ଦିଗପହଣ୍ଡି, ୨୬।୮ (ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଢେପାପେଣ୍ଠ ଗ୍ରାମରେ ଏକ ଫାଷ୍ଟଫୁଡ୍ ଦୋକାନରୁ ବେଆଇନ ବିଦେଶୀ ମଦ ଜବତ ହୋଇଛି। ବ୍ରହ୍ମପୁର ଅବକାରୀ ଷ୍ଟ୍ରାଇକିଂ ଫୋର୍ସ ଅତର୍କିତ ଚଢ଼ାଉ କରି ୩୦ ବୋତଲ ବିଦେଶୀ ମଦ ଜବତ କରିବା ସହ ଦୋକାନୀ ବଳରାମ ସାହୁଙ୍କୁ ଗିରଫ କରି ବୁଧବାର ସନ୍ଧ୍ୟାରେ କୋର୍ଟ ଚାଲାଣ କରିଛି।
ସୂଚନା ଯୋଗ୍ୟ ଯେ, ବୁଧବାର ପୂର୍ବାହ୍ନ ପ୍ରାୟ ୧୧ଟାରେ ବ୍ରହ୍ମପୁର ଅବକାରୀ ଷ୍ଟ୍ରାଇକିଂ ଫୋର୍ସ ଇନ୍ସପେକ୍ଟର ମୋହନ ପ୍ରଧାନଙ୍କ ନେତୃତ୍ୱରେ ଏକ ଟିମ୍ ଦିଗପହଣ୍ଡି ବ୍ଲକ ଚୌଧୁରୀଟିକରପଡ଼ା, ଭ୍ରମରପୁର ଓ ଢେପାପେଣ୍ଠ ପ୍ରଭୃତି ଗ୍ରାମରେ ପାଟ୍ରୋଲିଂ କରୁଥିଲେ। ଏହି ଟିମ୍ରେ ଏସ.ଆଇ ଅରୁଣ ଭୋଇ, ଏଏସଆଇ ଭୁବନି ବେହେରା, କନେଷ୍ଟବଳ ଜି. କ୍ରିଷ୍ଣା ରାଓ, ପଦ୍ମାବତୀ ସେଠୀ, ସ୍ୱୟମ୍ଭୁ କଅଁର, ସୁଧାକର ଶବର, କେ. ଗୋପାଳ ରେଡ୍ଡୀ, ଅନିଲ ବେହେରା ଓ କୃଷ୍ଣ ଗୌଡ଼ ପ୍ରମୁଖ ସାମିଲ ଥିଲେ।
ପାଟ୍ରୋଲିଂ ସମୟରେ ଢେପାପେଣ୍ଠ ଗ୍ରାମର ବଳରାମ ସାହୁ ନିଜ ଫାଷ୍ଟଫୁଡ୍ ଦୋକାନରେ ବେଆଇନ ଭାବେ ବିନା ଲାଇସେନ୍ସରେ ବିଦେଶୀ ମଦ ବିକ୍ରି କରୁଥିବା ନେଇ ଅବକାରୀ ଟିମ୍କୁ ବିଶ୍ୱସ୍ତ ସୂତ୍ରରୁ ଖବର ମିଳିଥିଲା। ଖବର ପାଇ ଅବକାରୀ ଟିମ୍ ତୁରନ୍ତ ଉକ୍ତ ଦୋକାନରେ ଅତର୍କିତ ଚଢ଼ାଉ କରି ବିକ୍ରି ପାଇଁ ମହଜୁଦ ଥିବା ୩୦ ବୋତଲ ବିଦେଶୀ ମଦ ଜବତ କରିଥିଲେ।
ଘଟଣାସ୍ଥଳରେ ଅବକାରୀ ବିଭାଗ ପକ୍ଷରୁ ଜବତ ତାଲିକା ପ୍ରସ୍ତୁତ କରାଯିବା ସହ କେସ୍ ନଂ ୬୧/୨୬-୨୭ ଅନୁଯାୟୀ ମାମଲା ରୁଜୁ କରାଯାଇ ଅଭିଯୁକ୍ତ ବଳରାମଙ୍କୁ ଗିରଫ କରାଯାଇଥିବା ନେଇ ଇନ୍ସପେକ୍ଟର ମୋହନ ପ୍ରଧାନ ସୂଚନା ଦେଇଛନ୍ତି।
