୨ ମହିଳାଙ୍କୁ ସ୍ବଚ୍ଛ ସୁଜଳ ଶକ୍ତି ସମ୍ମାନ
11:00 amMarch 5, 2023March 5, 2023 / 09

ଯାଜପୁର ଟାଉନ,୫।୩ (ଡି.ଏନ୍‌.ଏ.):  ଅନ୍ତର୍ଜାତୀୟ ମହିଳା ଦିବସ ପାଳନ ଅବସରରେ ଯାଜପୁର ଜିଲାର ୨ ମହିଳା ଜିଲା ଓ ରାଜ୍ୟ ପାଇଁ ଗୌରବ ଆଣିଛନ୍ତି। ରାଜ୍ୟର ପ୍ରଥମ ଭାବେ ଯାଜପୁର ଜିଲା ଦଶରଥପୁର ବ୍ଲକ୍‌ ଅଧୀନ ଅକରପଡ଼ା ପଞ୍ଚାୟତର ମହିଳା ସ୍ବୟଂ ସହାୟିକା ଗୋଷ୍ଠୀ କର୍ମୀ ସଲିଳା ଜେନା ଘରୋଇ ପାଇଖାନା ଟାଙ୍କି ସଫେଇ ପରିଚାଳନାରେ ଉଲ୍ଲେଖନୀୟ ସେବା ପାଇଁ ଶନିବାର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଦ୍ୱାରା ସ୍ବଚ୍ଛ ସୁଜଳଶକ୍ତି ସମ୍ମାନରେ ନୂଆଦିଲ୍ଲୀସ୍ଥିତ ବିଜ୍ଞାନ ଭବନରେ ସମ୍ମାନିତ ହୋଇଛନ୍ତି। ସଲିଳା ଘରର ଗୁଜରାଣ ମେଣ୍ଟାଇବା ପାଇଁ ଚାରିକାନ୍ଥ ମଧ୍ୟରେ ସୀମିତ ନ ରହି ପଦାକୁ ଗୋଡ଼ କାଢ଼ି ଜିଲାପାଳ ଚକ୍ରବର୍ତ୍ତୀ ସିଂହ ରାଠୋରଙ୍କ ପ୍ରେରଣାରେ ଏକ ସ୍ବୟଂ ସହାୟିକା ଗୋଷ୍ଠୀ ଗଠନ କରିଥିଲେ। ସେହିପରି ଯାଜପୁର ସଦର ବ୍ଲକ୍‌ ଅଧୀନ ସୁଜନପୁର ସରପଞ୍ଚ ବିଷ୍ଣୁପ୍ରିୟା ମହାକୁଡ଼ ସମାଜସେବାକୁ ବ୍ରତ ଭାବେ ଗ୍ରହଣକରି ନିଜ ପଞ୍ଚାୟତକୁ ବାହ୍ୟ ମଳମୂତ୍ର ଗ୍ରାମ ଭାବେ ଗଢ଼ିତୋଳିଛନ୍ତି। ଏଥିସହିତ ସୁଦୃଢ଼ ଭିତ୍ତିଭୂମି ପ୍ରସ୍ତୁତ କରିବାରେ ତାଙ୍କର ଉଲ୍ଲେଖନୀୟ ସେବା ଓ ଅବଦାନ ରହିଛି। ତେଣୁ ତାଙ୍କୁ ନୂଆଦିଲ୍ଲୀସ୍ଥିତ ବିଜ୍ଞାନ ଭବନଠାରେ କେନ୍ଦ୍ର ଜଳଶକ୍ତି ମନ୍ତ୍ରୀ ଗଜେନ୍ଦ୍ର ସିଂହ ଶେଖାୱାତ୍‌ ସ୍ବଚ୍ଛ ଜଳଶକ୍ତି ସମ୍ମାନରେ ସମ୍ମାନିତ କରିଛନ୍ତି। ମହାକୁଡ଼ ନିଜ ପଞ୍ଚାୟତକୁ ପରିଷ୍କାର ପରିଚ୍ଛନ୍ନ ରଖିବା, କଠିନ ବର୍ଜ୍ୟବସ୍ତୁଗୁଡ଼ିକୁ ଡଷ୍ଟବିନ୍‌ରୁ ସଂଗ୍ରହ କରି ସେଗୁଡ଼ିକୁ ଠିକ୍‌ ଢଙ୍ଗରେ ପରିଚାଳନା କରିବା, ସ୍ବୟଂ ସହାୟକ ଗୋଷ୍ଠୀଙ୍କ ବୈଠକ ଡକାଇ ସଚେତନ କରିବା ଆଦି ବିଭିନ୍ନ କୌଶଳ ଅବଲମ୍ବନ କରିଛନ୍ତି। ଏପରି କି ଜିଲାପାଳ ରାଠୋରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଆଜି ଯାଜପୁର ଜିଲା ସମଗ୍ର ଦେଶରେ ଗୌରବ ଆଣିବାରେ ସହାୟକ ହୋଇପାରିଛି। ସ୍ବଚ୍ଛ ସୁଜଳଶକ୍ତି ସମ୍ମାନ ପ୍ରଦାନ ଉତ୍ସବରେ ଯାଜପୁର ଜିଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ଅଶୋକ କୁମାର ବେଉରିଆ, ବରୀ ବିଡିଓ ନମିତା ବାରିକ, ସୁକିନ୍ଦା ବିଡିଓ ନମ୍ରଦା ମୋଦି ଓ ଜିଲା ପରିମଳ ବିଶାରଦ ମାନସ ରଞ୍ଜନ ସାହାଣୀ ପ୍ରମୁଖ ଉପସ୍ଥିତ ଥିଲେ।