ଭୁବନେଶ୍ୱର,୨୨।୧୧: ଷ୍ଟାର୍ଟଅପ ଓଡ଼ିଶା ଓ ଟିଆଇଇ ଭୁବନେଶ୍ୱର ପକ୍ଷରୁ ‘ହଲ୍ ଅଫ୍ ଫେମ୍ ୨.୦’ର ଶୁଭାରମ୍ଭ ସମ୍ପର୍କରେ ଘୋଷଣା କରାଯାଇଛି। ଏପରିକି ସୋମବାର ସ୍ଥାନୀୟ ଜୟଦେବ ବିହାର ନିକଟସ୍ଥ ଏକ ହୋଟେଲରେ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମରେ ଷ୍ଟାର୍ଟଅପ ଓଡ଼ିଶାର ଏକଜିକ୍ୟୁଟିଭ ଚେୟାରମ୍ୟାନ ଓମକାର ରାୟ, ଓଡ଼ିଶା ସରକାରଙ୍କ ଇଲେକଟ୍ରୋନିକ୍ସ ଓ ଆଇଟି ବିଭାଗର ଶାସନ ସଚିବ ମନୋଜ ମିଶ୍ର, ଟିଆଇଇ ଭୁବନେଶ୍ୱରର ସଭାପତି ଦେବାଶିଷ ପଟ୍ଟନାୟକ ଏବଂ ଉପସଭାପତି ସୁନୀଲ ତନେଜା ପ୍ରମୁଖ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ଏହି ପରିପ୍ରେକ୍ଷୀରେ ସମଗ୍ର ରାଜ୍ୟରୁ ୨୫ ଟି ଷ୍ଟାର୍ଟଅପ ୟୁନିଟ ସେମାନଙ୍କର ଉପତ୍ାଦଗୁଡିକୁ ପ୍ରଦର୍ଶିତ କରିଥିଲେ।
ଏ ସମ୍ପର୍କରେ ଓମକାର ରାୟ କହିଥିଲେ, ରାଜ୍ୟରେ ଷ୍ଟାର୍ଟଅପ ପରି ବ୍ୟବସ୍ଥା ବେଶ ଉଚ୍ଚତର ସ୍ତରରେ ପହଞ୍ଚତ୍ଛି। ଚଳିତ ବର୍ଷ ଓଡ଼ିଶାରେ ଷ୍ଟାର୍ଟଅପ ପରିବ୍ୟବସ୍ଥାକୁ ରାଜ୍ୟର ବିବିଧ ଷ୍ଟାର୍ଟଅପଗୁଡିକ ନିମନ୍ତେ ପ୍ରାୟ ୧୦୦କୋଟି ଟଙ୍କାର ପାଣ୍ଠି ମିଳିଛି ଏବଂ ଆଞ୍ଜେଲ ନିବେଶକ ଓ ଭେଞ୍ଜର କ୍ୟାପିଟାଲିଷ୍ଟମାନଙ୍କ ପକ୍ଷରୁ ଯୋଗାଇ ଦିଆଯାଇଥିବା ପାଣ୍ଠିକୁ ନେଇ ଏହା ୩୫୯କୋଟି ଟଙ୍କାକୁ ବୃଦ୍ଧି ପାଇଛି। ସମଗ୍ର ରାଜ୍ୟରେ ଷ୍ଟାର୍ଟଅପଗୁଡିକ ନିକଟରୁ କାର୍ଯ୍ୟ କ୍ଷେତ୍ରରେ ଆମେ ଅତ୍ୟନ୍ତ ଉତ୍ସାହଜନକ ପ୍ରତିକ୍ରିୟା ପାଉଛୁ। ନିକଟରେ ସମାପ୍ତ ହୋଇଥିବା