ଭୁବନେଶ୍ୱର,୨୫।୮ (ଅଭୟ ଦାଶ):ବିଗତ କିଛି ବର୍ଷ ମଧ୍ୟରେ ମାଇକ୍ରୋଫାଇନାନ୍ସ କମ୍ପାନୀଗୁଡ଼ିକର କାରବାର ପୂର୍ବାପେକ୍ଷା ବୃଦ୍ଧି ପାଇଛି। ବିଶେଷକରି ସହରାଞ୍ଚଳରୁ ଆରମ୍ଭକରି ଗ୍ରାମାଞ୍ଚଳର ଶେଷ ସ୍ତର ପର୍ଯ୍ୟନ୍ତ ମାଇକ୍ରୋଫାଇନାନ୍ସର ଦୃଢ଼ ନେଟ୍ଓ୍ବର୍କ ବଳରେ ବିଭିନ୍ନ ବର୍ଗଙ୍କ ପାଇଁ ଆର୍ଥିକ ସହଯୋଗ ଯୋଗାଇବା ବେଶ୍ ସହାୟକ ହୋଇଛି। ଏ କ୍ଷେତ୍ରରେ ରହିଥିବା ଶିଳ୍ପ ସଙ୍ଗଠନ ତଥା ଆର୍ବିଆଇ ସ୍ବୀକୃତିପ୍ରାପ୍ତ ସ୍ବୟଂ ନିୟନ୍ତ୍ରିତ ସଂସ୍ଥା ମାଇକ୍ରୋଫାଇନାନ୍ସ ଇଣ୍ଡଷ୍ଟ୍ରି ନେଟ୍ୱର୍କ(ଏମ୍ଏଫ୍ଆଇଏନ୍)ର ଗୁରୁତ୍ୱ ମଧ୍ୟ ବୃଦ୍ଧି ପାଇଛି। ସେହିଭଳି ମାଇକ୍ରୋଫାଇନାନ୍ସ କମ୍ପାନୀଗୁଡ଼ିକ ଓଡ଼ିଶା ବଜାର ଉପରେ ଅଧିକ ଗୁରୁତ୍ୱ ଦେବା ସହ କାରବାର ବୃଦ୍ଧି ନେଇ ମଧ୍ୟ ବ୍ୟାପକ ଯୋଜନା ଓ କାର୍ଯ୍ୟକ୍ରମ ହାତକୁ ନେଇଛନ୍ତି। ବିଶେଷକରି ଗତ କିଛି ବର୍ଷ ମଧ୍ୟରେ ଓଡ଼ିଶାରେ ମାଇକ୍ରୋଫାଇନାନ୍ସ କମ୍ପାନୀଗୁଡ଼ିକର କାରବାର ବ୍ୟାପକ ଭାବେ ବୃଦ୍ଧି ପାଇଥିବାବେଳେ ୨୦୨୩-୨୪ ଆର୍ଥକ ବର୍ଷରେ ପ୍ରାୟ ୨୫,୦୦୦କୋଟି ଟଙ୍କାର ବ୍ୟବସାୟ ପାଇଁ ଆକଳନ କରାଯାଇଛି। ଉଲ୍ଲେଖଯୋଗ୍ୟ, ଗତ ୫ ବର୍ଷ ମଧ୍ୟରେ ମାଇକ୍ରୋଫାଇନାନ୍ସ କମ୍ପାନୀଗୁଡିକ କ୍ରମାଗତ ଭାବେ କାରବାର ବୃଦ୍ଧିକରି ଚାଲିଛନ୍ତି। ବିଶେଷକରି ୨୦୧୯ରୁ ୨୦୨୩ ଆର୍ଥକ ବର୍ଷରେ ଯଥାକ୍ରମେ ୧୧,୪୮୬ କୋଟି ବଢ଼ି ୨୦,୩୫୩ କୋଟି ଟଙ୍କାରେ ପହଞ୍ଚତ୍ଛି। ଏପରିକି ରାଜ୍ୟରେ ଗଞ୍ଜାମ ଜିଲା ସର୍ବାଧିକ ବ୍ୟବସାୟ ଦେଉଥିବାବେଳେ ସୋନପୁରରେ ସର୍ବନିମ୍ନ କାରବାର ହୋଇଥିବା ଜଣାପଡ଼ିଛି। ଅପରପକ୍ଷରେ ମାଇକ୍ରୋଫାଇନାନ୍ସ କମ୍ପାନୀଗୁଡ଼ିକ ସାରା ଦେଶରେ କାରବାର କରୁଥିବାବେଳେ ବିହାର ପ୍ରଥମ ସ୍ଥାନରେ ରହିଥିବାବେଳେ ଓଡ଼ିଶା ୮ସ୍ଥାନରେ ରହିଛି। ଗତ ୨ ବର୍ଷ ମଧ୍ୟରେ ଦେଶର ପ୍ରାୟ ୩.