କେନ୍ଦୁଝର,୨୮ା୧୨(ସ୍ବ.ପ୍ର.): କେନ୍ଦୁଝର ଜିଲାରେ ବିଭିନ୍ନ ବ୍ଲକର ଅଙ୍ଗନଓ୍ବାଡ଼ି କେନ୍ଦ୍ରର କର୍ମୀମାନେ ଆନ୍ଦୋଳନରେ ଯାଇଥିବାରୁ ପ୍ରାକ୍ ପ୍ରାଥମିକ ପାଠପଢ଼ା ବନ୍ଦ ରହିଛି। ଏହି ଆନ୍ଦୋଳନ ୩୮ ଦିନରେ ପହଞ୍ଚିଥିବା ବେଳେ ସମାଧାନର ବାଟ ବାହାରି ପାରୁ ନ ଥିବାରୁ ସମସ୍ୟା ବଢୁଛି। ଜିଲାରେ ସମୁଦାୟ ୩୩୫୨ଟି ଅଙ୍ଗନଓ୍ବାଡ଼ି କେନ୍ଦ୍ରରେ ଲକ୍ଷାଧିକ ଶିଶୁ ପାଠ ପଢୁଛନ୍ତି। ତେବେ ସେଥିରୁ ଯୋଡ଼ା ବ୍ଲକରେ ୯୫ ଓ ଘସିପୁରା ବ୍ଲକର ଗୋଟିଏ ଅଙ୍ଗନଓ୍ବାଡି କେନ୍ଦ୍ର ଚାଲିଥିବା ବେଳେ ଅବଶିଷ୍ଟ କେନ୍ଦ୍ର ବନ୍ଦ ରହିଛି। ଅଲଗା ଅଲଗା ସଂଘ ଅଧୀନରେ ଏହି ସବୁ କେନ୍ଦ୍ର ରହିଥିବାରୁ ଏଭଳି କିଛି କେନ୍ଦ୍ର ଖୋଲା ରହିଥିବା ଜଣାପଡ଼ିଛି। ଫଳରେ ଶିଶୁମାନେ ପ୍ରାକ୍ ପ୍ରାଥମିକ ପାଠପଢ଼ାରୁ ବଞ୍ଚିତ ରହିଛନ୍ତି। ଚାକିରି ନିୟମିତ କରିବା, ଅବସରକାଳୀନ ସୁବିଧା, ପଦୋନ୍ନତି ଆଦି ଦାବିରେ ଅଙ୍ଗନଓ୍ବାଡ଼ି କର୍ମୀମାନେ ଦୀର୍ଘ ଏକ ମାସରୁ ଅଧିକ ଦିନ ଧରି ଆନ୍ଦୋଳନକୁ ଓହ୍ଲାଇ ବିଭିନ୍ନ ସ୍ଥାନରେ ଧାରଣାରେ ବସିଛନ୍ତି। ଦାବି ପୂରଣ ନ ହେବା ଯାଏ ଆନ୍ଦୋଳନ ଚାଲିବ। ଆସନ୍ତାକାଲି ଏହି ସବୁ ଦାବିରେ ଜିଲା ସ୍ତରରେ ଆନ୍ଦୋଳନକୁ ବ୍ୟାପକ କରି ରାଲି କରାଯିବ ବୋଲି ସଂଘର ସଭାପତି ମମତାରାଣୀ ବେହେରା କହିଛନ୍ତି। ଅନ୍ୟପକ୍ଷରେ ଏନେଇ ଜିଲା ସମାଜ ମଙ୍ଗଳ ଅଧିକାରିଣୀ ଗୌରୀମଣୀ ହାଁସଦା କହିଛନ୍ତି,ବନ୍ଦ ଥିବା କେନ୍ଦ୍ରରେ ପାଠପଢ଼ା ବନ୍ଦ ରହିଛି। ସରକାରଙ୍କ ନିର୍ଦ୍ଦେଶ କ୍ରମେ ବନ୍ଦ ଥିବା ସେଣ୍ଟରରେ ପିଲାମାନଙ୍କୁ ଓ୍ବାର୍ଡମେମ୍ବର, ଏସ୍ଏଚ୍ଜି ଗ୍ରୁପ ଆଦି ଜରିଆରେ ଛତୁଆ ଖାଦ୍ୟ ଦିଆଯାଉଛି।
