୩ ଜଣଙ୍କୁ ଗୁଳିକରି ହତ୍ୟା
7:41 amOctober 4, 2023October 4, 2023 / 04

ବ୍ୟାଙ୍କକ୍‌,୪ା୧୦: ଥାଇଲାଣ୍ଡ ରାଜଧାନୀ ବ୍ୟାଙ୍କକ୍‌ସ୍ଥିତ ଏକ ବଡ଼ ଶପିଙ୍ଗ୍‌ ମଲ୍‌ରେ ମଙ୍ଗଳବାର ଗୁଳିକାଣ୍ଡରେ ୩ ଜଣ ନିହତ ହୋଇଛନ୍ତି। ଏଥିରେ ଅନ୍ୟ ୬ ଆହତ ହୋଇଛନ୍ତି। ପୋଲିସ ସମ୍ପୃକ୍ତ ବନ୍ଧୁକଧାରୀଙ୍କୁ ଗିରଫ କରିଛି। ତାଙ୍କ ବୟସ ମାତ୍ର ୧୪ ବର୍ଷ।
କେନ୍ଦ୍ରସ୍ଥଳରେ ଥିବା ସିଆମ୍‌ ପାରାଗନ୍‌ ମଲ୍‌ରେ ଲୋକେ କିଣାକିଣିରେ ବ୍ୟସ୍ତ ଥିବାବେଳେ ହଠାତ୍‌ ଗୁଳି ଫୁଟିଥିଲା। କେହି କିଛି ବୁଝିପାରିବା ପୂର୍ବରୁ ଗୁଳିମାଡ଼ରେ ୩ ଜଣ ଟଳିପଡ଼ିଥିଲେ। ଘଣ୍ଟାଏ ଭିତରେ ପୋଲିସ କର୍ମଚାରୀମାନେ ଜଣେ ନାବାଳକଙ୍କୁ ଗିରଫ କରିବାରେ ସକ୍ଷମ ହୋଇଥିଲେ। ଏନେଇ ମେଟ୍ରୋପଲିଟାନ୍‌ ପୋଲିସ ଡିଟେକ୍ଟିଭ୍‌ ଡିପାର୍ଟମେଣ୍ଟ ପକ୍ଷରୁ ଫେସ୍‌ବୁକ୍‌ରେ ସୂଚନା ଦିଆଯାଇଛି।
ଥାଇଲାଣ୍ଡରେ ବନ୍ଧୁକ ହିଂସା ନୂଆ ନୁହେଁ। ଗତବର୍ଷ ଜଣେ ପୂର୍ବତନ ପୋଲିସ ଅଫିସର ଏକ ନର୍ସରି ସ୍କୁଲରେ ଗୁଳି ଚଳାଇବାରୁ ୨୨ ଶିଶୁଙ୍କ ମୃତ୍ୟୁ ଘଟିଥିଲା। ୨୦୨୦ରେ ଉତ୍ତର-ପୂର୍ବରେ ଥିବା ନାଖୋନ୍‌ ରତଚସିମା ସହରରେ ଗୁଳିକରି ୨୯ ଜଣଙ୍କ ଜୀବନ ନେଇଥିଲେ।