ବ୍ରହ୍ମପୁର,୧୭।୨(ସୁବାସ ଚନ୍ଦ୍ର ପାଢ଼ୀ): ଅବକାରୀ ଗୁଇନ୍ଦା ଉପ ଅଧିକ୍ଷକ କୁବେର ସେଠୀଙ୍କ ନେତୃତ୍ୱରେ ଏକ ଟିମ୍ ବୈଦ୍ୟନାଥପୁର ଥାନା ଅନ୍ତର୍ଗତ ଗଜପତି ନଗରରୁ ଏକ କାର ଭିତରୁ ୫୦ କେଜି ଗଞ୍ଜେଇ ଜବତ କରିଛି। ଅଭିଯୁକ୍ତ ଜଣଙ୍କ ଗଜପତି ଜିଲା ଆର. ଉଦୟଗିରି ଥାନା ଅନ୍ତର୍ଗତ ତଣ୍ଡରଙ୍ଗା ଗ୍ରାମର ପବିତ୍ର ପ୍ରଧାନ(୨୯) ।
ଅବକାରୀ ଟିମକୁ ଚକମାଇ ଅନ୍ୟ ଦୁଇଜଣ ଘଟଣାସ୍ଥଳରୁ ଖସି ପଳାଇଥିବା ଟିମ ସୂଚନା ଦେଇଛି।
ଗିରଫ ଅଭିଯୁକ୍ତଙ୍କୁ ଜେରା ପରେ ତଥ୍ୟ ଆଧାରରେ ଟିମ ଫାଷ୍ଟଗେଟ ଛକରୁ ଅନ୍ୟଏକ କାର ଅଟକାଇ ଯାଞ୍ଚ କରିଥିଲା। ସେଥିରୁ ୧୬୫କେଜି ଗଞ୍ଜେଇ ଜବତ ହୋଇଥିଲା। ସେହିଭଳି ଦୁଇଜଣ ଯୁବକଙ୍କୁ ମଧ୍ୟ ଗିରଫ କରାଯାଇଛିି। ସେମାନେ ହେଲେ ଗଜପତି ଜିଲା ଆର. ଉଦୟଗିରି ଥାନା ଅଞ୍ଚଳର ନାଥନ କୁମାର ବୀର(୨୫) ଓ ଖ୍ରୀଷ୍ଟ ରଇତ (୨୮)। ଜେରା ବେଳେ ସେମାନେ ଉକ୍ତ ଗଞ୍ଜେଇ ଗଜପତି ଜିଲାରୁ ଆଣି ବ୍ରହ୍ମପୁର ଦେଇ ଭୁବନେଶ୍ୱର ଚାଲାଣ କରିଥାନ୍ତେ ବୋଲି ଜଣାପଡ଼ିଛି। ମେସ୍ ନମ୍ବର ୮୧୧/୨୩-୨୪ ରେ ଉପରୋକ୍ତ ଗିରଫ ତିନି ଅଭିଯୁକ୍ତଙ୍କୁ ଶନିବାର କୋର୍ଟ ଚାଲାଣ କରାଯାଇଛି।
