ମୁମ୍ବାଇ, ୩୦।୬: ମୁମ୍ବାଇର ତାଜ୍ ହୋଟେଲକୁ ପାକିସ୍ତାନରୁ ଫୋନ୍ରେ ଧମକ ମିଳିଛି। ୨୬/୧୧ ଭଳି ପୁଣି ହୋଟେଲରେ ବିସ୍ଫୋରଣ ହେବ ବୋଲି ଫୋନ୍ରେ କେହି ଜଣେ ଧମକ ଦେଇଥିବା ପୋଲିସ କହିଛି। ମୁମ୍ବାଇ ପୋଲିସ ପକ୍ଷରୁ ସୁରକ୍ଷା ଦୃଷ୍ଟିରୁ ହୋଟେଲ ପରିସରରେ ବ୍ୟାପକ ସୁରକ୍ଷାକର୍ମୀଙ୍କୁ ମୁତୟନ କରାଯାଇଛି। ଏହା ସହିତ ଦକ୍ଷିଣ ମୁମ୍ବାଇ ଏବଂ ସମୁଦ୍ର କୂଳବର୍ତ୍ତୀ ଅଞ୍ଚଳରେ ପାଟ୍ରୋଲିଂକୁ ବଢ଼ାଇ ଦିଆଯାଇଥିବା ପୋଲିସ ବିଭାଗ ପକ୍ଷରୁ ସୂଚନା ଦିଆଯାଇଛି। ଫୋନ୍ କଲ୍ ମିଳିବା ପରେ ପୋଲିସ ବୋମା ନିଷ୍କ୍ରିୟ ବାହିନୀ ସହାୟତାରେ ହୋଟେଲର ଯାଞ୍ଚ୍ କରିଛନ୍ତି। ହୋଟେଲରେ ବିସ୍ଫୋରଣ ହେବ ବୋଲି ୨ଥର କଲ୍ କରାଯାଇଥିଲା। ପ୍ରଥମ କଲ୍ କୋଲାବାସ୍ଥିତ ତାଜ୍ ହୋଟେଲକୁ ରାତ୍ର ୧୨ଟାରେ ଆସିଥିବା ବେଳେ ଦ୍ୱିତୀୟ କଲ୍ ବାନ୍ଦ୍ରାଠାରେ ଥିବା ହୋଟେଲ ତାଜ୍ ଲାଣ୍ଡସ୍ ଏଣ୍ଡ୍କୁ ଆସିଥିଲା। କଲ୍ କରିଥିବା ବ୍ୟକ୍ତି ନିଜକୁ ଲଶ୍କର-ଇ-ତୋଏବା ଆତଙ୍କବାଦୀ ସଂଗଠନ ସଦସ୍ୟ ବୋଲି ପରିଚୟ ଦେଇଥିବା ପୋଲିସ କହିଛି। ସୂଚନାଯୋଗ୍ୟ, ୨୦୦୮ ନଭେମ୍ବର ୨୬ରେ ହୋଇଥିବା ମୁମ୍ବାଇ ବିସ୍ଫୋରଣରେ ୧୬୬ ଜଣ ଲୋକଙ୍କ ମୃତ୍ୟୁ ଘଟିଥିଲା। ୩୦୦ରୁ ଅଧିକ ଲୋକ ଆହତ ହୋଇଥିଲେ। ୬୦ ଘଣ୍ଟା ଧରି ପୋଲିସ ଅପରେଶନ୍ ପରେ ସମସ୍ତ ଆତଙ୍କବାଦୀ ନିହତ ହୋଇଥିବାବେଳେ ଅଜମଲ କସବ ପୋଲିସ ହାତରେ ଧରାପଡ଼ିଥିଲେ। ପରେ ତାଙ୍କୁ ଫାଶୀ ଦିଆଯାଇଥିଲା।
