ନ ଥିବାରୁ ଶ୍ରମିକମାନେ ଖାଦ୍ୟ, ପାନୀୟ ଜଳ ଅଭାବର ସମ୍ମୁଖୀନ ହୋଇଛନ୍ତି। ଅତ୍ୟାବଶ୍ୟକ ସାମଗ୍ରୀ ନ ମିଳିଲେ, ଶ୍ରମିକମାନେ ବାହାରକୁ ପଳାଇଆସିବାକୁ ବାଧ୍ୟ ହେବେ ଏବଂ ସେମାନଙ୍କୁ ଗିରଫ କରାଯିବ ବୋଲି ପୋଲିସ କହିଛି। ୩ ଜଣଙ୍କୁ ଖଣିରୁ ବାହାର କରାଯାଇଥିବାବେଳେ ଭୂଗର୍ଭରେ ପ୍ରାୟ ୪,୦୦୦ ଶ୍ରମିକ ରହିଥିବା ସେମାନେ ସୂଚନା ଦେଇଛନ୍ତି।
କିଛି ସପ୍ତାହ ପୂର୍ବରୁ ଉତ୍ତରପଶ୍ଚିମ ପ୍ରଦେଶର ବିଭିନ୍ନ ଖଣିରୁ ୧,୦୦୦ରୁ ଊର୍ଦ୍ଧ୍ୱ ଶ୍ରମିକଙ୍କୁ ବାହାର କରାଯାଇଥିଲା। ସେମାନଙ୍କ ମଧ୍ୟରୁ ଅଧିକାଂଶ ମୌଳିକ ଆବଶ୍ୟକତା ଅଭାବରୁ ରୁଗ୍ଣ, ଦୁର୍ବଳ ଏବଂ ଭୋକିଲା ଥିବା ଦେଖାଯାଇଥିଲା। ଶ୍ରମିକମାନେ ଆପରାଧିକ କାର୍ଯ୍ୟରେ ସମ୍ପୃକ୍ତ ଥିବାରୁ ସେମାନଙ୍କ ନିକଟକୁ ସହାୟତା ପଠାଯିବ ନାହିଁ ବୋଲି କ୍ୟାବିନେଟ ମନ୍ତ୍ରୀ ଖୁମ୍ବୁଡଜୋ ନାଶ୍ଭେନି କହିଛନ୍ତି। ଦକ୍ଷିଣ ଆଫ୍ରିକାର ପୁରୁଣା ସୁନାଖଣି ଅଞ୍ଚଳରେ ବେଆଇନ ଖନନ ସାଧାରଣ ଘଟଣା। ଖଣି ଶ୍ରମିକମାନେ ସେଠାରେ ରହିଯାଇଥିବା ସୁନା ପାଇବା ପାଇଁ ଆଶାରେ ବନ୍ଦ ଥିବା ଖଣି ଭିତରେ ବେଆଇନ ଭାବେ ପ୍ରବେଶ କରି ଖନନ କରିଥାନ୍ତି। ବେଳେବେଳେ ପଡୋଶୀ ଦେଶରୁ ମଧ୍ୟ ଖଣି ଶ୍ରମିକ ଏହି ବେଆଇନ କାର୍ଯ୍ୟରେ ନିୟୋଜିତ ହୋଇଥାନ୍ତି।
