ଓ୍ବାଶିଂଟନ୍,୨୪।୬: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କତାରର ସୁପାରିଶରେ ଇରାନ ଏବଂ ଇସ୍ରାଏଲ ମଧ୍ୟରେ ଯୁଦ୍ଧବିରାମ ମଧ୍ୟସ୍ଥତା କରିଛନ୍ତି। ଇରାନ କତାର ଉପରେ ମିଶାଇଲ୍ ମାଡ଼ କରିବା ମାତ୍ରେ କତାରର ଆମୀର ଏବଂ ପ୍ରଧାନମନ୍ତ୍ରୀ ଆମେରିକାର ସହାୟତା ଲୋଡିଥିଲେ।
କତାରର ସୁପାରିଶରେ ଟ୍ରମ୍ପ ତାଙ୍କର ମଧ୍ୟପ୍ରାଚ୍ୟ ଦୂତ ୱିଟକଫଙ୍କ ସହ କଥା ହୋଇଥିଲେ। ୱିଟକଫ ତା’ପରେ ତାଙ୍କ ଇରାନୀ ପ୍ରତିପକ୍ଷଙ୍କୁ ଫୋନ କରିଥିଲେ।
ରିପୋର୍ଟ ଅନୁଯାୟୀ, କାତାରର ଆମୀର ଏବଂ ପ୍ରଧାନମନ୍ତ୍ରୀ ଯୁଦ୍ଧବିରାମ ଘୋଷଣା ନ ହେବା ପର୍ଯ୍ୟନ୍ତ ସକ୍ରିୟ ରହିଥିଲେ। ଉଭୟ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଉପରାଷ୍ଟ୍ରପତି ଜେଡି ଭାନ୍ସଙ୍କ ସହ କଥାବାର୍ତ୍ତା ଜାରି ରଖିଥିଲେ।
ସୋମବାର ମଧ୍ୟରାତ୍ରିରେ ଇରାନ କତାର ଉପରେ ମିଶାଇଲ୍ ମାଡ଼ କରିଥିଲା। ଇରାନ ଦୋହାରେ ଥିବା ଆମେରିକାର ବିମାନ ଘାଟି ଉପରେ ୬ଟି ମିଶାଇଲ୍ ମାଡ଼ କରିଥିଲା। କତାର ମଧ୍ୟ ଆହୁରି ଆକ୍ରମଣର ଆଶଙ୍କା କରୁଥିଲା।
ୱିଟକଫ ଇରାନର ବୈଦେଶିକ ମନ୍ତ୍ରୀ ଆବାସ ଆରାଘଚିଙ୍କୁ ଫୋନ କରିଥିଲେ। ବୈଦେଶିକ ମନ୍ତ୍ରୀ ଏକ ସର୍ତ୍ତ ରଖିଥିଲେ। ଇରାନର ବୈଦେଶିକ ମନ୍ତ୍ରୀ କହିଥିଲେ, ଯଦି ଇସ୍ରାଏଲ ଆକ୍ରମଣ ବନ୍ଦ କରେ, ତେବେ ହିଁ ଏହି ଘଟଣାର ସମାଧାନ ହୋଇପାରିବ।
ଆରାଘଚିଙ୍କ ଅନୁସାରେ, ଇସ୍ରାଏଲ ଯୁଦ୍ଧ ଆରମ୍ଭ କରିଛି। ଆକ୍ରମଣ ବନ୍ଦ କରିବା ମଧ୍ୟ ଏହାର କାମ। ଯଦି ଇସ୍ରାଏଲ ଆକ୍ରମଣ ବନ୍ଦ କରେ, ତେବେ ଆମେ ମଧ୍ୟ ଆକ୍ରମଣ କରିବୁ ନାହିଁ। ଫୋନ୍ରେ, ୱିଟକଫ ଇରାନକୁ ଆଶ୍ୱାସନା ଦେଇଥିଲେ ଯେ ଆଗାମୀ ୨୪ ଘଣ୍ଟା ପରେ ଇସ୍ରାଏଲ ଆକ୍ରମଣ କରିବ ନାହିଁ।
ଇରାନର ବୈଦେଶିକ ମନ୍ତ୍ରୀଙ୍କ ସହ ଫୋନ୍ରେ କଥା ହେବା ପରେ, ୱିଟକଫ ହ୍ବାଇଟ ହାଉସକୁ ତାଙ୍କର ବାର୍ତ୍ତା ପଠାଇଥିଲେ। ଏହା ପରେ, ଆମେରିକାର ରାଷ୍ଟ୍ରପତି ଯୁଦ୍ଧବିରତି ଘୋଷଣା କରିଥିଲେ।
ଇସ୍ରାଏଲ ଏବଂ ଆମେରିକା ଇରାନର ୟୁରାନିୟମ ସମୃଦ୍ଧି ବନ୍ଦ କରିବାକୁ ଚେଷ୍ଟା କରୁଥିଲେ। ଏହି ରଣନୀତି ଅନୁଯାୟୀ, ଆମେରିକା ଇରାନର ୩ଟି ପରମାଣୁ ସ୍ଥାନକୁ ଟାର୍ଗେଟ କରିଥିଲା। ତଥାପି, ଇରାନ କହୁଛି ଯେ ସେଠାରେ କୌଣସି ୟୁରାନିୟମ ନାହିଁ।
ଇସ୍ରାଏଲ କହିଛି, ଇରାନ ଗୋଟିଏ କିମ୍ବା ଦୁଇ ବର୍ଷ ପାଇଁ ପରମାଣୁ ବୋମା ତିଆରି କରିପାରିବ ନାହିଁ। ପରବର୍ତ୍ତୀ ସମୟରେ କ’ଣ ହେବ ତାହା ମୁଖ୍ୟତଃ ଇରାନର ପରବର୍ତ୍ତୀ ରଣନୀତି ଉପରେ ନିର୍ଭର କରିବ।
