ନୂଆଦିଲ୍ଲୀ,୧୦।୧୦: ଦେଶର ପ୍ରମୁଖ ଘରୋଇ ଶିକ୍ଷାନୁଷ୍ଠାନ ଏସ୍ଆର୍ଏମ୍ ବିଶ୍ୱବିଦ୍ୟାଳୟ ଏପି’ର ୨ୟ ସମାବର୍ତ୍ତନ ଉତ୍ସବ ନିକଟରେ ଅନୁଷ୍ଠିତ ହୋଇଯାଇଛି। ବିଶ୍ୱବିଦ୍ୟାଳୟର ଏପିଜେ ଅବଦୁଲ କଲାମ ଅଡିଟୋରିୟମ୍ ପରିସରରେ ଉକ୍ତ ଉତ୍ସବର ଆୟୋଜନ କରାଯାଇଥିଲା। ଏହି ଅବସରରେ ଇସ୍ରୋର ପୂର୍ବତନ ଅଧ୍ୟକ୍ଷ ଡ. କେ.ରାଧାକ୍ରିଷ୍ଣନ୍ ମୁଖ୍ୟ ଅତିଥି ଭାବେ ଯୋଗ ଦେଇ କୃତୀ ଛାତ୍ରୀଛାତ୍ରଙ୍କୁ ସମ୍ବୋଧିତ କରି ଭିଜନ୍ ଇଣ୍ଡିଆ-୨୦୪୭ ସମ୍ପର୍କରେ ମତବ୍ୟକ୍ତ କରିଥିଲେ। ଏହି ପରିପ୍ରେକ୍ଷୀରେ ବିଶ୍ୱବିଦ୍ୟାଳୟର ପ୍ରତିଷ୍ଠାତା କୁଳପତି ତଥା ଏମ୍ପି ଡ. ଟି.ଆର.ପ୍ୟାରୀଭେନ୍ଦର କୃତୀ ସ୍ନାତକ ଏବଂ ପଦକ ବିଜେତାଙ୍କୁ ଅଭିନନ୍ଦନ ଜଣାଇଛନ୍ତି।
ସେହିଭଳି ବିଶ୍ୱବିଦ୍ୟାଳୟର ପ୍ରୋ-କୁଳପତି ଡ. ପି. ସତ୍ୟନାରାୟଣନ୍ ସ୍ବାଗତ ଅଭିଭାଷଣ ଦେଇଥିବାବେଳେ କୁଳପତି ପ୍ରଫେସର ମନୋଜ କେ ଆରୋରା ବାର୍ଷିକ ରିପୋର୍ଟ ଉପସ୍ଥାପନ କରିଥିଲେ। ୨ୟ ସମାବର୍ତ୍ତନ ଉତ୍ସବରେ ମୋଟ ୧,୧୫୩ ଛାତ୍ର ଯଥା ବିବିଏ, ବିଏ, ବିଏସ୍ସି, ଏମ୍ବିଏ ଏବଂ ପିଏଚ୍ଡି ପ୍ରୋଗ୍ରାମଧାରୀଙ୍କୁ ପୁରସ୍କାର, ଡିଗ୍ରୀ ଏବଂ ପଦକ ପ୍ରଦାନ କରାଯାଇଥିଲା। ଏହି ଅବସରରେ ଡ.ଏସ. ଚନ୍ଦ୍ରଶେଖରଙ୍କୁ ସମ୍ମାନଜନକ ଡକ୍ଟରେଟ ଉପାଧି ଦିଆଯାଇଥିଲା। ଉକ୍ତ କାର୍ଯ୍ୟକ୍ରମରେ ପରିଚାଳନା ଏବଂ ଏକାଡେମିକ୍ ବୋର୍ଡର ସଦସ୍ୟ ପରିଷଦଙ୍କ ସମେତ ପ୍ରୋ ଚାନସେଲର ପ୍ରଫେସର ଡି ନାରାୟଣ ରାଓ, ରେଜିଷ୍ଟ୍ରାର୍ ଡ. ଆର. ପ୍ରେମକୁମାର, ବିଶ୍ୱବିଦ୍ୟାଳୟର ପୂର୍ବତନ କୁଳପତି ତଥା ଉପଦେଷ୍ଟା ପ୍ରଫେସର ଭି ଏସ୍ ରାଓ ପ୍ରମୁଖ ଉପସ୍ଥିତ ଥିଲେ।