ଓଡ଼ିଶା ଷ୍ଟାର୍ଟଅପ ଗ୍ରୋଥ ଫଣ୍ଡ, ଫଣ୍ଡ ଅଫ ଫଣ୍ଡସ ୧୦୦୦ କୋଟି ଟଙ୍କାର ପୁଞ୍ଜିନିବେଶ ପ୍ରତିଶ୍ରୁତି ଲାଭ କରିଛି, ଯାହା ଷ୍ଟାର୍ଟଅପଗୁଡିକ ପାଇଁ ଉପଲବ୍ଧ କରାଯିବ ଏବଂ ଆଗାମୀ ୫ବର୍ଷ ମଧ୍ୟରେ ତାହା ନିବେଶ କରାଯିବ। ମୁଁ ନିଶ୍ଚିତ ଯେ ହଲ୍ ଅଫ ଫେମ ୨.୦ କାର୍ଯ୍ୟକ୍ରମରେ ମନୋନୀତ ୨୫ଟି ଷ୍ଟାର୍ଟଅପ ଆମ ପରିବ୍ୟବସ୍ଥାକୁ ଅଧିକ ପୁଞ୍ଜି ଆକୃଷ୍ଟ କରିପାରିବେ।
ସେହିଭଳି ମନୋଜ ମିଶ୍ର କହିଥିଲେ, ଅଧିକ ଭଲ ପାଇଁ ଓଡ଼ିଶାରେ ଆଇଟି କ୍ଷେତ୍ରରେ ଦ୍ରୁତ ପରିବର୍ତ୍ତନ ଘଟୁଛି ଏବଂ ଏ କ୍ଷେତ୍ରରେ ଷ୍ଟାର୍ଟଅପଗୁଡିକ ବୃହତ୍ତର ଭୂମିକା ଗ୍ରହଣ କରିବେ। ହଲ୍ ଅଫ ଫେମ ୨.୦ ପାଇଁ ୨୫ଟି ଷ୍ଟାର୍ଟଅପ ଦ୍ୱାରା ପ୍ରଦର୍ଶନୀ ରାଜ୍ୟରେ ସମୁଦାୟ ଷ୍ଟାର୍ଟଅପ ପରିବ୍ୟବସ୍ଥାର ପ୍ରତିନିଧିତ୍ୱକାରୀ ଉଭୟ ଆଇଟି ଓ ଅଣଆଇଟି କ୍ଷେତ୍ରର ବହୁବିଧ ଉପତ୍ାଦ ପ୍ରଦର୍ଶନ ବେଶ ପ୍ରଭାବୀ ହୋଇପାରିଛି। ଅପରପକ୍ଷରେ ଦେବାଶିଷ କହିଥିଲେ ଯୋଗ୍ୟ ଷ୍ଟାର୍ଟଅପଗୁଡିକ ଯେଉଁମାନଙ୍କର ବିଦ୍ୱତାକୁ ସ୍ବୀକୃତି ମିଳିନାହିଁ,ସେଗୁଡିକର ସମ୍ପୂର୍ଣ୍ଣ ନୂତନ ଚିନ୍ତାଧାରା ଓ ସୃଜନଶୀଳତାକୁ ପ୍ରଦର୍ଶିତ କରିବା ସକାଶେ ହଲ ଅଫ ଫେମ ପକ୍ଷରୁ ଯୋଜନା କରାଯାଇଥିଲା। ଉକ୍ତ କାର୍ଯ୍ୟକ୍ରମ ପରିଶେଷରେ ଧନ୍ୟବାଦ ଅର୍ପଣ କରି ସୁନୀଲ ତନେଜା କହିଥିଲେ ଟିଆଇଇ ଉଦ୍ୟୋଗୀମାନଙ୍କୁ ସମର୍ଥନ ଯୋଗାଇଦେବା ଦିଗରେ କାର୍ଯ୍ୟ କରୁଛି। ଉଦ୍ୟୋଗୀ ଭାବେ ବିବେଚିତ ହେବା ନିମନ୍ତେ ଆପଣଙ୍କୁ କର୍ମଚାରୀ ନିଯୁକ୍ତ କରିବାକୁ ହେବ।
