କେନ୍ଦୁଝର,୯ା୧(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ବାଂଶପାଳ ବ୍ଲକ ତରମାକାନ୍ତ ଚା’ ବଗିଚା ପୁନରୁଦ୍ଧାର କରିବା ପାଇଁ ସରକାର ପଦକ୍ଷେପ ନେଇଛନ୍ତି। ଗତକାଲି କୋଲକାତାସ୍ଥିତ ଟି’ ବୋର୍ଡ ଇଣ୍ଡିଆର ୨ ଜଣିଆ ସଦସ୍ୟ ଉକ୍ତ ଅଞ୍ଚଳକୁ ଯାଇ ସ୍ଥିତି ଅନୁଧ୍ୟାନ କରିବା ପରେ ଆଜି ଜିଲା କମିଟିରେ ମତ ଉପସ୍ଥାପନା କରିଛନ୍ତି। ଜିଲାପାଳ ବିଶାଲ ସିଂଙ୍କ ଅଧ୍ୟକ୍ଷତାରେ ମିନି କନ୍ଫରେନ୍ସ ହଲରେ ଏକ ବୈଠକ ଅନୁଷ୍ଠିତ ହୋଇଥିଲା। ଜଳ ବିଭାଜିକା ପ୍ରକଳ୍ପ ନିର୍ଦ୍ଦେଶକ ଅଶୋକ କୁମାର ସେନାପତି ଆଲୋଚନା କରି ତରମାକାନ୍ତ ଟି’ ବଗିଚାର ବର୍ତ୍ତମାନସ୍ଥିତ ନେଇ ପ୍ରାରମ୍ଭିତ ସୂଚନା ଦେଇଥିଲେ ଏବଂ କେଉଁ କେଉଁ ସ୍ଥାନରେ ନୂତନ ଭାବେ ବନୀକରଣ କରାଯାଇପାରିବ ସେ ସମ୍ପର୍କରେ ସୂଚନା ଦେଇଥିଲେ। ନୋଡାଲ ଅଫିସରଟି ପ୍ଲାଣ୍ଟେସନ ତଥା ଜିଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ କୁମାର ନାଗଭୂଷଣ ବୈଠକରେ ଆଲୋଚନା କରିଥିଲେ। କୋଲକାତାସ୍ଥିତଟି ବୋର୍ଡ ଇଣ୍ଡିଆର ଡେପୁଟି ଡାଇରେକ୍ଟର ଅନୁପମ ଦାସ, ଡେଭଲପମେଣ୍ଟ ଅଫିସର ଶୁଭାଶିଷ କୁମାର ସ୍ବାଇଁ ଚା’ ଚାଷ ନେଇ ବୈଷୟିକ ପରାମର୍ଶ ଦେଇଥିେଲେ। ଏହି ବୈଠକରେ ଡିଏଫଓ ଧନରାଜ ଏଚ୍ଡି, ଉଦ୍ୟାନ ବିଭାଗ ଉପନିର୍ଦ୍ଦେଶକ ସୌମେନ୍ଦ୍ର ନାରାୟଣ ପାଣିଗ୍ରାହୀ, କୃଷି ବିଜ୍ଞାନ କେନ୍ଦ୍ରର ବରିଷ୍ଠ ବୈଜ୍ଞାନିକ ତଥା ମୁଖ୍ୟ ଡକ୍ଟର ସୁକାନ୍ତ କୁମାର ସାହୁ,ଜଳ ବିଭାଜିକା ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ ପ୍ରଦୀପ କୁମାର ରାଉତ,ବାଂଶପାଳ ତହସିଲଦାର ବିକାଶ ଚନ୍ଦ୍ର ସାହୁ ,ବାଂଶପାଳ ବିଡିଓ ରାଜା ରଣଜିତ୍ ବଳ ପ୍ରମୁଖ ଉପସ୍ଥିତ ରଖି ମତ ରଖିଥିଲେ। ଜିଲା ପ୍ରଶାସନ ପକ୍ଷରୁ ଜଳ ବିଭାଜିକା, ରାଜସ୍ବ ବିଭାଗ ଓ ବନବିଭାଗ ମିଳିତ ଭାବେ ଚା’ ବାଗାନ ଅଞ୍ଚଳକୁ ଯାଇ ଜମିଜମାର ସ୍ଥିତାବସ୍ଥା ଅନୁଧ୍ୟାନ କରିବା ସହ ସୀମା ନିର୍ଦ୍ଧାରଣ କରି ଏହାର ରିପୋର୍ଟ ଜିଲାପାଳଙ୍କୁ ପ୍ରଦାନ କରିବେ। ପୂର୍ବରୁ ଉକ୍ତ ଚା’ ବାଗାନ କୁଶକଳା, ତରମାକାନ୍ତ, କଲଣ୍ଡା, ସିଂପୁର ଏବଂ ଅଡାଳ ଗ୍ରାମର ୨୨୦୦ ଏକର ଜମିରେ ଚା’ ଚାଷ କରାଯାଇଥିଲା। ପ୍ରସ୍ତାବିତ ନୂତନ ଚା’ ବଗିଚା ପାଇଁ କୁଶକଳା ଏବଂ ଅଡାଳରେ ଜମି ଚିହ୍ନଟ ହୋଇଛି।
