ଭୁବନେଶ୍ୱର,୧ା୧(ସତ୍ୟଜିତ୍ ରାଉତ):ସରକାରୀ ଅର୍ଥ ଆତ୍ମସାତ୍ ହେଉ କିମ୍ବା ଆୟ ବହିର୍ଭୂତ ସମ୍ପତ୍ତି ଠୁଳ ସହ ଲାଞ୍ଚ ମାମଲା। ଦୁର୍ନୀତିଗ୍ରସ୍ତ ସରକାରୀ ବାବୁମାନେ ଭିଜିଲାନ୍ସ ଜାଲରେ ଫସିବା ପରେ ସେମାନଙ୍କ କଳାକାରନାମା ପଦାକୁ ଆସୁଛି। ୨୦୨୪ରେ ରାଜ୍ୟ ଭିଜିଲାନ୍ସ ନିର୍ଦ୍ଦେଶାଳୟ ୨୦୦ ଆପରାଧିକ ମାମଲା ରୁଜୁ କରିଥିବାବେଳେ ୧୮୧ ଜଣଙ୍କୁ ଗିରଫ କରିଛି। ଏମାନଙ୍କ ମଧ୍ୟରେ ୧୬୦ ସରକାରୀ ବାବୁ ରହିଛନ୍ତି। ସେହିପରି ଭିଜିଲାନ୍ସ ଟିମ୍ ୪୮୩ ସ୍ଥାନରେ ଚଢ଼ାଉ କରିଥିବା ବେଳେ ମୋଟ୍ ୧୩୧ କୋଟି ଟଙ୍କାର ଆୟ ବହିର୍ଭୂତ ସମ୍ପତ୍ତି ଠାବ କରିଛି। ଭିଜିଲାନ୍ସ ପକ୍ଷରୁ ମଙ୍ଗଳବାର ପ୍ରକାଶିତ ବାର୍ଷିକ ରିପୋର୍ଟ-୨୦୨୪ରୁ ଏହା ଜଣାପଡ଼ିଛି।
ରିପୋର୍ଟ ଅନୁଯାୟୀ, ୨୦୦ ଆପରାଧିକ ମାମଲା ମଧ୍ୟରୁ ୪୪ଟି ସରକାରୀ ଅର୍ଥ ଆତ୍ମସାତ ସଂକ୍ରାନ୍ତୀୟ ଦୁର୍ନୀତି ମାମଲା ରହିଥିବାବେଳେ ୬୦ଟି ଆୟ ବହିର୍ଭୂତ ସମ୍ପତ୍ତି ଠୁଳ ଓ ୯୬ଟି ଲାଞ୍ଚ ମାମଲା ରହିଛି। ୩୦୮ଜଣ ବ୍ୟକ୍ତିଙ୍କ ବିରୋଧରେ ଏସବୁ ମାମଲା ରୁଜୁ ହୋଇଛି। ସମ୍ପୃକ୍ତ ଅଭିଯୁକ୍ତମାନଙ୍କ ମଧ୍ୟରେ ୫୦ କ୍ଲାସ୍-୧ ଅଫିସର, ୩୬ କ୍ଲାସ୍-୨ ଅଫିସର, ୧୩୧ ତୃତୀୟ ଶ୍ରେଣୀ କର୍ମଚାରୀ, ଜଣେ ଚତୁର୍ଥ ଶ୍ରେଣୀ କର୍ମଚାରୀ, ୧୮ଜଣ ଅନ୍ୟ ସରକାରୀ କର୍ମଚାରୀ ଓ ୭୨ ବେସରକାରୀ ବ୍ୟକ୍ତି ରହିଛନ୍ତି। ଗିରଫ ହୋଇଥିବା ୧୮୧ ଅଭିଯୁକ୍ତଙ୍କ ମଧ୍ୟରେ ୩୭ କ୍ଲାସ୍-୧ ଅଫିସର, ୨୭ କ୍ଲାସ୍-୨ ଅଫିସର, ୮୫ ତୃତୀୟ ଶ୍ରେଣୀ କର୍ମଚାରୀ, ଜଣେ ଚତୁର୍ଥ ଶ୍ରେଣୀ କର୍ମଚାରୀ, ୧୦ ଅନ୍ୟ ସରକାରୀ କର୍ମଚାରୀ ଓ ୨୧ ବେସରକାରୀ ବ୍ୟକ୍ତି ରହିଛନ୍ତି। ଗିରଫ ଅଭିଯୁକ୍ତଙ୍କ ମଧ୍ୟରେ ୧୬ ଯନ୍ତ୍ରୀ ଥିବାବେଳେ ସେମାନଙ୍କ ମଧ୍ୟରୁ ବିଭିନ୍ନ ବିଭାଗର ୬ ମୁଖ୍ୟଯନ୍ତ୍ରୀ ରହିଛନ୍ତି। ୬୦ଟି ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ୬୬ ସରକାରୀ କର୍ମଚାରୀ ଓ ୩୬ ବେସରକାରୀ ବ୍ୟକ୍ତି ରହିଛନ୍ତି। ତେବେ ଏସବୁ ମାମଲାରେ ୧୩୧ କୋଟିରୁ ଊର୍ଦ୍ଧ୍ୱ ଟଙ୍କାର ଆୟ ବହିର୍ଭୂତ ସମ୍ପତ୍ତି ଠାବ ହୋଇଥିବାବେଳେ ସହଅଭିଯୁକ୍ତ ଭାବେ ୩୮ଜଣଙ୍କ ସ୍ତ୍ରୀ ଫସିଛନ୍ତି। ସେହିଭଳି ମୋଟା ଅଙ୍କର ଟଙ୍କା ଧରି ଯାଉଥିବା ୫ ସରକାରୀ ବାବୁଙ୍କୁ ଭିଜିଲାନ୍ସ ଟିମ୍ କାବୁ କରିଥିବା ବେଳେ ଏମାନଙ୍କ ମଧ୍ୟରେ ଜଣେ କ୍ଲାସ୍-୧ ଅଫିସର, ୨ କ୍ଲାସ୍-୨ ଅଫିସର, ଜଣେ କ୍ଲାସ୍-୩ ଅଫିସର ଏବଂ ଜଣେ ଅନ୍ୟ ସରକାରୀ କର୍ମଚାରୀ ରହିଛନ୍ତି। ଏଥିସହ ୯୬ ଲାଞ୍ଚ ମାମଲାରେ ୧୦୫ ସରକାରୀ କର୍ମଚାରୀ ଓ ୧୦ ବେସରକାରୀ ବ୍ୟକ୍ତି ଧରାପଡ଼ିଥିଲେ। ସରକାରୀ ଅର୍ଥ ଆତ୍ମସାତ୍ ସଂକ୍ରାନ୍ତୀୟ ୪୪ ମାମଲାରେ ୯୧ ଅଭିଯୁକ୍ତ ରହିଥିବାବେଳେ ଏମାନଙ୍କ ମଧ୍ୟରେ ୬୫ ସରକାରୀ କର୍ମଚାରୀ ଏବଂ ୨୬ ବେସରକାରୀ ବ୍ୟକ୍ତି ରହିଛନ୍ତି। ତଦନ୍ତ ବେଳେ ଭିଜିଲାନ୍ସ ଦୁର୍ନୀତିଗ୍ରସ୍ତ ସରକାରୀ କର୍ମଚାରୀଙ୍କ ୭୯୨ଟି ବ୍ୟାଙ୍କ୍ ଆକାଉଣ୍ଟକୁ ଫ୍ରିଜ୍ କରିଛି। ୨୦୨୪ରେ ୧୦୫ଟି ମାମଲାରେ ଦଣ୍ଡାଦେଶ ହୋଇଛି। ଏସବୁ ମାମଲାରେ ୧୪୭ଜଣ ଦୋଷୀ ସାବ୍ୟସ୍ତ ହୋଇଛନ୍ତି। ତେବେ ଏହିବର୍ଷ ୨୫ ସରକାରୀ କର୍ମଚାରୀଙ୍କୁ ଚାକିରିରୁ ବହିଷ୍କୃତ କରାଯାଇଥିବାବେଳେ ଦଣ୍ଡାଦେଶ ଆଧାରରେ ୬୫ଜଣ ଦୋଷୀ ଅବସରପ୍ରାପ୍ତ ସରକାରୀ କର୍ମଚାରୀଙ୍କ ପେନ୍ସନ ବନ୍ଦ କରାଯାଇଛି। ଅନ୍ୟପକ୍ଷରେ ୨୦୨୪ରେ ଭିଜିଲାନ୍ସ ଫରେଷ୍ଟ ୱିଙ୍ଗ୍ ପକ୍ଷରୁ ୧୦୧ ସ୍ଥାନରେ ଚଢ଼ାଉ କରାଯାଇ ୪.୮୨ କୋଟି ଟଙ୍କାର ସାମଗ୍ରୀ ଜବତ ସହ ୩୯ଜଣଙ୍କ ବିରୋଧରେ ମାମଲା ରୁଜୁ କରାଯାଇ ତଦନ୍ତ କରାଯାଇଥିବା ରିପୋର୍ଟରେ ଉଲ୍ଲେଖ ରହିଛି।
