ଶ୍ରୀନଗର,୧୫।୬ : ୫୦ ବର୍ଷ ଧରି କଂଗ୍ରେସରେ ଗାନ୍ଧୀ ପରିବାରର ନିକଟତର ରହିବା ପରେ ଡେମୋକ୍ରାଟିକ ପ୍ରଗତିଶୀଳ ଆଜାଦ ପାର୍ଟି (ଡିପିଏପି) ଗଠନ କରିଥିବା ପୂର୍ବତନ ମୁଖ୍ୟମନ୍ତ୍ରୀ ଗୁଲାମ ନବୀ ଆଜାଦ କହିଛନ୍ତି ସେ ୨୦୨୪ ପୂର୍ବରୁ କୌଣସି ବିରୋଧୀ ଏକତା ଦେଖୁ ନାହାନ୍ତି। ଲୋକସଭା ନିର୍ବାଚନରେ ମିଳିତ ବିରୋଧୀ ଦଳଙ୍କୁ କିଛି ଲାଭ ମିଳିବା ପରି ମନେ ହେଉନାହିଁ। ବାସ୍ତବରେ, ତାଙ୍କୁ ବିହାର ସିଏମ ନୀତୀଶ କୁମାରଙ୍କଦ୍ୱ ାରା ଡକାଯାଇଥିବା ବିରୋଧୀ ଦଳର ବୈଠକ ବିଷୟରେ ପଚରାଯାଇଥିଲା। ଆଜାଦ କହିଛନ୍ତି ତାଙ୍କୁ ନିମନ୍ତ୍ରଣ କରାଯାଇ ନାହିଁ।
ଆଜାଦ କହିଛନ୍ତି, ଯେତେବେଳେ ଉଭୟ ଦଳ ପାଇଁ କିଛି ଘଟେ ସେତେବେଳେ ବିରୋଧୀ ଏକତା ଲାଭଦାୟକ ହେବ। ଉଭୟଙ୍କ ପାଇଁ ଲାଭର ଅଂଶରେ ପାର୍ଥକ୍ୟ ଥାଇପାରେ। ଏହା ୫୦-୫୦ କିମ୍ବା ୬୦-୪୦ହୋଇପାରେ। କିନ୍ତୁ ଏହି କ୍ଷେତ୍ରରେ ଉଭୟ ପକ୍ଷର ଅନ୍ୟକୁ ଦେବାର କିଛି ନାହିଁ। ’ ପଶ୍ଚିମବଙ୍ଗ ବିଷୟରେ ଆଜାଦ କହିଛନ୍ତି କଂଗ୍ରେସ ଏବଂ କମ୍ୟୁନିଷ୍ଟ ପାର୍ଟି ଅଫ ଇଣ୍ଡିଆ (ମାର୍କ୍ସବାଦୀ) (ସିପିଏମ) ର ରାଜ୍ୟରେ କୌଣସି ବିଧାୟକ ନାହାଁନ୍ତି ଏବଂ ଯଦି ମମତା ବାନାର୍ଜୀଙ୍କ ନେତୃତ୍ୱରେ ଦୁଇ ଦଳ ଏକ ମେଣ୍ଟ କରନ୍ତି ତେବେ ଏହା ଚିନ୍ତାର ବିଷୟ। ଟିଏମସି ଯଦି ଏଭଳି କରେ, ତେବେ ଏଥିରେ ଟିଏମସିର ଲାଭ କ’ଣ ହେବ?
ମମତା ବାନାର୍ଜୀ ତାଙ୍କ ସହ କାହିଁକି ମେଣ୍ଟ କରିବେ? ଏଥିରୁ ସେମାନଙ୍କୁ କ’ଣ ଲାଭ ମିଳିବାକୁ ଯାଉଛି? ସେହିଭଳି ରାଜସ୍ଥାନ, ଛତିଶଗଡ ଏବଂ ମଧ୍ୟପ୍ରଦେଶରେ ଟିଏମସିର କୌଣସି ବିଧାୟକ ନାହାନ୍ତି। କଂଗ୍ରେସ ସେମାନଙ୍କୁ ଏହି ରାଜ୍ୟଗୁଡ଼ିକରେ ଟିଏମସିକୁ କିଛି ଦେବ କି? କେବଳ କିଛି ନୁହେଁ। ’ ଅନ୍ୟ ଏକ ଉଦାହରଣ ଦେଇ ଆଜାଦ କହିଛନ୍ତି ସେହିଭଳି ଆନ୍ଧ୍ରପ୍ରଦେଶରେ କଂଗ୍ରେସର ଜଣେ ବିଧାୟକ ନାହାଁନ୍ତି। ଯେତେବେଳେ କି ଆନ୍ଧ୍ରପ୍ରଦେଶ ସିଏମ ଓ୍ବାଇ.ଏସ. ଜଗନ ମୋହନ ରେଡ୍ଡୀଙ୍କ ନେତୃତ୍ୱାଧୀନ ଦଳର ଅନ୍ୟ କୌଣସି ରାଜ୍ୟରେ ବିଧାୟକ ନାହାଁନ୍ତି। ଏଭଳି ସ୍ଥଳେ ମେଣ୍ଟ ହେଲେ କଂଗ୍ରେସ ରେଡ୍ଡୀଙ୍କୁ କଣ ଦେବ ଏବଂ ରେଡ୍ଡୀ କଂଗ୍ରେସକୁ କଣ ଦେବେ?’
ତେବେ ଆସନ୍ତା ବର୍ଷ ହେବାକୁ ଥିବା ଲୋକସଭା ନିର୍ବାଚନରେ ଶାସକ ଭାଜପାକୁ ପରାସ୍ତ କରିବାକୁ ବିରୋଧୀ ଏକଜୁଟ ହେବାକୁ ଚାହୁଁଛନ୍ତି ବୋଲି ଗୁଲାମ ନବୀ ଆଜାଦ ସ୍ପଷ୍ଟ କରିଛନ୍ତି। ଆଜାଦ କହିଛନ୍ତି, ’କିନ୍ତୁ ଦୁର୍ଭାଗ୍ୟବଶତଃ ପ୍ରତ୍ୟେକ ବିରୋଧୀ ଦଳର ନିଜ ରାଜ୍ୟ ବ୍ୟତୀତ ଅନ୍ୟ ରାଜ୍ୟରେ କିଛି ସ୍ଥିତି ନାହିଁ। ଯଦି ଦୁଇ-ତିନି ଦଳ ରାଜ୍ୟରେ ମିଳିତ ମେଣ୍ଟରେ ସରକାର ଗଠନ କରିଥାନ୍ତେ ତେବେ ଏହା ଲାଭଦାୟକ ହୋଇଥାନ୍ତା।
