ଦିଗପହଣ୍ଡି,୫।୯(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଭ୍ରମରପୁର ପଞ୍ଚାୟତ ବିଦ୍ୟାଧରପୁର ଗ୍ରାମର ମମତା ଦଳେଇଙ୍କୁ ଚିକିଟି ଅବକାରୀ ରେଞ୍ଜ ଇନ୍ସପେକ୍ଟର ସଞ୍ଜୟ କୁମାର ପଣ୍ଡା ଶୁକ୍ରବାର ସକାଳେ ଗିରଫ କରି କୋର୍ଟ ଚାଲାଣ କରିଛନ୍ତି। ତାଙ୍କ ନିକଟରୁ ୪୦ ଲିଟର ଅପମିଶ୍ରିତ ଦେଶୀମଦ ଜବତ କରାଯାଇଛି। ଅବକାରୀ ମାମଲା ନଂ.୪୦/୨୫-୨୬ ଅନୁଯାୟୀ ଜାମିନ ଆବେଦନ ନାମଞ୍ଜୁର ହେବାରୁ ଅଭିଯୁକ୍ତାଙ୍କୁ ଦିଗପହଣ୍ଡି ସବଜେଲ ହାଜତକୁ ପଠାଇ ଦିଆଯାଇଛି। ସକାଳ ପ୍ରାୟ ସାଢେ ୭ ଟାରେ ସିପାଦେଇ, ଅରଖପଦା, ଗୁମା,ବିଦ୍ୟାଧରପୁର ପ୍ରଭୃତି ଜନଜାତି ବହୁଳ ଗ୍ରାମଗୁଡ଼ିକରେ ଅବକାରୀ ଇନ୍ସପେକ୍ଟର ସଦଳବଳେ ପାଟ୍ରୋଲିଂ କରି ଫେରୁଥିବା ବେଳେ ବିଦ୍ୟାଧରପୁର ଗ୍ରାମର ମମତା ଦଳେଇ ତାଙ୍କ ଘର ବାରିପଟେ ସନ୍ଦେହଜନକ ଭାବେ ୨ଟି ପ୍ଲାଷ୍ଟିକ ଜାରକିନ ଲୁଚାଉଥିବାବେଳେ ମହିଳା କନେଷ୍ଟବଳ ସୁଚିତା ଡୁଙ୍ଗଡୁଙ୍ଗ ସେଠାରେ ପହଞ୍ଚି ଖାନତଲାସ କରିବାରୁ ୨ ଟି ଜାରକିନ ରେ ୪୦ ଲିଟର ଦେଶୀମଦ ଥିବା ଜଣାପଡିଥିଲା।
ଘଟଣାସ୍ଥଳରେ ସାକ୍ଷ୍ୟମାନଙ୍କ ଉପସ୍ଥିତିରେ ଜବତ ତାଲିକା ପ୍ରସ୍ତୁତ କରାଯାଇ ମଦକୁ ପରୀକ୍ଷା କରାଯିବା ପରେ ମମତାଙ୍କୁ ଦିଗପହଣ୍ଡି ଅବକାରୀ ଥାନାକୁ ଅଣାଯାଇଥିଲା। ସେ ଗାଁରେ ବିକ୍ରି ପାଇଁ ମଦ ରଖିଥିବା ସ୍ବୀକାର କରିବା ପରେ ତାଙ୍କୁ ଅବକାରୀ ଇନ୍ସପେକ୍ଟର ଗିରଫ କରିଥିଲେ ।
ସେହିପରି ଦିଗପହଣ୍ଡି ଅବକାରୀ ଓଆଇସି ଅନୀତା ପ୍ରଧାନ ସଦଳବଳେ ଶୁକ୍ରବାର ସକାଳ ପ୍ରାୟ ୬ଟାରେ ଦିଗପହଣ୍ଡି ବ୍ଲକ ଭ୍ରମରପୁର ପଞ୍ଚାୟତର ବିଭିନ୍ନ ଇଲାକାରେ ପାଟ୍ରୋଲିଂ କରୁଥିବାବେଳେ ଜନଜାତି ବହୁଳ ବଗଡ ଗାଁ ରାସ୍ତାକଡରୁ ଗ୍ରାମର ସୁକୁମାରୀ ଶବରଙ୍କ ନିକଟରୁ ଏକ ପ୍ଲାଷ୍ଟିକ ଜାରକିନରେ ଥିବା ୨୦ ଲିଟର ଦେଶୀମଦ ଜବତ କରିଥିଲେ। ଘଟଣାସ୍ଥଳରେ ସାକ୍ଷ୍ୟମାନଙ୍କ ଉପସ୍ଥିତିରେ ଜବତ ମଦ ପରୀକ୍ଷା କରାଯିବା ପରେ ତାଙ୍କୁ ଗିରଫ କରାଯାଇ ଅବକାରୀ ମାମଲା ନଂ.୯୬/୨୫-୨୬ ଅନୁଯାୟୀ କୋର୍ଟ ଚାଲାଣ କରାଯାଇଥିଲା। ଜାମିନ ଆବେଦନ ନାମଞ୍ଜୁର ହେବାରୁ ତାଙ୍କୁ ଦିଗପହଣ୍ଡି ସବ ଜେଲ ହାଜତକୁ ପଠାଇ ଦିଆଯାଇଛି।
