ଭୁବନେଶ୍ୱର: ଭାରତୀୟ ଷ୍ଟାର୍ଟଅପ୍ ବ୍ୟବସ୍ଥାରେ ଓଡ଼ିଶା ଷ୍ଟାର୍ଟଅପ୍ଗୁଡିକର ସ୍ଥାନ ତୃତୀୟ। ରାଜ୍ୟରେ ବର୍ତ୍ତମାନ ୧୦୩୪ ଷ୍ଟାର୍ଟଅପ୍ ରହିଥିବା ବେଳେ ସେଥିମଧ୍ୟରୁ ୪୦% ଭାଗ ମହିଳା ଉଦ୍ୟମୀ ବୋଲି ରାଜ୍ୟ ସରକାରଙ୍କ ଏମ୍ଏସ୍ଏମ୍ଇ ବିଭାଗ ପ୍ରମୁଖ ସଚିବ ସତ୍ୟବ୍ରତ ସାହୁ ସୂଚନା ଦେଇଛନ୍ତି। ସିଆଇଆଇ ଷ୍ଟାର୍ଟଅପ୍ ଗୁରୁକୁଳର ୪ ଦିନିଆ କର୍ମଶାଳାରେ ଅତିଥି ଭାବେ ଯୋଗଦେଇ ସାହୁ ରାଜ୍ୟ ସରକାରଙ୍କ ଷ୍ଟାର୍ଟଅପ୍ ତନ୍ତ୍ର ଉପରେ ‘ଓ’ ହବ୍ ଉପରେ ଗୁରୁତ୍ୱାରୋପ କରିଥିଲେ। ମୁଖ୍ୟ ଅତିଥି ଭାବେ ଯୋଗଦେଇ ସୁବ୍ରତୋ ବାଗ୍ଚୀ ଷ୍ଟାର୍ଟଅପ୍ଗୁଡିକ ଓଡ଼ିଶାରେ ସମ୍ମୁଖୀନ ହେଉଥିବା ସମସ୍ୟା, ବିକ୍ରୟ କ୍ଷମତା, ସମ୍ପ୍ରସାରଣ ଏବଂ ପ୍ରଶାସନିକ ସମସ୍ୟା ଉପରେ ଆଲୋକପାତ କରିଥିଲେ। କାର୍ଯ୍ୟକ୍ରମରେ ସିଆଇଆଇ ଓଡ଼ିଶା ରାଜ୍ୟ ପରିଷଦର ଅଧ୍ୟକ୍ଷ ମନୀଷ ଖରବନ୍ଦା ନବସୃଜନ ଏକ ସଂସ୍କୃତି ବୋଲି କହିଥିଲେ। ସିଆଇଆଇ ଓଡ଼ିଶା ରାଜ୍ୟ ପରିଷଦର ଉପାଧ୍ୟକ୍ଷ ତଥା ନାଲ୍କୋ ଅଧ୍ୟକ୍ଷ ଶ୍ରୀଧର ପାତ୍ର କହିଥିଲେ, ଆମେ କାହାଠାରୁ କମ୍ ନୁହେଁ, ଆମେ ବି ଦିନେ ଶିଖର ଛୁଇଁବା। ଭାରତ ସରକାରଙ୍କ ଅଟଳ ନବସୃଜନ ମିଶନ, ନୀତି ଆୟୋଗର ମିଶନ ନିର୍ଦ୍ଦେଶକ ଡ.ଚିନ୍ତନ ବୈଷ୍ଣବ ଯେତେ ସମ୍ଭବ ନିର୍ଭରତା କମ୍ କରିବା ପାଇଁ କହିଥିଲେ। ଏଥିରେ ସିଆଇଆଇ ଓଡ଼ିଶା ନବସୃଜନ ପ୍ୟାନେଲ ସଂଯୋଜକ ଜୟଶ୍ରୀ ମହାନ୍ତି ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ। ଷ୍ଟାର୍ଟଅପ୍ ଗୁରୁକୁଳ ଭର୍ଚୁଆଲ କାର୍ଯ୍ୟକ୍ରମରେ ୫୦ ଷ୍ଟାର୍ଟଅପ୍ ସେମାନଙ୍କ ଉତ୍ପାଦ ପ୍ରଦର୍ଶନ କରିଛନ୍ତି।
