ନୂଆଦିଲ୍ଲୀ,୨୭।୧୦ : ବିନାଶକାରୀ କରୋନା ସଂକ୍ରମଣ ପରେ ଜୀବନ ପ୍ରାୟ ସ୍ବାଭାବିକ ଫେରିଛି। ସ୍କୁଲଗୁଡ଼ିକରେ ନିୟମିତ ଭାବେ ପାଠପଢ଼ା ଜାରି ରହିଛି। ଦିଲ୍ଲୀର ସରକାରୀ ବିଦ୍ୟାଳୟଗୁଡ଼ିକ ମଧ୍ୟ ଚଳିତ ବର୍ଷ ଏପ୍ରିଲରୁ ନିୟମିତ ଖୋଲିବା ଆରମ୍ଭ କରିଛନ୍ତି। ତେବେ ଏକ ଆଶ୍ଚର୍ଯ୍ୟଜନକ ତଥ୍ୟ ସାମ୍ନାକୁ ଆସିଛି। ନିୟମିତ ଖୋଲିବା ସତ୍ତ୍ୱେ ଦିଲ୍ଲୀର ସରକାରୀ ସ୍କୁଲରେ ପଢୁଥିବା ୩.୪୮ଲକ୍ଷରୁ ଅଧିକ ପିଲା ସ୍କୁଲକୁ ଆସୁନାହାଁନ୍ତି। ଏହି ସଂଖ୍ୟା ସରକାରୀ ସ୍କୁଲରେ ପଢୁଥିବା ମୋଟ ଛାତ୍ରୀଛାତ୍ରମାନଙ୍କର ୧୮ ପ୍ରତିଶତ ।
ଗଣମାଧ୍ୟମର ରିପୋର୍ଟ ଅନୁଯାୟୀ, ୨୦୨୨ ଏପ୍ରିଲ ୧ ରୁ ଅକ୍ଟୋବର ମଧ୍ୟରେ ମୋଟ ୩,୪୮,୩୪୪ ପିଲା କ୍ରମାଗତ ଭାବରେ ଅନୁପସ୍ଥିତ ରହିଛନ୍ତି। ଏଥିମଧ୍ୟରୁ ସର୍ବାଧିକ ପିଲା ୧୧ ରୁ ୧୬ ବର୍ଷ ବୟସ ବର୍ଗରେ ଅଛନ୍ତି। ଏହି ବୟସ ବର୍ଗର ୭୧.୬ ପ୍ରତିଶତ ପିଲା ସ୍କୁଲକୁ ଆସୁ ନାହାନ୍ତି।
କୁହାଯାଏ ଯେ ୩୦ ସେପ୍ଟେମ୍ବର ୨୦୨୨ ପର୍ଯ୍ୟନ୍ତ ୭୫୧୬ ଜଣ ଛାତ୍ର ଗୋଟିଏ ଦିନ ପାଇଁ ମଧ୍ୟ ସ୍କୁଲକୁ ଆସି ନଥିଲେ। ସେମାନଙ୍କ ପରିବାର ସହିତ ଯୋଗାଯୋଗ କରିବାକୁ ଚେଷ୍ଟା ମଧ୍ୟ ବିଫଳ ହୋଇଥିଲା।ଡିସିପିସିଆର ଅଧିକାରୀମାନେ ଅନୁପସ୍ଥିତ ପିଲାଙ୍କ ମଧ୍ୟରୁ ୭୩,୫୧୩ ଜଣଙ୍କ ସହ ଯୋଗାଯୋଗ କରିଥିଲେ। ଏଥିମଧ୍ୟରୁ ୪୧ ପ୍ରତିଶତ ପିଲାଙ୍କ ମାତାପିତା କହିଛନ୍ତି ଯେ ଅସୁସ୍ଥତା ଯୋଗୁ ସେମାନଙ୍କ ପିଲାମାନେ ସ୍କୁଲ ଯାଇପାରିବେ ନାହିଁ। ଏଥି ସହିତ, ୨୫ ପ୍ରତିଶତ ପିଲାଙ୍କ ମାତାପିତା କହିଛନ୍ତି ଯେ ସେମାନେ ନିଜ ପିଲାମାନଙ୍କ ସହିତ ଗାଁକୁ ଆସିଛନ୍ତି। ୧୧ ପ୍ରତିଶତ ପିଲାଙ୍କ ଅଭିଭାବକ କହିଛନ୍ତି ଯେ ସେମାନେ ଜାଣନ୍ତି ନାହିଁ ଯେ ସେମାନଙ୍କ ପିଲାମାନେ ସ୍କୁଲ ଯାଉ ନାହାଁନ୍ତି।
