ରାଉରକେଲା,୩୧।୧୨(ସଙ୍ଗୀତା ଜେନା): ରାଉରକେଲା ଜିଲା ପୋଲିସ ସୋମବାର ରାଉରକେଲାର ବିଭିନ୍ନ ସ୍ଥାନରେ ଚଢ଼ାଉ କରି ଆନ୍ତଃ ରାଜ୍ୟ ଅସ୍ତ୍ରଶସ୍ତ୍ର ଚୋରାଚାଲାଣ ଗ୍ୟାଙ୍ଗ୍ର ପର୍ଦ୍ଦାଫାଶ କରିଛି। ଜାଲ୍ କାଗଜପତ୍ର ମାଧ୍ୟମରେ ଅବୈଧ ଅସ୍ତ୍ର ଲାଇସେନ୍ସ ସଂଗ୍ରହ ଏବଂ ଅସ୍ତ୍ର ଚାଲାଣ କରୁଥିବା ଏହି ଗ୍ୟାଙ୍ଗ୍ର ମୁଖ୍ୟ ଅଭିଯୁକ୍ତଙ୍କ ସମେତ ୩ଜଣଙ୍କୁ ରାଉରକେଲା ପୋଲିସ ସୋମବାର ରାତିରେ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ମୁଖ୍ୟ ଅଭିଯୁକ୍ତ ରାଉରକେଲା ବାସନ୍ତୀ କଲୋନୀର ରତନ କୁମାର ସା (୫୮), ରାଉରକେଲା ସିଭିଲ୍ ଟାଉନଶିପ୍ର ରମନଦୀପ ସିଂହ (୩୬) ଏବଂ ମନଦୀପ ସିଂହ। ସେମାନଙ୍କ ନିକଟରୁ ୩ ପିସ୍ତଲ, ୩୫ ଗୁଳି, ମୋବାଇଲ୍ ଫୋନ୍ ଏବଂ କିଛି ନକଲି ଲାଇସେନ୍ସ ଜବତ କରାଯାଇଛି। ଏ ନେଇ ପୋଲିସ ପୃଥକ୍ ମାମଲା (ନଂ. ୪୬୬/୨୫, ନଂ.୮୧୭/୨୫ ଓ ନଂ.୮୧୮/୨୫) ରୁଜୁ କରିଛି। ଏ ନେଇ ରାଉରକେଲା ପୋଲିସ୍ ମୁଖ୍ୟାଳୟରେ ମଙ୍ଗଳବାର ଅପରାହ୍ନ ୧ଟାରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ପଶ୍ଚିମାଞ୍ଚଳ ଆରକ୍ଷୀ ଉପମହାନିରୀକ୍ଷକ ବ୍ରିଜେଶ କୁମାର ରାୟ ସୂଚନା ଦେଇଛନ୍ତି ।
ସୂଚନା ଦେଇ କହିଛନ୍ତି, ରାଉରକେଲା ସହରରେ ଅସ୍ତ୍ରଶସ୍ତ୍ର କାରବାର ବଢୁଥିବାରୁ ଗୁପ୍ତ ସୂଚନା ଆଧାରରେ ବିଭିନ୍ନ ସ୍ଥାନରେ ପୋଲିସ ପକ୍ଷରୁ ଚଢ଼ାଉ କରାଯାଇଥିଲା। ଏହି ସମୟରେ ଅନ୍ୟ ରାଜ୍ୟରୁ ଜାଲ୍ କାଗଜପତ୍ର ତିଆରି କରି ଅବୈଧ ଅସ୍ତ୍ର ଲାଇସେନ୍ସ ସଂଗ୍ରହ କରୁଥିବା ଉକ୍ତ ରାକେଟର ୩ଜଣଙ୍କୁ ପୋଲିସ ଧରିବାରେ ସଫଳ ହୋଇଥିଲା। ଏହି ରାକେଟ୍ ରାଉରକେଲା, କୋଲକାତା ଏବଂ ନାଗାଲାଣ୍ଡ ମଧ୍ୟରେ ସଂଯୋଗ ରଖି କାର୍ଯ୍ୟ କରୁଥିଲା। ଏପର୍ଯ୍ୟନ୍ତ ଏହି ଅସ୍ତ୍ର ଚାଲାଣକାରୀ ରାକେଟ ଅବୈଧ ଅସ୍ତ୍ର ଲାଇସେନ୍ସ ସଂଗ୍ରହ କରି ରାଉରକେଲାର କେତେଜଣ ବ୍ୟକ୍ତିଙ୍କୁ ବିକ୍ରି କରିଥିବା ରାୟ କହିଛନ୍ତି। ଅଭିଯୁକ୍ତମାନେ ଲୋକମାନଙ୍କୁ ସମଗ୍ର ଦେଶ ପାଇଁ ବୈଧ ଅସ୍ତ୍ର ଲାଇସେନ୍ସ ସହ ଅସ୍ତ୍ର ଯୋଗାଇଦେବାକୁ କହି ପ୍ରତ୍ୟେକ ଲାଇସେନ୍ସ ପିଛା ୫ରୁ ୧୦ ଲକ୍ଷ ଟଙ୍କା ନେଉଥିଲେ ବୋଲି ଡିଆଇଜି ରାୟ କହିଛନ୍ତି। ସେହିପରି ଏସ୍ପି ନୀତେଶ ୱାଧଓ୍ବାନୀ କହିଛନ୍ତି, ପ୍ରାରମ୍ଭିକ ତଦନ୍ତରେ ଏହି ରାକେଟ ରାଉରକେଲା-କୋଲକାତା-ନାଗାଲାଣ୍ଡ ମଧ୍ୟରେ ସକ୍ରିୟ ଥିବା ଜଣାପଡିଛି। ଅଭିଯୁକ୍ତମାନେ ଏପର୍ଯ୍ୟନ୍ତ ଅନେକ ଲୋକଙ୍କୁ ଅବୈଧ ଲାଇସେନ୍ସ ଯୋଗାଇ ଦେଇଛନ୍ତି। ଏହି ଗ୍ୟାଙ୍ଗ୍ ବହୁତ ସଙ୍ଗଠିତ ଭାବେ କାମ କରୁଥିଲା। ନାଗାଲାଣ୍ଡ ନାମରେ ଜାଲ କାଗଜପତ୍ର ସାହାଯ୍ୟରେ ବୈଧ ଲାଇସେନ୍ସ ହସ୍ତଗତ ହୋଇଛି। ରାଉରକେଲା, କୋଲକାତା ଓ ନାଗାଲାଣ୍ଡ ସଂଯୋଗର ତଦନ୍ତ ଚାଲିଛି। ତିନି ଅଭିଯୁକ୍ତଙ୍କୁ ବିଚାରବିଭାଗୀୟ ହେପାଜତକୁ ପଠାଇ ପୋଲିସ ତଦନ୍ତ କରୁଛି ବୋଲି ଏସ୍ପି ଓ୍ବାଧଓ୍ବାନୀ କହିଥିଲେ।