୫ ଲକ୍ଷ କୋଟି ଟଙ୍କାର ଋଣ ସହାୟତା ପ୍ରାୟ ୬.୬ କୋଟି ସ୍ବତନ୍ତ୍ର ଋଣଦାତାଙ୍କ ଯୋଗାଇ ଦିଆଯାଇଛି। ସେହିପରି ଭାରତର ଦୁର୍ଗମ ଅଞ୍ଚଳରେ ଋଣ ଏବଂ ଅତ୍ୟାବଶ୍ୟକ ଆର୍ଥିକ ସେବା ଯେଭଳି ପହଞ୍ଚତ୍ବ ତାହା ସୁନିଶ୍ଚିତ କରିବା ଦିଗରେ ମାଇକ୍ରୋଫାଇନାନ୍ସ ଏକ ପ୍ରଭାବୀ ସାଧନ ଭାବେ ଉଭାହୋଇଛି। ସୂଚନାଯୋଗ୍ୟ, ଓଡ଼ିଶା ବଜାରରେ ମାଇକ୍ରୋଫାଇନାନ୍ସ ସଂସ୍ଥାଗୁଡ଼ିକ ମାଇକ୍ରୋ କ୍ରେଡିଟ୍ ଋଣ ଜରିଆରେ ୪୬ ଲକ୍ଷରୁ ଅଧିକ ବ୍ୟକ୍ତିବିଶେଷ (ଅନନ୍ୟ ଋଣକାରୀ)ଙ୍କ ଜୀବନରେ ରୂପାନ୍ତରଣ ଆଣିଛନ୍ତି।
ଏ ସମ୍ପର୍କରେ ଏମ୍ଏଫ୍ଆଇଏନ୍ର ଡେପୁଟି ହେଡ୍ (ଷ୍ଟେଟ୍ ଇନିସିଏସିଭ) ରାମ କାମରାଜୁ କହିଛନ୍ତି, ଆର୍ବିଆଇ ନିୟନ୍ତ୍ରିତ ମାଇକ୍ରୋଫାଇନାନ୍ସ ସଂସ୍ଥାଗୁଡ଼ିକ ବାସ୍ତବରେ ଓଡ଼ିଶାର ଅବହେଳିତ ବର୍ଗଙ୍କ ନିମନ୍ତେ ଆଶାର ଆଲୋକ ହୋଇପାରିଛି। ସେହିଭଳି ଅନ୍ନପୂର୍ଣ୍ଣା ଫାଇନାନ୍ସର ଡାଇରେକ୍ଟର ଦିବ୍ୟଜ୍ୟୋତି ପଟ୍ଟନାୟକ କହିଥିଲେ,ମାଇକ୍ରୋଫାଇନାନ୍ସ ଦୃଶ୍ୟପଟରେ ରାଜ୍ୟର ଦୃଢ଼ତା ଏବଂ ଏକାଗ୍ରତା ଲକ୍ଷ୍ୟ କରାଯାଉଛି। ଏପରିକି ମାଇକ୍ରୋଫାଇନାନ୍ସ ଋଣ ଯୋଗୁ ମହିଳା ଉଦ୍ୟୋଗୀଙ୍କ ସଂଖ୍ୟା ବୃଦ୍ଧି ପାଉଥିବା ଆମେ ଲକ୍ଷ୍ୟ କରୁଛୁ। ଉଲ୍ଲେଖଯୋଗ୍ୟ, ଦେଶର ୨୮ ରାଜ୍ୟ ୮ କେନ୍ଦ୍ରଶାସିତ ଅଞ୍ଚଳର ୭୨୯ ଜିଲାରେ ୪୪ରୁ ଅଧିକ ମାଇକ୍ରୋଫାଇନାନ୍ସ କମ୍ପାନୀ କାର୍ଯ୍ୟ କରୁଥିବାବେଳେ ଉକ୍ତ କମ୍ପାନୀ ଭାରତର ଗ୍ରାମାଞ୍ଚଳ ଓ ସହରାଞ୍ଚଳରେ ଋଣ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଆର୍ଥିକ ସେବା ପହଞ୍ଚାଇବା ସୁନିଶ୍ଚିତ କରୁଛନ୍ତି।
