ଭୁବନେଶ୍ୱର, ୧୫ା୮(ଅସମାପିକା ସାହୁ):ବର୍ଷା ଋତୁରେ ଇନ୍ଫ୍ଲୁଏଞ୍ଜା ବା ସଂକ୍ରମଣ ବୃଦ୍ଧି ପାଇଥାଏ। ତେଣୁ ପିଲାମାନଙ୍କୁ ଏହି ଫ୍ଲୁ’ଠାରୁ ସୁରକ୍ଷିତ ରଖିବା ଗୁରୁତ୍ୱପୂର୍ଣ୍ଣ। କାରଣ ୫ବର୍ଷରୁ କମ୍ ବୟସର ଶିଶୁ, ଆଜ୍ମା, କିଡ୍ନୀ ରୋଗ, ହୃଦ୍ରୋଗରେ ପୀଡ଼ିତ ଶିଶୁଙ୍କ ପ୍ରତି ଫ୍ଲୁ’ ଜଟିଳତାର ବିପଦ ଆଶଙ୍କା ଅଧିକ ରହିଥାଏ। ଏପରିକି ହସ୍ପିଟାଲରେ ଭର୍ତ୍ତି ହେବାର ସମ୍ଭାବନା ରହିଥାଏ ବୋଲି ଜଗନ୍ନାଥ ହସ୍ପିଟାଲର ଡା. ବିଶ୍ୱଜିତ ମିଶ୍ର କହିଛନ୍ତି। ନିଜର ପିଲାଙ୍କୁ ଫ୍ଲୁ’ଠାରୁ ସୁରକ୍ଷିତ ରଖିବା ପାଇଁ ଟିକାକରଣ କରାଇବାକୁ ଡା. ମିଶ୍ର ଅଭିଭାବକଙ୍କୁ ପରାମର୍ଶ ଦେଇଛନ୍ତି। ସେ କହିଛନ୍ତି, ୪-ଇନ୍-୧ ବାର୍ଷିକ ଫ୍ଲୁ’ ଟିକାକରଣ ନିମୋନିଆ କିମ୍ବା ବ୍ରୋଙ୍କାଇଟିସ୍ ଭଳି ଫ୍ଲୁ’ଜନିତ ଜଟିଳତାଗୁଡ଼ିକୁ ରୋକିପାରେ। ଶିଶୁଙ୍କ ଟିକାକରଣ କରାଇ ଆମେ ସେମାନଙ୍କ ସ୍ବାସ୍ଥ୍ୟକୁ ସୁରକ୍ଷିତ ରଖିପାରିବା ଓ ସାମଗ୍ରିକ ସୁସ୍ଥତା ପ୍ରତି ଯୋଗଦାନ ଦେଇପାରିବା। ଏଥିସହ ଚିକିତ୍ସକୀୟ ପରାମର୍ଶ ଓ ବାର୍ଷିକ ଫ୍ଲୁ’ ଟିକାକରଣ ସମ୍ପର୍କରେ ନିଜ ଡାକ୍ତରଙ୍କ ସହ ଆଲୋଚନା କରିବା ଉଚିତ। ତାଙ୍କ କହିବାନୁସାରେ, ୪ପ୍ରକାର ଭୂତାଣୁ ରହିଛି, ଯାହାକି ଇନ୍ଫ୍ଲୁଏଞ୍ଜାର କାରଣ ହୋଇଥାଏ। ଏହାକୁ ସାଧାରଣତଃ ଫ୍ଲୁ’ କୁହାଯାଇଥାଏ। ଫ୍ଲୁ’ ଭୂତାଣୁ ନାକ, ଗଳା ଓ ବେଳେ ବେଳେ ଫୁସ୍ଫୁସ୍କୁ ସଂକ୍ରମିତ କରିଥାନ୍ତି। ଫ୍ଲୁ’ ଜଟିଳତା ମଧ୍ୟରେ ବ୍ୟାକ୍ଟେରିଆଲ ନିମୋନିଆ, କାନ ଓ ସାଇନସ୍ ଇନ୍ଫେକ୍ସନ ଏବଂ ଚିକିତ୍ସା ଅବସ୍ଥା ଅତ୍ୟଧିକ ଖରାପ ହେବା ଆଦି ରହିଛି। ଜଣେ ଶିଶୁର ବିକଶିତ ରୋଗ ପ୍ରତିରୋଧକ ଶକ୍ତି ଏବଂ ଜଣେ ବୟସ୍କ ବ୍ୟକ୍ତିଙ୍କ ଦୁର୍ବଳ ହେଉଥିବା ରୋଗ ପ୍ରତିରୋଧକ ଶକ୍ତି ଏଭଳି ଜଟିଳତାଗୁଡ଼ିକ ବିରୋଧରେ ଲଢ଼ିବା ପାଇଁ ସକ୍ଷମ ହୋଇ ନ ଥାଏ। ଏହି ୪ଟି ଭୂତାଣୁ ମଧ୍ୟରୁ ଯେକୌଣସି ଦ୍ୱାରା ସଂକ୍ରମିତ ହେବାର ବିପଦକୁ କମାଇବାର ସବୁଠାରୁ ପ୍ରଭାବୀ ଉପାୟ ହେଉଛି ୪-ଇନ୍-୧ ଫ୍ଲୁ ଭ୍ୟାକ୍ସିନେଶନ। ଇଣ୍ଡିଆନ୍ ଏକାଡେମିକ୍ ଅଫ୍ ପେଡିଆଟ୍ରିକ୍ସ (ଆଇଏପି) ଓ ବିଶ୍ୱ ସ୍ବାସ୍ଥ୍ୟ ସଙ୍ଗଠନ ପକ୍ଷରୁ ପରାମର୍ଶ ଦିଆଯାଇଛି ଯେ, ୬ ମାସରୁ ୫ବର୍ଷ ବୟସ ପର୍ଯ୍ୟନ୍ତ ଶିଶୁ ଏବଂ ୫୦ ବର୍ଷରୁ ଅଧିକ ବୟସର ବୟସ୍କ ବ୍ୟକ୍ତିଙ୍କୁ ସଂକ୍ରମଣ ଜଟିଳତାକୁ ରୋକିବା ପାଇଁ ପ୍ରତିବର୍ଷ ଫ୍ଲୁ’ ଟିକା ଦିଆଯିବା ଉଚିତ।
