ଛତ୍ରପୁର,୩୦ା୩(ଡି.ଏନ.ଏ): ଗଞ୍ଜାମ ଜିଲାରେ ଜାଲ୍ ଶିକ୍ଷାଗତଠାରୁ ଆରମ୍ଭ କରି ଜାତିଗତ ଓ ବିଭିନ୍ନ ପ୍ରମାଣପତ୍ର ଦାଖଲ କରି ଶିକ୍ଷକ ନିଯୁକ୍ତି ପାଇଛନ୍ତି। ଏନେଇ ଦୀର୍ଘ ବର୍ଷ ପୂର୍ବରୁ ଖୋଳତାଡ ଚାଲିଥିବାବେଳେ ତଦନ୍ତର ଶିଥିଳତା ଯୋଗୁଁ ଏହାର ସୁଫଳ ମିଳିପାରୁନି। ବିଭିନ୍ନ ଅଭିଯୋଗକୁ ଭିତ୍ତିକରି ଜାଲ ଶିକ୍ଷକମାନଙ୍କ ତାଲିକା ମଧ୍ୟ ବାରମ୍ବାର ରାଜ୍ୟ ଶିକ୍ଷା ବିଭାଗ ପକ୍ଷରୁ ଗଞ୍ଜାମ ଜିଲାପାଳ, ଜିଲା ଶିକ୍ଷା ଅଧିକାରୀ ଓ ବ୍ଲକ ଶିକ୍ଷା ଅଧିକାରୀମାନଙ୍କ ନିକଟକୁ ଆସୁଛି। ଏହାର ଯାଞ୍ଚ କରି ଜାଲ ପ୍ରମାଣପତ୍ର ଦାଖଲ କରି ନିଯୁକ୍ତି ପାଇଥିବା ଶିକ୍ଷକ ମାନଙ୍କ ଉପରେ କାର୍ଯ୍ୟାନୁଷ୍ଠାନ ସୁରୂପ କାର୍ଯ୍ୟରୁ ଅନ୍ତର, ସ୍ଥାନୀୟ ଥାନାରେ ଏତଲା ଦେବାକୁ ନିର୍ଦ୍ଦେଶ ଆସୁଛି। ମାତ୍ର ଗଞ୍ଜାମ ଜିଲା ଶିକ୍ଷା ବିଭାଗ ପକ୍ଷରୁ ହାତଗଣତି କାର୍ଯ୍ୟାନୁଷ୍ଠାନ ହେଉଛି। ଗଞ୍ଜାମ ଜିଲାରେ ଜାଲ ପ୍ରମାଣପତ୍ର ଦେଇ ଚାକିରି ପାଇଥିବା ୨୫୦ ଜଣ ଶିକ୍ଷକ ଏବେ ଶିକ୍ଷା ବିଭାଗର ସ୍କାନରରେ ଅଛନ୍ତି। ଏମାନଙ୍କ ଶିକ୍ଷାଗତ ଓ ବିଭିନ୍ନ ପ୍ରମାଣପତ୍ର ଯାଞ୍ଚ ପାଇଁ ସମ୍ପୃକ୍ତ ବିଶ୍ୱବିଦ୍ୟାଳୟ ଓ ବୋର୍ଡକୁ ପଠାଯାଇଥିବା ନେଇ ବୁଧବାର ଛତ୍ରପୁରଠାରେ ଗଞ୍ଜାମ ଜିଲା ଶିକ୍ଷା ଅଧିକାରୀ ବିନିତା ସେନାପତି ଗଣମାଧ୍ୟମକୁ ସୂଚନା ଦେଇଛନ୍ତିଞ୍, ଯାହାର ପ୍ରମାଣପତ୍ର ଜାଲ ଜଣାପଡିବା ପରେ ତୁରନ୍ତ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବା ସେ କହିଛନ୍ତି। ବର୍ତ୍ତମାନ ସୁଦ୍ଧା ଗଞ୍ଜାମ ଜିଲାର ୩୭ ଜଣ ଶିକ୍ଷକଙ୍କୁ ଚାକିରିରୁ ବିଦା କରାଯାଇଛି। ନିର୍ଦ୍ଧାରିତ ସମୟ ମଧ୍ୟରେ ଏହି ଯାଞ୍ଚ ପ୍ରକ୍ରିୟା ସାରିବାକୁ ରାଜ୍ୟ ଶିକ୍ଷା ବିଭାଗ ନିକଟରୁ ଚିଠି ଆସିଥିବା ଜିଲା ଶିକ୍ଷା ଅଧିକାରୀ ସୂଚନା ଦେଇଛନ୍ତି। ପ୍ରମାଣପତ୍ର ଯାଞ୍ଚ ପାଇଁ ଆବଶ୍ୟକ ଅର୍ଥ ମଧ୍ୟ ସମ୍ପୃକ୍ତ ବିଶ୍ୱବିଦ୍ୟାଳୟ ଓ ବୋର୍ଡକୁ ଦେବା ଲାଗି ବ୍ୟବସ୍ଥା ହୋଇଛି। ଅନ୍ୟ ରାଜ୍ୟର ବିଶ୍ୱବିଦ୍ୟାଳୟ ଓ ବୋର୍ଡରୁ ପ୍ରମାଣପତ୍ର ଯାଞ୍ଚ ରିପୋର୍ଟ ଆସିବାରେ ବିଳମ୍ବ ହେଉଥିବା ଜଣାଯାଇଛି।
ସୂଚନାଯୋଗ୍ୟ ଗଣଶିକ୍ଷା ବିଭାଗର ସ୍କାନରରେ ଥିବା ସମ୍ପୃକ୍ତ ଶିକ୍ଷକଙ୍କ ପ୍ରମାଣପତ୍ର ଯାଞ୍ଚ କଡାକଡି କରିବା ପାଇଁ ଗଞ୍ଜାମ ଜିଲା ଶିକ୍ଷା ଅଧିକାରୀଙ୍କୁ ପୁଣି ନିର୍ଦ୍ଦେଶ ସମ୍ବନ୍ଧୀୟ ଚିଠି ଆସିଛି। ଚିହ୍ନଟ ଜାଲ ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ସହ ଥାନାରେ ମାମଲା ଦାୟର କରିବାକୁ ନିର୍ଦ୍ଦେଶ ଆସିଛି। ଯାଞ୍ଚ ଓ ତଦନ୍ତରେ ବିଳମ୍ବ ଯୋଗୁଁ କେତେକ ଜାଲ ପ୍ରମାଣପତ୍ର ଦାଖଲ କରି ନିଯୁକ୍ତି ପାଇଥିବା ଶିକ୍ଷକମାନେ କୋର୍ଟକୁ ଯାଇ ସ୍ଥଗିତାଦେଶ ଆଣିବାରେ ସକ୍ଷମ ହେଉଛନ୍ତି। ଏପରିକି କେତେକ ଜାଲ ପ୍ରମାଣପତ୍ର ଦାଖଲ କରି ହୋଇଥିବା ଶିକ୍ଷକଙ୍କ ନାଁରେ ସ୍ଥାନୀୟ ବ୍ଲକ ଶିକ୍ଷା ଅଧିକାରୀଙ୍କ ପକ୍ଷରୁ ସ୍ଥାନୀୟ ଥାନାରେ ଏତଲା ମଧ୍ୟ ଦିଆଯାଉଛି। ମାତ୍ର ଥାନାରୁ ହିଁ ପିଆର୍ ବଣ୍ଡରେ ଛାଡି ଦିଆଯାଉଛି। ଆହୁରି କେତେକ ଶିକ୍ଷକ ଇସ୍ତଫା ଦେଇ ନିକୁ ସୁରକ୍ଷିତ କରୁଛନ୍ତି। ଏପରିକି ଜାଲ ପ୍ରମାଣପତ୍ର ଜଣାପଡିବା ପରେ ସମ୍ପୃକ୍ତ ଶିକ୍ଷକମାନଙ୍କୁ ଚାକିରିରୁ ବିଦା କରାଯାଇଛି। ମାତ୍ର ତାଙ୍କର ଚାକିରି କାଳରେ ପାଇଥିବା ଦରମା ବାବଦରେ ଅର୍ଥ ସେମାନଙ୍କ ଠାରୁ ଆଦାୟ ମଧ୍ୟ କରାଯାଉ ନ ଥିବା ଜଣାପଡିଛି।
