ବଅଁରପାଳ,୮ା୮(ଡି.ଏନ.ଏ.) – ପୂଜାଋତୁ ଆସିବ। ମାସ ମାସ ଧରି ଗଢ଼ାଯାଇଥିବା ମୂର୍ତ୍ତିସବୁ ବିକ୍ରି ହୋଇଯିବ। ବର୍ଷକର ଖୋରାକ ଯୋଗାଡ଼ରେ ଆଉ ଅସୁବିଧା ହେବନି। ଏପରି ଭାବନା ନେଇ ମାଟି ସହ ମାଟି ହୋଇ ଖଟିଚାଲିଥିବା ଅନୁଗୋଳ ଜିଲା ବଅଁରପାଳ ଅଞ୍ଚଳର ମୂର୍ତ୍ତି କାରିଗରମାନେ ଏବେ ଆଶଙ୍କାରେ। ଲକ୍ଡାଉନ୍, ଶଟ୍ଡାଉନ୍ ଯୋଗୁ କିଛି ମାସ ହେବ କାମ ଠିକ୍ଭାବେ ହୋଇପାରି ନ ଥିବା ବେଳେ ଯେତିକି ମୂର୍ତ୍ତି ଗଢ଼ାଯାଇଛି ତାହା ମଧ୍ୟ ବିକ୍ରି ହୋଇପାରୁ ନାହିଁ। ଖୁଦୁରୁକୁଣୀ ଓଷା ଆରମ୍ଭ ହୋଇଯାଇଥିଲେ ହେଁ ଏଯାଏ ଅନେକ ମୂର୍ତ୍ତି ଗ୍ରାହକଙ୍କ ଅପେକ୍ଷାରେ ରହିଛି। ତେଣୁ ମହାମାରୀ ସ୍ଥିତିରେ ପରିବର୍ତ୍ତନ ନ ଆସିଲେ ଆଗାମୀ ପୂଜା ଋତୁର ଆଶା ପାଣିଫଟୋକା ପରି ମିଳାଇଯିବା କିଛି ଅସମ୍ଭବ ନୁହେଁ ବୋଲି ବହୁ ମୂର୍ତ୍ତି କାରିଗର ପ୍ରକାଶ କରିଛନ୍ତି।
ଜିଲାର ବଅଁରପାଳ, ନାଲ୍କୋ, ତଳମୂଳ, ମହୀଧରପୁର, ଫୁଲୁପଡ଼ା, କାଣ୍ଡସର, ତୁରଙ୍ଗ ଆଦି ଅଞ୍ଚଳରେ ପ୍ରାୟ ୩ ଶହ ମୂର୍ତ୍ତି କାରିଗର ରହିଛନ୍ତି। ଖୁଦୁରୁକୁଣୀ, ଗଣେଶପୂଜା, ବିଶ୍ୱକର୍ମାପୂଜା, ଦୁର୍ଗା ପୂଜା, ଲକ୍ଷ୍ମୀପୂଜା, କାଳୀପୂଜା, କାର୍ତ୍ତିକେଶ୍ୱରପୂଜା ଓ ସରସ୍ବତୀପୂଜା ପାଇଁ ଏମାନେ ବହୁ ସଂଖ୍ୟାରେ ମୂର୍ତ୍ତି ଗଢ଼ିଥାନ୍ତି। ସେମାନଙ୍କର ବର୍ଷକର ଆୟ ଏହି ପୂଜା ସମୟ ଉପରେ ନିର୍ଭରକରେ। ମାତ୍ର ଚଳିତବର୍ଷ କରୋନା ସଂକ୍ରମଣ ଏହି ମୂର୍ତ୍ତି କାରିଗରଙ୍କ ଜୀବନ ଜୀବିକା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଦୀର୍ଘ ୬ମାସ ହେଲା ସେମାନେ ବହୁ ଅସୁବିଧା ଦେଇ ଗତି କରିଥିବା ବେଳେ ପୂଜା ସମୟ ହିଁ ସେମାନଙ୍କ ଶେଷ ଆଶା ଥିଲା। ବିଶେଷକରି ଗଣେଶ, ବିଶ୍ୱକର୍ମା, ଦୁର୍ଗା ଓ ଲକ୍ଷ୍ମୀପୂଜାରୁ ସେମାନେ ଲକ୍ଷ ଲକ୍ଷ ଟଙ୍କା ରୋଜଗାର କରିଥାନ୍ତେ। ବଅଁରପାଳ ଓ ନାଲ୍କୋ ଅଞ୍ଚଳରେ ଏସବୁ ପୂଜାର ସ୍ବତନ୍ତ୍ରତା ରହିଥିବାରୁ ରାଜ୍ୟର ବିଭିନ୍ନ ସ୍ଥାନରୁ ଲୋକେ ଏଠାକୁ ପୂଜା ବୁଲିବାକୁ ଆସିଥାନ୍ତି। ତେଣୁ ବିଭିନ୍ନ ପୂଜା କମିଟି ପକ୍ଷରୁ ମେଢ଼କୁ ଆକର୍ଷଣୀୟ କରାଯିବାକୁ ଏକପ୍ରକାର ପ୍ରତିଯୋଗିତା ହୋଇଥାଏ। କୋଲକାତାର କାରିଗରମାନଙ୍କ ସହ ଏହି ସ୍ଥାନୀୟ କାରିଗରମାନେ ବହୁ ମେଢ଼ ନିର୍ମାଣ କରିଥାନ୍ତି। କିନ୍ତୁ ମହାମାରୀ କରୋନା ଦିନକୁ ଦିନ ଯେପରି ସଂକ୍ରମଣ ବଢ଼ାଇ ଚାଲିଛି ସେସବୁ ପୂଜା ଆଶା ଧୀରେ ଧୀରେ ମରି ମରି ଯାଉଛି। ଖୁଦୁରୁକୁଣୀ ମୂର୍ତ୍ତି ବିକ୍ରି ହୋଇପାରୁ ନ ଥିବା ବେଳେ ଗଣେଶପୂଜା ମଧ୍ୟ ଫିକା ପଡ଼ିବାର ଯଥେଷ୍ଟ ସମ୍ଭାବନା ଏବେଠୁ ଜଳ ଜଳ ଦିଶୁଥିବା ମୂର୍ତ୍ତି କାରିଗରମାନେ ପ୍ରକାଶ କରିଛନ୍ତି। ଯଦି ବାସ୍ତବରେ ପୂଜା ଋତୁ ସେମାନଙ୍କ ହାତଛଡ଼ା ହୋଇଯାଏ ତା’ହେଲେ ପରିବାର ପାଇଁ ପଖାଳ ମୁଠେ ଯୋଗାଡ଼ କରିବା କଷ୍ଟକର ହୋଇପଡ଼ିବ ବୋଲି ବଅଁରପାଳ ଅଞ୍ଚଳର କାରିଗରମାନେ କହିଛନ୍ତି।
ପୂର୍ବପରି ବେପାର ନାହିଁ
ପ୍ରତିବର୍ଷ ତିଆରି କରାଯାଇଥିବା ମୂର୍ତ୍ତି ପୂଜା ସମୟରେ ବିକ୍ରି ହୋଇଯାଇଥାଏ। ହାତକୁ ଭଲ ଦିପଇସା ଆସିଥାଏ। କିନ୍ତୁ ଚଳିତବର୍ଷ କରୋନା କାରଣରୁ ଅଧିକ ସଂଖ୍ୟକ ମୂର୍ତ୍ତି ପ୍ରସ୍ତୁତ କରାଯାଇ ନାହିଁ। ଯାହା ଅଛି ତାହାକୁ ବିକ୍ରି କରିବା ବର୍ତ୍ତମାନ କଷ୍ଟକର ହୋଇପଡ଼ିଲାଣି।
-ଅନ୍ତର୍ଯ୍ୟାମୀ ମୁଦୁଲି, ମୂର୍ତ୍ତି କାରିଗର
ଚଳିତବର୍ଷ ଉତ୍ସାହ ନାହିଁ
ପୂଜା ଋତୁ ଆସିବା ପୂର୍ବରୁ କାରିଗରମାନେ ଜୋରଦାର କାମ ଆରମ୍ଭ କରିଦେଇଥାନ୍ତି। ମୂର୍ତ୍ତି ଗଢ଼ିବାଠାରୁ ବିକ୍ରି ଯାଏ ସବୁଥିରେ ପରିବାରର ସଭିଏଁ ଲାଗିପଡ଼ିଥାନ୍ତି। ଚଳିତବର୍ଷ ମୂର୍ତ୍ତି ଗଢ଼ିବା କି ବିକ୍ରିରେ ଉତ୍ସାହ ନାହିଁ। ଆଗକୁ ଅନେକ ପୂଜା ଥିବାରୁ ଆଶା ଆଶଙ୍କାରେ ରହିଛୁ।
-ଡମ୍ବରୁଧର ମୁଦୁଲି, ତଳମୂଳ
